ސްޕްރީމްކޯޓުގެ ހަތަރު ފަނޑިޔާރުންނަކީ ގައުމީ ސަލާމަތަށް ހުރި ނުރައްކަލެއް: ރައީސް ނަޝީދު

ދިވެހިރާއްޖޭގެ ސްޕްރީމްކޯޓުގެ ހަތްފަނޑިޔާރުންގެ ތެރެއިން ހަތަރު ފަނޑިޔާރުންނަކީ ގައުމީ ސަލާމަތަށް ހުރު ނުރައްކަލެއް ކަމަށް އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުޙައްމަދު ނަޝީދު ރޭ ވިދާޅުވެއްޖެއެވެ.

މަންދުކޮލެޖުގައި މީޑިއާއާ ބައްދަލު ކުރައްވައި ވާހަކަ ފުޅު ދައްކަވަމުން އެމަނިކުފާނު ވިދާޅުވީ ސްޕްރީމްކޯޓުން މިހާރު މަސައްކަތް ކުރައްވަމުން ގެންދަވަނީ ދިވެހި ދައުލަތާ އިދިކޮޅަށް ކަމަށެވެ. އެހެންކަމުން އެކޯޓުގައި މަސައްކަތް ކުރައްވާ 7 ފަނޑުޔާރުންގެ ތެރެއިން 4 ފަނޑިޔާރަކު ހައްޔަރު ކުރުމަށް ގައުމީ ސަލާމަތުގެ ޚިދުމަތްތަކާ ބެހޭ ފަރާތްތަކަށް ގޮވާލައްވާ ކަމަށް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ ސްޕްރީމްކޯޓުން ގެންދަވަނީ ގާނޫނު އަސާސީއާ ޚިލާފަށް "ޣައިރު ގާނޫނީ އަމުރުތައް" ނެރެމުން ކަމަށެވެ. އެމަނިކުފާނު އެވިދާޅުވާ އަމުރަކީ ރިޔާސީ އިންތިޚާބުގެ ފުރަތަމަ ބުރު ފަސްކޮށް އަދި ފަހުން އެއިންތިޚާބު ބާތިލް ކުރުމަށް ކުރައްވާފައިވާ އަމުރު ނުވަތަ ހުކުމަށް ކަމަށް ބެލެވެއެވެ. އަދި އެ 4 ފަނޑިޔާރުންނަކީ އެހުކުމުގައި ސޮއިކުރެއްވި ބޭފުޅުން ކަމަށްވެސް ބެލެވެއެވެ. އެ 4 ފަނޑިޔާރުންނަކީ ފަނޑިޔާރު ޢަބްދުﷲ ސަޢީދާއި، ޢަލީ ޙަމީދާއި، އާދަމް މުޙައްމަދާއި، ޑރ. އަޙުމަދު ޢަބްދުﷲ ދީދީ އެވެ.

ރިޔާސީ އިންތިޚާބުގެ ފުރަތަމަ ބުރު ބާތިލް ކުރެއްވިއިރު 242 ވޯޓުގައި މައްސަލަ ހުރި ކަމަށް 4 ފަނޑިޔާރުން ފާހަގަ ކުރައްވާފައިވާ ކަމަށެވެ. 473 ވޯޓު އޮޅުވާލާފައި ނުވަތަ މައްސަލަ ހުރި ކަމަށް 2 ފަނޑިޔާރުން ފާހަގަ ކުރައްވާފައިވާ ކަމަށެވެ. މީގެ ތެރެއިން ބޮޑު އަދަދު ނެގި ކަމަށްވިޔަސް އިންތިޚާބުގެ ނަތީޖާއަށް އެއްވެސް ބަދަލެއް ނާންނާނެ ކަމަށް އެމަނިކުފާނު ވިދަޅުވިއެވެ. ނަމަވެސް ސްޕްރީމްކޯޓުންވަނީ އެބުރު ބާތިލް ކުރައްވާފައި ކަމަށެވެ. އެމަނިކުފާނު ވިދާޅުވީ ސްޕްރީމްކޯޓުން މިފަދަ ހުކުމެއް ކުރެއްވި އިރު މިއަދަދަށް ބަލާއިރު ގާނޫނީ ހަމަތަކާއި، ބައިނަލް އަގުވާމީ މިންގަނޑުން ބެލިޔަސް އިންތިޚާބު ބާތިލް ނުކުރެވޭނެ ކަމަށެވެ.

ރައީސް ނަޝީދު ވިދާޅުވީ އެފަނޑިޔާރުން އެގޮތަށް އަމަލުކުރައްވާފައިވަނީ ސިޔާސީ ބައެއް ބޭފުޅުންނާ ގުޅިވަޑައިގެން އަމިއްލަ މަސްލަހަތު އެކަމުގައި ހިމަނުއްވައިގެން ކަމަށެވެ. ނަމަވެސް އެބޭފުޅުންގެ މިއަމަލަށް ހައްގު އަދަބު ކޮންމެވެސް ދުވަހަކުން ލިބޭނެ ކަމަށްވެސް އެމަނިކުފާނު ވިދާޅުވިއެވެ.

