އިލެކްޝަންސް ކޮމިޝަނުން ގެންދަނީ ޖެއްސުން ކުރަމުން-ޖޭޕީ

ރިޔާސީ އިންތިޚާބުގެ ފުރަތަމަ ބުރުގައި ވޯޓުލާފައިވާ މީހުންގެ ލިސްޓުތައް ޖުމްހޫރީ ޕާޓީ (ޖޭޕީ) އަށް ދެއްކުމަށް އިލެކްޝަންސް ކޮމިޝަނުގެ މައްޗަށް ހައިކޯޓުން ކޮށްފައިހުކުމާ އެއްގޮތަށް އަމަލު ކުރުމުގެ ބަދަލުގައި އެކޮމިޝަނުން ގެންދަނީ ޖޭޕީއަށް ޖެއްސުން ކުރަމުން ކަމަށް ޖޭޕީން ބުނެފިއެވެ.

ޖޭޕީން މިއަދު ނެރެފައިވާ ބަޔާނެއްގައި ބުނެފައިވަނީ، ވޯޓްލީ މީހުންގެ ލިސްޓް ކޯޓުގެ ހުކުމާ އެއްގޮތަށް، ޖޭޕީއަށް ދައްކަން އިލެކްޝަންސް ކޮމިޝަނުން މިއަދު ވަނީ އިންކާރު ކޮށްފައި ކަމަށެވެ. އެހެން ކަމުން އެކަން ކުށްވެރިކޮށް އިލެކްޝަނާ މެދު ގާނޫނީ ފިޔަވަޅު އަޅާނެ ކަމަށް ޖޭޕީގެ ބަޔާނުގައި ބުނެފައިވެއެވެ.

ހައިކޯޓުން އިއްޔެ ކޮށްފައިވާ ހުކުމާ ހަވާލާދީ ޖޭޕީގެ ބަޔާނުގައި ބުނެފައިވަނީ ފުރަތަމަ ބުރުގައި ވޯޓުލީ މީހުންގެ ލިސްޓް، އެޕާޓީގެ ރިޔާސީ ކެންޑިޑޭޓަށް ނުވަތަ ކެންޑިޑޭޓް ކަނޑައަޅުއްވާ ބަޔަކަށް ބެލުމުގެ ފުރުސަތު އިލެކްޝަންސް ކޮމިޝަނުން ދައްކަންޖެހޭ ކަމަށެވެ. އެކަން އިންތިޒާމު ކޮށް އިންތިޚާބާ ބެހޭ ގޮތުން ޖޭޕީއަށް އުފެދިފައިވާ ޝައްކުތައް ފިލުވައި ދިނުމަށްވެސް ހުކުމާ ހަވާލާދީ ޖޭޕީން ބުނެފައިވެއެވެ.

ހައިކޯޓުން މިގޮތަށް ހުކުމް ކޮށްފައި ވީނަމަވެސް އިލެކްޝަންސް ކޮމިޝަނުން އެކަމަށް އެކަމަށް އަމަލު ނުކުރާ ކަމަށްވެސް ބުނެފައިވެއެވެ. އަދި އެކޮމިޝަނުން ގެންދަނީ ޖެއްސުން ކުރުމުގެ ޢަމަލުތައް ހިންގަމުން ކަމަށްވެސް ބުނެފައިވެއެވެ.

ޖޭޕީގެ ބަޔާނުގައި މިގޮތަށް ބުނެފައިވިޔަސް އިލެކްޝަންސް ކޮމިޝަނުން އެޕާޓީއަށް ޖެއްސުން ކުރުމަށް ކޮށްފައިވާ ކަމެއް ކަނޑައެޅިގެން ބުނެފައެއް ނުވެއެވެ. ނަމަވެސް އިލެކްޝަންސް ކޮމިޝަނުންވަނީ ހައިކޯޓުގެ ހުކުމް ބޮލާލައި ޖަހާފައި ކަމަށް ބުނެފައިވެއެވެ. އަދި ކޮމިޝަންގެ ބައެއް މެންބަރުން ޗުއްޓީ ހޭދަ ކުރެއްވުމަށް ރާއްޖެއިން ބޭރަށް ވަޑައިގެންފައިވާ ކަމަށްވެސް ބުނެފައިވެއެވެ. އަދި ލިސްޓް ނުދެއްކުމުގެ ބަހަނާއެއްގެ ގޮތުގައި ކޮމިޝަނުގެ ބައެއް މެންބަރުން ރާއްޖެއިން ބޭރުގައި ތިއްބެވި ވާހަކަ އިލެކްޝަންސް ކޮމިޝަނުން ބުނެފައިވާ ކަމަށްވެސް އެބަޔާނުގައިވެއެވެ. އަދި މިބަހަނާއި ޖޭޕީ ރިޔާސީ ކެންޑިޑޭޓުގެ ފަރާތުން އިލެކްޝަންސް ކޮމިޝަނަށް މިއަދު ދިޔަ ޓީމަށް، ލިސްޓް ދައްކަން އެކޮމިޝަނުން އިންކާރުކޮށްފައިވާ ކަމަށްވެސް ބުނެފައިވެއެވެ.

