ދެންތިއްބެވި ކެންޑިޑޭޓުންނާއެކު އެއްބައިވަންތަ ކަމުގެ ސަރުކާރެއް އުފައްދާނަން-ގާސިމް

ކުރިއަށްއޮތް ރިޔާސީ އިންތިޚާބު ޖުމްހޫރީގުޅުމަށް ކާމިޔާބު ވެއްޖެނަމަ ދެން ވާދަކުރައްވާ ތިން ކެންޑިޑޭޓުންނާ އެކީގައި އެބައިވަންތަ ކަމުގެ ސަރުކާރެއް އުފައްދަވާނެ ކަމަށް ޖުމްހޫރީ ގުޅުމުގެ ރިޔާސީ ކެންޑިޑޭޓް ޤާސިމް އިބްރާހީމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ގައުމީޔުނިވަރސިޓީއާއި ޓީވީއެމް ގުޅިގެން މިރޭ ބޭއްވި ރިޔާސީ ކެންޑިޑޭޓުންގެ ބަހުސް ނިންމަވާ ލައްވަމުން ދެއްކެވި ވާހަކަ ފުޅުގައެވެ. ގާސިމަށް ދެއްވި އެންމެ ފަހު ފުރުސަތުގައި އޭނާ ވިދާޅުވީ "ދިވެހިރާއްޖޭގެ ލޮބުވެތި ރައްޔިތުން އަޅުގަނޑު ރައީސުލްޖުމްހޫރިއްޔާ ކަމުގެ މަގާމަށް ހޮއްވަވައިފިނަމަ އަޅުގަނޑާއެކީ މިތިއްބެވި ތިންބޭފުޅުންނާއެކީގައި އެކުވެރިކަމުގެ ސަރުކާރެއް ނުވަތަ އެއްބައިވަންތަ ސަރުކާރެއް އަޅުގަނޑު އުފައްދާނަން. އެބޭފުޅުންނާ އަދި އެބޭފުޅުންނަށް ތާއިދު ކުރައްވާ ހުރިހާ ރައްޔިތުންނާ އެކީގައި އެބޭފުޅުންނަށް ދޭންޖެހޭ ގަދަރާއި ހައިބަތު ދީގެން އަޅުގަނޑު އެކަން ކުރާނަން،" ކަމަށެވެ.

ގާސިމް ވިދާޅުވީ އިޖުތިމާއީ ގޮތުންވެސް އަދި އިގްތިސާދީ ގޮތުންވެސް ރާއްޖެ މިވަގުތުުއޮތީ ވަރަށް ނާޒުކު ފައްތަރެއްގައި ކަމަށެވެ. މީގެ އިތުރަށް އެހެން ކަންކަންވެސް ހުރީ ނާޒުކު ހިސާބެއްގައި ކަމަށް ވިދާޅުވިއެވެ. މިކަންކަން ހައްލުކުރެވޭނީ ހައްލުކުރަން ދަންނަ ކަންކަމުގެ ތަޖުރިބާ ލިބިފައިވާ ބަޔަކަށް ކަމަށްވެސް ވިދާޅުވިއެވެ.

އެމަނިކުފާނު ވިދާޅުވީ އެނގިފައިވާ ކަންކަމާއި ލިބިފައިވާ ތަޖުރިބާއަށް ބަލާއިރު ތަރައްގީގެ ރޮނގުގައި ރައްޔިތުން ތިބީ ތިބެންވާ ހިސާބެއްގައި ނޫންކަމަށެވެ. ރާއްޖެ މިއަށްވުރެ ބޮޑަށް ތަރައްގީ ކުރެވޭނެ ވަސީލަތްތައް ރާއްޖޭގައި އެބަހުރި ކަމަށްވެސް ގާސިމް ވިދާޅުވިއެވެ.

ގާސިމް ވިދާޅުވީ ރާއްޖޭގެ ވެރިކަން ލިބިވަޑައިގެންފި ކަމަށްވާނަމަ ރާއްޖެއަށް އުޖާލާކަން ގެނެސް ދެއްވާނެ ކަމަށެވެ. އަދި ހަމަޖެހުން ގެނެސްދެއްވާނެކަމަށްވެސް ވިދާޅުވިއެވެ. އެމަނިކުފާނު ވިދާޅުވީ ގައުމު މިހާރުގެ ހާލަތުން ރަނގަޅު ހާލަތަށް ބަދަލުކޮށް އާރާސްތު ކުރެވޭނީ ތަޖުރިބާއާއެކު ކަންކަން ކުރައްވައި ނަތީޖާ ނެރެފައިވާ މީހުންނަށް ކަމަށެވެ.

ގާސިމު ވިދާޅުވީ އެމަނިކުފާނުގެ ވެރިކަމެއްގައި ރާއްޖެ ތަރައްގީ ކުރުމަށް މަސައްކަތް ކުރައްވާނީ ދުބާއީއާއި ސިންގަޕޫރު ފެންވަރަށް ކަމަށެވެ. އެމަނިކުފާނުގެ ވެރިކަމުގައި ދައުލަތު ލޯލާރިއެއްގައިވެސް ޖެހިވަޑައި ނުގަންނަވާނެ ކަމަށް ﷲ ގަންދީ ހުވައި ވިދާޅުވިއެވެ. އެމަނިކުފާނުގެ ވެރިކަމެއްގައި ދިވެހިރައްޔިތުންނަށް އުފާވެރިކަން ގެނެސް ދެއްވާނެ ކަަމަށްވެސް ވިދާޅުވިއެވެ.