ނަޝީދު ވިދާޅުވީ ސްޕްރީމް ކޯޓުން މިގޮތަށް އަމަލު ކުރައްވާފައިވާއިރު އެކޯޓަކީ ދުސްތޫރީ މައްސަލަތައް ބަލާ ކޯޓެއް ކަމަށް އެމަނިކުފާނުގެ ގާނޫނީ ޓީމުން ބުނެފައިވާ ކަމަށެވެ. އެކަމަކު އެކޯޓުންވަނީ އިންތިޚާބު ބޭއްވުމުގައި އަމަލުކުރަންވީ ގޮތުގެ ގައިޑުލަނެއްވެސް އިލެކްޝަނަށް އަންގަވާފައި ކަމަށެވެ. އެހެންކަމުން ސްޕްރީމް ކޯޓުން ހިގާފައިވަނީ ބޮޑު "ޖަރީމާ" އެއް ކަމަށްވެސް އެމަނިކުފާނު ވިދާޅުވިއެވެ. އެހެންކަމުން މީގެ އަގު އެ ފަނޑިޔާރުން ދައްކަވަން ނުޖެހޭނެ ކަމަށް ހީކުރައްވައިގެން ނުވާނެ ކަމަށްވެސް ވިދާޅުވިއެވެ. "އެ ބޭފުޅުން އެ ކުރައްވަނީ ޣައިރު ޤާނޫނީ ކަމެއް. އެތައް ރައްޔިތުންގެ ޙައްގަކަށް އެ އަރާވަޑައިގަންނަވަނީ. އަޅުގަނޑު ދެކޭގޮތުގައި އެ ބޭފުޅުންނަށް އެކަމުގެ ހައްގު އަދަބު ލިބޭނެ. ހަމަ އެއާއެކު ސުޕްރީމް ކޯޓުން ޣައިރު ގާނޫނީ އަމުރު ކުރީމައި އެއަކަށް ތަބާވާކަށް ނުޖެހޭނެ،" އެމަނިކުފާނު ވިދާޅުވިއެވެ.

 ރައީސް ނަޝީދު ވިދާޅުވީ "ސުޕްރީމް ކޯޓުގެ ހަތަރު ފަނޑިޔާރުންނަކީ ޤައުމީ ސަލާމަތަށް ހުރި ނުރައްކަލެއް. އަޅުގަނޑު ސަލާމަތީ ބާރުތަކުގައި ވަރަށް އިޚްލާސްތެރިކަމާ އެކު އެދެން ދިވެހި ރާއްޖޭގެ ޤައުމީ ސަލާމަތް އެބޭފުޅުން ހިފަހައްޓަވައިދެއްވުމަށް،"

މިމަހުގެ 19 ވަނަ ދުވަހު އިންތިޚާބު ބާއްވާނެތޯ ނޫސްވެރިއަކު ދެންނެވުމުން އެމަނިކުފާނު ވިދާޅުވީ ސެޕްޓެމްބަރު 28 ގައި އިންތިޚާބު ނުބޭއްވީ އިންތިޚާބު ބޭއްވޭނެ ފަދަ މާހައުލެއް އޭރު ނެތިގެން ކަމަށް އިލެކްޝަނުން ބުނެފައިވާ ކަމަށެވެ. އެމްޑީޕީން އަބަދުވެސް ބަރޯސާވާނީ އިލެކްޝާންސް ކޮމިޝަނުން އަންގަވާ އެއްޗަކަށް ކަމަށްވެސް ރައީސް ނަޝީދު ވިދާޅުވިއެވެ. އެދުވަހު އެފަދަ މާހައުލެއްނެތީ އިލެކްޝަނަށް "ފުލުހުން އަރައިގަތުމުން" ކަމަށްވެސް ވިދާޅުވިއެވެ. ނަމަވެސް މިމަހުގެ 19 ވަނަ ދުވަހު ސްޕްރީމްކޯޓުން ފުލުހުން ފޮނުވިޔަސް ސިފައިން ނުކުމެ ފުލުހުން ހުއްޓުވާނެ ކަމަށް އުންމީދު ކުރައްވާ ކަމަށް ވިދާޅުވިއެވެ. އަދި އަވަށްޓެރި ބައެއް ގައުމުތައް ނުވަތަ ބައިނަލް އަގުވާމީ ފަރާތްތަކުގެ އެހީތެރިކަން ލިބޭނެކަމަށް ހީފުޅު ކުރައްވާ ކަމަށްވެސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އެމްޑީއަކީ ކިތަންމެ ހަނިދޭތެރެއެއް ލިބުނަސް ދެމިގަންނާނެ ޕާޓީއެއް ކަމަށެވެ. އެހެން ކަމުން ކޮންމެދުވަހަކު އިންތިޚާބެއް ބޭއްވިޔަސް އެމަނިކުފާނުގެ ވާދަވެރިން "ބޮޑު ބައްޔަކުން ބަލިކުރާނަން،" ކަމަށްވެސް އެމަނިކުފާނު ވިދާޅުވިއެވެ.