އިންތިޚާބާ ގުޅިގެން ފުލުހަކާމެދު ދައުވާ ކުރާ މައްސަލަ އިތުރަށް ބަލާނަން: ރިޔާޒު
8 ނޮވެމްބަރ 2013 18:50
މިދިޔަ އޮކްޓޯބަރު 19 ވަނަ ދުވަހު ރާއްޖޭގައި ބާއްވަން އުޅުނު ރިޔާސީ އިންތިޚާބަށް ފުލުހުން އެއްބާރުލުން ނުދިން ކަމަށް ބުނެ ފުލުހަކާމެދު ދައުވާ ކުރުމަށް ޕޮލިސްއިންޓަރގްރިޓީ ކޮމިޝަން (ޕީއައިސީ) އިން ނިންމަވާފައިވާ މައްސަލަ ބައްލަވާނެ ކަމަށް ކޮމިޝަނަރއޮފް ޕޮލިސް އަބްދުﷲ ރިޔާޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ގއ. މާމެންދޫ ޕޮލިސް ސްޓޭޝަން ހުޅުވައިދެއްވުމަށް އެރަށުގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އެމަނިކުފާނު ވިދާޅުވީ އިންތިޚާބާ ގުޅިގެން ފުލުހަކާ ދެކޮޅަށް ޖިނާޢީ ދަޢުވާ ކުރެވޭނެކަމަށް ގަބޫލު ނުކުރައްވާކަމަށެވެ. ދިމާވާ ކޮންމެ ހާދިސާއެއްގައި ފުލުހެއްގެ ފުރާނަ ދުއްވާލަން ފުރުސަތު ނުދެއްވާނެ ކަމަށްވެސް އެމަނިކުފާނު ވިދާޅުވިއެވެ.
ޢަބްދުﷲ ރިޔާޒް ވިދާޅުވީ އޮކްޓޯބަރު 19 ވަނަ ދުވަހު އިންތިޚާބު ބޭއްވުމަށް އިލެކްޝަންސް ކޮމިޝަނަށް ފުލުހުންގެ ފަރާތުން ހުރިހާ އެހީތެރިކަމެއް ފޯރުކޮށް ދެއްވި ކަމަށެވެ. ނަމަވެސް އެދުވަހުގެ އިންތިޚާބު ހުއްޓުވީ ފުލުހުން ކަމަށް ބުނެ ވަރަށް ގިނަ ގޮތްގޮތުން ވާހަކަދައްކަމުން ގެންދާ ކަމަށެވެ.
ރިޔާޒު ވިދާޅުވީ ޕޮލިސް އިންޓެގްރިޓީ ކޮމިޝަންގެ ރިޕޯޓުގައި ފާހަގަ ކޮށްފައިވާފަދައިން އިލެކްޝަންސްގެ ކަންތައްތައް އެންމެ ފުރިހަމައަށް ގެންދިއުމަށްޓަކައި އެއް މުއައްސަސާއެއްގެ ހައިސިއްޔަތުން އެންމެ ރަނގަޅަށް މަސައްކަތްކޮށްދިން އަދި އެހީތެރިވެދިން މުއައްސަސާއަކީ ޕޮލިސް ސަރވިސް ކަމަށްވާނެ ކަމަށެވެ.
އިންތިޚާބުގެ ކަންކަން ފުރިހަމަކޮށް ގެންދިއުމަށް އިލެކްޝަންސް ކޮމިޝަނާއި ފުލުސްއޮފީހާ ދެމެދު ވަރަށް ރަނގަޅަށް މުއާމަލާތް ކުރައްވާފައިވާ ކަމަށެވެ. އިންތިޚާބުގެ ކަންކަން ފުރިހަމަ ކުރުމަށްޓަކައި ފުލުހުން ކޮންމެހެން ކޮށްދޭން ނުޖެހޭ ކަންތައްތައްވެސް އެދުވަހު ކޮށްދީފައި ހުންނާނެ ކަމަށް ރިޔާޒު ވިދާޅުވިއެވެ.
