އިންތިޚާބުގައި އެއްބާރުލުން ނުދޭން ނިންމީ ކަމާބެހޭ ފަރާތްތަކާ މަޝްވަރާ ކުރުމަށްފަހު: ފުލުހުން

މިއަދު ބާއްވަން އުޅުނު ރިޔާސީ އިންތިޚާބަށް ފުލުހުން އެއްބާރުލުން ނުދޭން ނިންމީ ކަމާ ބެހޭފަރާތްތަކާ މަޝްވަރާ ކުރެއްވުމަށްފަހު އެފަރާތްތަކުގެ ލަފާ ލިބިގެން ކަމަށް ސުޕްރިންޓެންޑެންޓް އޮފް ޕޮލިސް އަބްދުﷲ ނަވާޒު ވިދާޅުވެއްޖެއެވެ.

ނޫސްވެރިންނަށް މައުލޫމާތު ދެއްވަމުން އޭނާ މިއަދު ވިދާޅުވީ މިފިޔަވަޅު އެޅުމުގެ ކުރިން މަޝްވަރާކޮށް ލަފާ ހޯއްދެވި ފަރާތްތަކުގެ ތެރޭގައި ރައީސުލްޖުމްހޫރިއްޔާ، އެކްޓިން ހޯމް މިނިސްޓަރ، އެޓާނީ ޖެނެރަލް، ނެޝިނަލް ސެކިއުރިޓީ ކައުންސިލް ހިމެނޭ ކަމަށެވެ.

އޭނާ ވިދާޅުވީ އިންތިޚާބަށް ފުލުހުން އެއްބާރުލުން ނުދޭން ނިންމީ ސުޕްރީމް ކޯޓުގެ ގައިޑްލައިނާ ޚިލާފަށް އިންތިޚާބު ބާއްވަން އިލެކްޝަންސް ކޮމިޝަނުން އުޅުމުން ކަމަށެވެ. އޭނާ ވިދާޅުވީ އަބަދުވެސް އިލެކްޝަންސް ކޮމިޝަނަށް ފުލުހުން ގެންދެވީ އެހީތެރިކަން ފޯރުކޮށް ދެއްވަމުން ކަމަށެވެ.

ނަވާޒު ވިދާޅުވީ ފުލުހުން މިގޮތަށް އަމަލު ކުރައްވަން ނިންމެވީ ގައުމީ މަސްލަހަތަށްވެސް ވަރަށް ބޮޑަށް ރިއާޔަތް ކުރެއްވުމަށް ފަހުގައި ކަމަށެވެ.

" އަޅުގަނޑުމެން އަމަލުކުރަމުން މިގެންދަނީ ސުޕްރީމް ކޯޓުގެ ރޫލިންއާ އެގޮތަށް. އަޅުގަނޑުމެން މިހާރު ވެސް މި ރިކްއެސްޓްކުރަނީ އިލެކްޝަންސް ކޮމިޝަނާއި ސިޔާސީ ޕާޓީތައް ގުޅިގެން ހުކުމުގައިވާ ގޮތަށް ކުރިޔަށް ގެންދަން،" އޭނާ ވިދާޅުވިއެވެ.

"އަޅުގަނޑުމެން މި މަސައްކަތް ކުރަނީ ވަކި ފަރާތަކަށް ނޫން. އަޅުގަނޑުމެން ގަބޫލުކުރަނީ ގައިޑްލައިނާ އެއްގޮތަށް އަމަލުކުރަން ޖެހޭނެ. އަޅުގަނޑުމެން ނެތިން ވަކި ގޮތަކަށް ހުކުމް މާނަކުރާކަށް،" އޭނާ ވިދާޅުވިއެވެ.

އޭނާ ވިދާޅުވީ ވޯޓާސް ލިސްޓުގައި ކެންޑިޑޭޓުން ލައްވައި ސޮއިކުރުމަށް އިލެކްޝަންސް ކޮމިޝަނުން ކުރެއްވި މަސައްކަތް ފުލުހުންގެ ހައިސިއްޔަތުން ބަލަންޖެހޭނެ ކަމަށް ގަބޫލު ނުކުރާ ކަށެވެ. ފުލުހުން ބަލާނީ ސްޕްރީމްކޯޓުގެ ގައިޑްލައިންގައި ހުރި ކަންކަން ފުރިހަމަ ކޮށްފައިވޭތޯ ނުވަތަ ނޫންތޯ ކަމަށްވެސް އޭނާ ވިދާޅުވިއެވެ. އޭނާ ވިދާޅުވީ "އަޅުގަނޑުމެން ގަބޫލުކުރަނީ ސުޕްރީމް ކޯޓުގެ ސޯޅަ ޕޮއިންޓް ގައިޑްލައިނާ އެއްގޮތަށް އިލެކްޝަންސް އިން އަމަލުކުރަން ޖެހޭނެ ކަމަށް." އޭނާ ވިދާޅުވިއެވެ.

އޭނާ ވިދާޅުވީ މިއަދު އިންތިޚާބު ބާއްވައިފިނަމަ ގައުމުގައި ހަމަނުޖެހުން އުފެދޭނެ ކަމުގެ އިންޓެލިޖެންސް މައުލޫމާތު ލިބިފައިވާ ކަމަށްވެސް އޭނާ ވިދާޅުވިއެވެ.