އިންތިޚާބާ ގުޅުންހުރި އެއްވެސް ފަރާތަކުން އިންތިޚާބުގައި ވޯޓުލައިފައިވާ މީހުންގެ ލިސްޓާމެދު ޝައްކެއް އުފެދިއްޖެ ކަމަށްވާނަމަ އެލިސްޓް ހާމަ ކުރަން ޖެހޭނެ ކަމަށްވެސް ޖޭޕީން ބުނެފައިވެއެވެ. އެއީ މަޢުލޫމާތު ހޯދުމާ ލިބިގަތުމުގެ ގާނޫނުގެ ދަށުން ލިބިގެންވާ ހައްގެއް ކަމަށްވެސް ބުނެފައިވެއެވެ.

އިލެކްޝަންސް ކޮމިޝަނުން މިހާރު އަމަލު ކުރަމުންދާ ގޮތުން އެއީ ގާނޫނާއި ގަވާއިދަށް ބޯލަނބައިގެން އަދުލުވެރި ކަމާއެކު ކަންތައްތައް ކުރަން ބޭނުންވާ މުއައްސަސާއެއް ނޫންކަން ސާބިތުވާ ކަމަށްވެސް ޖޭޕީން ބުނެފައިވެއެވެ. އެލިސްޓް ނުދައްކަން އުޅެނީ "ވަގަށް" ކޮށްފައިވާ ކަންތައްތަކެއް ބޭޒާރުވެދާނެތީ ކަމަށް ތުހުމަތު ކުރުމުގެ ފުރުސަތުި މިހާރު ބޮޑުވެފައިވާ ކަމަށެވެ. މީގެ ސަބަބުން އިންތިހާބުގައި ހަދާފައިވާ މަކަރުތައް ފޮރުވަން އިލެކްޝަންސް ކޮމިޝަނުން މަސައްކަތް ކުރަމުންދާ ކަމުގެ ތުހުމަތުވެސް ބޮޑަށް ކުރުމުގެ ޖާގަ އެބައޮތް ކަމަށްވެސް ބުނެފައިވެއެވެ. ށް ވެސް ރައްޔިތުން މިހާރު ދަނީ އިންތިހާއަށް ޝައްކު އުފެދުމުން ކަމަށް ވެސް ޖޭޕީގެ ބަޔާން ބުނެ އެވެ.

އެހެން ކަމުން "އިލެކްޝަންސް ކޮމިޝަނަށް ޖުމްހޫރީ ޕާޓީގެ ފަރާތުން އިލްތިމާސް ކުރަނީ، ކޯޓު އަމުރަށް ކިޔަމަންވެ ބޯހަރުކަން ދޫކުރުމަށެވެ. އަދި އިލެކްޝަންސް ކޮމިޝަނާ އެ ކޮމިޝަންގެ މެންބަރުންނާ މުވައްޒަފުންގެ ނަޒާހާތްތެރިކަން ހިފެހެއްޓެވުމަށެވެ." އެބަޔާނުގައިވެއެވެ.

މިމައްސަލާގައި އިލެކްޝަންސް ކޮމިޝަނުގެ ބަހެއް ހޯދުމަށް ކޮމިޝަނުގެ ރައީސް ފުވާދު ތައުފީގަށް ގުޅުމުން ފޯނެއް ނުނަންގަވައެވެ. އަދި އެސްއެމްއެސް ކުރުމުން ވެސް ކޮންމެވެސް ސަބަބަކާ ހުރު ޖަވާބެއް ނުދެއްވައެވެ. ސެކްރެޓަރީޖެނެރަލް އާސިމް އަބްދުއްސައްތާރުވެސް ފޯނު ނުނަންގަވައެވެ. މީޑިއާ ކޯޑިނޭޓަރ އަޝްވާ ވިދާޅުވީ ޖުމްހޫރީ ޕާޓީގެ އެ ތުހުމަތު ތަކަށް އޭނާއަށް ކޮމެންޓެއް ނުކުރެވޭނެ ކަމަށެވެ. އެއަށް ކޮމެންޓް ކުރެވޭނީ ސެކްރެޓަރީޖެނެރަލަށް ކަމަށެވެ.