ގާނޫނާއި ގަވައިދުގެ ތެރެއިން ބޭރުވާ ޖަމިއްޔާތައް އުވައިލާނަން-ސްޓޭޓް މިނިސްޓަރ
30 ސެޕްޓެމްބަރ 2013 22:36
މިނިސްޓްރީއޮފް ހޯމްއެފެއާޒުގައި ރަޖިސްޓްރީ ކޮށްގެން ހިންގާ މަދަނީ ޖަމިއްޔާތައް، ޖަމިއްޔާތަކާ ބެހޭ ގާނޫނާއި ގަވާއިދުން ބޭރުވާ ކަމަށްވާނަމަ އެފަދަ ޖަމިއްޔާ ޖަމާއަތްތައް އުވާލާނެ ކަމުގެ އިންޒާރު ސްޓޭޓް މިނިސްޓަރއޮފް ހޯމްއެފެއާޒު އަބްދުﷲ މުހައްމަދު (މަދަނީ އަބްދުﷲ) މިރޭ ދެއްވައިފިއެވެ.
ވީޓީވީގެ "ފަސްމަންޒަރު" ޕްރޮގްރާމުގައި ވާހަކަ ދައްކަވަމުން އޭނާ ވިދާޅުވީ ރިޔާސީ އިންތިޚާބުގެ ދެވަނަބުރު 28 ސެޕްޓެމްބަރ ގައި ނުބާއްވައިފިނަމަ ރިސޯޓުތަކުގައި ހަޅުތާލު ކުރުމުގެ އިންޒާރު އެފަދަ ޖަމާއަތަކުން ދިންކަމަށެވެ. ނަމަވެސް "ގާނޫނު އަސާސީއާއި، ކޯޓުތަކުގެ އަމުރަށް ތަބާނުވާ" އެފަދަ ޖަމިއްޔާ ޖަމާއަތްތައް އުވާލުމަށް އެއްވެސް ވަރަކަށް ފަސްޖެހި ވަޑައި ނުގަންނަވާނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ ރަޖިސްޓްރާގެ ހައިސިއްޔަތުން މިހާރު ގެންދަވަނީ އެފަދަ ޖަމާއަތްތައް އުވާލުމަށް ގާނޫނީ ލަފާ ހޯއްދަވަމުން ކަމަށެވެ. އެއީ ގާނޫނު ތަންދޭ ކަމެއް ކަމަށް ވާނަމަ އެފަދަ ޖަމިއްޔާތައް އުވާލައްވާނެ ކަމަށެވެ. އަބްދުﷲ ވިދާޅުވީ އެފަދަ ޖަމިއްޔާތަކަކީ އެޖަމިއްޔާއެއް ތަމްސީލް ކުރާ ދާއިރާއެއްގެ ހައްގުތައް ހިމާޔަތް ކުރުމަށް ވަކާލާތު ކުރުމަށް މަސައްކަތްކުރާ ޖަމާއަތްތައް ކަމަށެވެ. އެފަދަ ޖަމާއަތްތަކަކީ ސްޕްރީމް ކޯޓުގެ ހުކުމަކާ ޚިލާފަށް އިންތިޚާބުތަކުގެ ސައްޙަ ކަން ކަނޑައެޅުމުގެ ބާރު ގާނޫނު އަސާސީން ލިބިދީފައިވާ ޖަމާއަތްތަކެއް ނޫންކަމަށްވެސް ވިދާޅުވިއެވެ.
އެހެން ކަމުން ނިއުސްކޮންފަރެންސް ބާއްވައިގެން ތަފާތު ޖަމާއަތްތަކުން އެޖަމާއަތްތަކުގެ މެންޑޭޓުން ބޭރުގައި ވާހަކަ ދައްކައި ހެދުމަކީ އެއްގޮތަކަށްވެސް ކޮށްގެންވާނެ ކަމެއް ނޫން ކަމަށް އޭނާ ވިދާޅުވިއެވެ. އެހެން ކަމުން އެފަދަ ކަންކަމުން ދުރުވެ ތިބުމަށް އޭނާ ވަނީ ޖަމިއްޔާތަކަށް އިންޒާރު ކުރައްވާފައެވެ.
އޭނާ ވިދާޅުވީ ޓްރާންސްޕޭރެންސީ މޯލްޑިވްސް އަކަސް އެހެން ޖަމިއްޔާއަކަށް ވިޔަސް އެޖަމާއަތްތަކުގެ މެންޑޭޓުން ބޭރުނުވުމަށް ނަސޭހަތްތެރި ވެފައެވެ. މިއާ ޚިލާފުވާ ޖަމާއަތްތަކަށް "މިގައުމުން ޖާގައެއް ނުދޭނަން" ކަމަށްވެސް އޭނާ ވިދާޅުވިއެވެ.
"ރަޖިސްޓްރާގެ ހައިސިއްޔަތުން އަޅުގަނޑަށް ލިބިފައިވާ ބޭރުގެ ބޭނުން ކުރާނަން" އޭނާ ވިދާޅުވިއެވެ. އޭނާ ވިދާޅުވީ މިފަދަ ޖަމިއްޔާ ޖަމާއަތްތަކުން އެމީހުންގެ މެންޑޭޓުގެ ބޭރުން ތަފާތު ވާހަކަ ދައްކައިގެން ގައުމުގައި ފަސާދައެއް އުފެދުމުގެ ފުރުސަތުވެސް ނުދެއްވާނެ ކަމަށެވެ.
ކިޔުންތެރިންގެ ހިޔާލު