ރިޔާޒު ވިދާޅުވީ އެދުވަހު އިންތިޚާބު ހުއްޓުމަށް މެދުވެރިވި ކަންކަމާ ގުޅޭގޮތުން އިލެކްޝަންސް ކޮމިޝަންގެ ރައީސްގެ ފަރާތްޕުޅުން އެއްވެސް އިޝާރާތެއް ކުރައްވާފައި ނުވާކަމަށެވެ. އިންތިޚާބާ ގުޅޭ އެހެން ހުރިހާ ކަމެއްގައިވެސް އިލެކްޝަން ކޮމިޝަންގެ ރައީސް މަޝްވަރާ ކުރެއްވިކަމަށް ކޮމިޝަނަރ އޮފް ޕޮލިސް ރިޔާޒު ވިދާޅުވިއެވެ.
މިކަންކަން މިގޮތަށް ދިމާވެފައިވިޔަސް ރިޔާސީ އިންތިޚާބުގެ ކަންކަމުގައި އިލެކްޝަނަސް ކޮމިޝަނަށް ފުލުހުންގެ ފަރާތުން ދޭންޖެހޭ ހުރިހާ އެއްބާރުލުމެއް ފުރިހަމަ ގޮތުގައި މިހާރެކޭ އެއްގޮތަށް ދެއްވާނެ ކަމަށްވެސް ރިޔާޒު ވިދާޅުވިއެވެ.
ރިޔާޒު ވިދާޅުވީ ޤާނޫނު ނެގެހެއްޓުމުގެ ގޮތުން ފުލުހުން ނިންމާ ނިންމުންތަކާ ގުޅިގެން ހިއުމަންރައިޓްސް ކޮމިޝަނާއި ޕޮލިސް އިންޓެގްރިޓީ ކޮމިޝަނާއި، އެންޖިއޯ ތަކުން ބަޔާންތައް ނެރުނުކަމަށްވިޔަސް ދިވެހި ޤައުމާއި ރައްޔިތުންގެ ސަލާމަތާއި ރައްކާތެރިކަމަށް ކުރަންޖެހޭ ކޮންމެ ކަމެއް ކުރައްވާނެ ކަމަށެވެ.
ރިޔާޒު ވިދާޅުވީ މާދަމާ ބާއްވާ އިންތިހާބުގައިވެސް ފުލުހުން އިސްދައުރެއް އަދާކުރާނެ ކަމަށެވެ. ފުލުހުން ބަލަމުންދާނީ ޤާނޫނު އަސާސީއާއި ޤާނޫނުތަކާއި ކޯޓުތަކުގެ އަމުރު ނަގަހައްޓައި ހިފެހެއްޓުމަށް ކަމަށްވެސް އެމަނިކުފާނު ވިދާޅުވިއެވެ. އެއަމުރާ އެއްކޮށް ޤައުމު އަމާން މިސްރާބަކަށް ގެންދިޔުމަށް ފުލުހުން މަސައްކަތްކުރާނެ ކަމުގެ ޔަޤީންކަން ރައްޔިތުންނަށް ދެއްވާ ކަމަށްވެސް ރިޔާޒު ވިދާޅުވިއެވެ.
ރިޔާޒު ވިދާޅުވީ ދިމާވާ ކޮންމެ ހާދިސާއެއްގައި ފުލުހެއްގެ ފުރާނަ ދާން ފުރުސަތެއް ނުދެވޭނެ ކަމަށެވެ. ދިމާވާ ކޮންމެ ހާދިސާއެއްގައި ފުލުހެއްގެ ބޯ ފަޅާލައިގެން އެފުލުހަކު ދާއިމަށް އަނިޔާވެފަހުރި މީހަކަށްވާން ފުރުސަތެއް ނުދެވޭނެ ކަމަށްވެސް ވިދާޅުވިއެވެ. އެހެން ކަމުން އެކަންކަމަށްޓަކައި ބޭނުންވާ އާލާތްތައް ހޯއްދާވާނެ ކަމަށްވެސް ވިދާޅުވިއެވެ. ދައުލަތުންވެސް ކުރެވެންހުރި ހުރިހާކަމެއްވެސް ކޮންމެ ސަރުކާރެއްގައިވެސް ކޮށްދެއްވާ ކަމަށާއި އެކަންކަން ހަމަޖެއްސުމަށް މަސައްކަތް ކޮށްދެއްވާ ކަމަށްވެސް ރިޔާޒު ވިދާޅުވިއެވެ.
ކިޔުންތެރިންގެ ހިޔާލު