އިލެކްޝަންސް ކޮމިޝަނަށް ވަދެނިކުތުން ފުލުހުން ކޮންޓްރޯލް ކޮށްފި-ފުވާދު
27 ސެޕްޓެމްބަރ 2013 21:45
އިލެކްޝަންސް ކޮމިޝަނުގެ އިމާރާތަށް ވަދެނިކުތުން ފުލުހުން ކޮންޓްރޯލް ކޮށްފައިވާ ކަމަށް އިލެކްޝަންސް ކޮމިޝަންސް ގެ ރައީސް ފުވާދު ތައުފީގު ވިދާޅުވެއްޖެއެވެ.
އޭނާ ވިދާޅުވީ އެތަނަށް މިހާރު ވަދެވެނީ ހަމައެކަނި ފުލުހުންނަށް ގަބޫލުކުރެވޭ ސަބަބެއް އޮތް މީހުންނަށް ކަމަށެވެ. ފުވާދު ވިދާޅުވީ އެކޮމިޝަނުގެ މެންބަރުން ބޭރުގެ ފަރާތްތަކާ ބައްދަލު ކުރައްވަން ނިންމަވާފައިވާ ނިންމެވުންވެސް ފުލުހުންގެ އެންގުމުގެ މަތިން ކެންސަލް ކޮށްފައިވާ ކަމަށް ފުވާދު ވިދާޅުވިއެވެ. އެގޮތުން މާދަމާ ހެނދުނު 11:00 އަށް އިނގިރޭސި ސަފީރަށް ދެއްވާފައިވާ އެޕޮއިންޓްމަންޓްވެސް ކެންސަލް ކޮށްފައިވާ ކަމަށެވެ.
"ކޮންމެހެން އޮފީހަށް ވަންނަން ޖެހޭ ބަޔަކު ފިޔަވައި ނުވަދެވޭނެ ކަމަށް ފުލުހުން ބުނަނީ،" ފުވާދު ވިދާޅުވިއެވެ. "ގާތްގަނޑަކަށް ފުލުހުންގެ ބެލުމުގެ ދަށުގައި ކޮމިޝަން އޮތީ،" ފުވާދު ވިދާޅުވިއެވެ.
ފުވާދު ވިދާޅުވީ މާދަމާވެސް ކޮންމެހެން އޮފީހަށް އަންނަން ޖެހޭ ބަޔަކު ފިޔަވައި ނައުމަށް އެތަނުގެ މުވައްޒަފުންނަށް މިހާރުވަނީ އަންގަވާފައި ކަމަށެވެ. ޢޭނާ ވިދާޅުވީ ފުލުހުން ދަނީ ކޮމިޝަން އިދާރާގެ ތިރީގައި ފޯރިމަރަމުންނެވެ. އެހެން ކަމުން އެތަނަށް ވަދެނިކުތުމުގެ މިނިވަންކަމެއް ނެތް ކަމަށް ރާއްޖެ ޓީވީއަށް ފުވާދު ވިދާލުވިއެވެ.
އެސަރަހައްދުގައި ހަރަކާތްތެރިވާ ނޫސްވެރިވެސް ފުލުހުންވަނީ ބެރިކޭޑުގެ ފަހަތަށް ޖެހުމަށް އަންގާފައެވެ. މިގޮތަށް އަމަލުކުރުމުން އިލެކްޝަންސް ކޮމިޝަނުން ހޯދަންޖެހޭ މައުލޫމާތު ހޯދުމަށް ނޫސްވެރިންނަށްވަނީ ވަރަށް ބޮޑަށް ދަތިވެފައެވެ.
މިކަމާ ބެހޭ ގޮތުން ފުލުހުން ބުނެފައިވަނީ އެބޭފުޅުން ގެންދަވަނީ ސްޕްރީމްކޯޓުގެ އަމުރެއް ތަންފީޒު ކުރަމުން ކަމަށެވެ.
ކިޔުންތެރިންގެ ހިޔާލު