ޔާމީނާ ވެރިކަން ހަވާލުކޮށްފިނަމަ މިހާރަށްވުރެ ރައްޔިތުން ބިކަވާނެ- ޑރ.ހަސަން
31 އޯގަސްޓް 2013 23:12
ރިޔާސީ އިންތިޚާބުގައި ވާދަ ކުރައްވާ ޕީޕީއެމްގެ ރިޔާސީ ކެންޑިޑޭޓް ކުރިއަށްއޮތް ފަސްއަހަރަށް ރާއްޖޭގެ ވެރިކަމަށް ހޮވައިފި ކަމަށްވާނަމަ ރައްޔިތުންގެ ހާލަތު މިހާރަށްވުރެ ދަށްވެ ބިކަވާނެ ކަމަށް ޖުމްހޫރީކޯލިޝަންގެ ރިޔާސީ ކެންޑިޑޭޓް ގާސިމް އިބްރާހީމްގެ ރަނިންމޭޓް ޑރ. ހަސަން ސައީދު ވިދާޅުވެއްޖެއެވެ.
މ. ކުނޫޒުގައި ނޫސްވެރިނަން މައުލޫމާތު ދެއްވަމުން މިއަދު ހަވީރު އޭނާ ވިދާޅުވީ ޔާމީނަކީ ދިވެހިސަރުކާރުގައި މަތީ މަގާމްތަކެއް އަދާކުރައްވާފައިވާ ބޭފުޅެއް ކަމަށެވެ. ނަމަވެސް އެމަގާމްތައް އަދާކުރެއްވުމުގެ މާބޮޑު ކާމިޔާބެއް ހޯދިފައިނުވާ ކަމަށް ޑރ. ހަސަން ތުހުމަތު ކުރެއްވިއެވެ.
އޭނާ ވިދާޅުވީ ޔާމީނަކީ، އެސްޓީއޯ، ސެޓެލްކޯ، އައިލެންޑް އޭވިޝަން، އައްޑޫޑިވެލޮޕްމަންޓް އޮތޯރިޓީ، ލޭބަރ މިނިސްޓްރީ ފަދަ ތަނަތަނުގެ އިސްވެރިއެއްގެ ގޮތުން މަސައްކަތް ކުރެއްވުމުގެ ފުރުސަތު ލިބިވަޑައިގެންނެވި ބޭފުޅެއް ކަމަށެވެ.
އެމަނިކުފާނު އެސްޓީއޯގެ އިސްބޭފުޅަކަށް ހުންނެވިއިރު ސަންޓްރެވެލް ޝިޔާމުގެ ދެކުންފުންޏަކަށް އިންޓްރެސްޓާ ނުލައި ވަރަށްބޮޑު ދެ ލޯން ދެއްވާފައިވާ ކަމަށް ޑރ. ޙަސަން ވިދާޅުވިއެވެ. "އެސްޓީއޯގެ އިސްބޭފުޅަކަށް ހުންނެވިއިރު އެސްޓީއޯއިން އެބައޮތް ހަމައެކަނި އެމަނިކުފާނާއެކީ މިއިންތިޚާބުގައި ބައިވެރިވެލެއްވި ސަންޓްރެވެލް ޝިޔާމް ދެކުންފުންޏަކަށް ވަރަށް ބޮޑު އަދަދެއްގެ ދެލޯން ދެއްވާފައި އިންޓްރެސްޓް ފްރީކޮށް. ސަންޓްރެވެލް ޝިޔާމްގެ ސަން އިންވެސްޓްމަންޓް ޕްރައިވެޓް ލޮމިޓެޑް ކިޔާ ކުންފުންޏަކަށް ސަތޭކަބާރަ މިލިއަންރުފިޔާގެ ލޯނު އިންