އިންސާފުވެރި އިންތިޚާބެއް ބޭއްވުމަކީ ފުރިހަމަ ޑިމޮކްރަސީއެއް އަށަގެންނެވުމަށް އެޅޭނެ އެންމެ ވަރުގަދަ ފިޔަވަޅު-ރައީސް

އިންސާފުވެރި ކަމާއި ޞުލްޙަވެރިކަމާއެކު މިހާރު ހިނގަމުންދާ ރިޔާސީ އިންތިޚާބުގެ ކަންކަން ކުރިއަށްގެންގޮސް ނިންމުމަކީ، ދިވެހިރާއްޖޭގައި ފުރިހަމަ ޑިމޮކްރަސީއެއް އަށަގެންނެވުމަށްޓަކައި އެޅޭނެ އެންމެ ވަރުގަދަ ފިޔަވަޅު ކަމުގައި ރައީސުލްޖުމްހޫރިއްޔާ ޑރ. މުޙައްމަދު ވަހީދު ޙަސަން ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވެފައިވަނީ، ބައިނަލްއަޤްވާމީ ޑިމޮކްރަސީ ދުވަސް މިއަދު ފާހަގަ ކުރުމުގެ ގޮތުން ދެއްވި ޚިތާބުގައެވެ.

މިއަހަރުގެ ޑިމޮކްރަސީ ދުވަހުގެ ޝިޢާރަކީ "ޑިމޮކްރަސީއަށްޓަކައި ރައްޔިތުންގެ އަޑުތައް ބާރުވެރިކުރުވުން" އެވެ.

ރައީސް ވިދާޅުވީ މި ޤައުމުގެ ކޮންމެ ރައްޔިތަކީ ޤައުމުގެ ޙިއްޞާއެއްވާ މީހެއް ކަމަށެވެ. ދިވެހިރާއްޖޭގައި އެޅޭ އިޞްލާޙީ ފިޔަވަޅުތަކާމެދު ހަމަކޮންމެ މީހެއްގެވެސް ބަހެއް އޮންނާނެ ކަމުގައި ވިދާޅުވެފައިވެއެވެ. ހަމައެއާއެކު، ޑިމޮކްރެޓިކް ސަރުކާރެއް ޤާއިމުކުރުމުގައި ކޮންމެ މީހެއްގެ ވޯޓަކީވެސް މުހިންމު ވޯޓެއް ކަމަށްވެސް އެމަނިކުފާނު ވިދާޅުވެފައިވެއެވެ.

ޑިމޮކްރަސީ އަށަގެންނެވުމަށް ހުއްޓުމެއްނެތި ބޮޑެތި މަސައްކަތްތަކެއް ކުރަންޖެހޭނެކަން ރައީސްވަނީ ފާހަގަ ކުރައްވާފައެވެ. އޭގެ ތެރޭގައި، ޤައުމުގައި ޢަދުލުއިންސާފު ޤާއިމު ކުރުމާއި، ޤާނޫނުއަސާސީއަށް އެންމެ ފުރިހަމައަށް ބޯލަނބާ ވެރިކަމެއް ޤާއިމު ކުރުން ހިމެނޭ ކަމުގައި ވިދާޅުވެފައިވެއެވެ. އަދި، ޤައުމުގައި ޢަދުލު އިންސާފާއި ހަމަޖެހުން ގެނެއުމަށްޓަކައި، ރައްޔިތުންނަށް ލިބިދޭންޖެހޭ ޙައްޤުތައް އުނިނުވާފަދަ ގޮތަކަށް ޤާނޫނުއަސާސީއަށް ގެންނަންޖެހޭ އިސްލާހުތައް ގެންނަންޖެހޭ ކަމަށްވެސް ވިދާޅުވެފައިވެއެވެ. އަދި ހަދަންޖެހޭ ޤާނޫނުތައް ހެދުމަކީ، ވަރަށް މުހިންމު ކަމެއް ކަމުގައި ދެކެވަޑައިގަންނަވާ ކަމަށްވެސް ވިދާޅުވެފައިވެއެވެ.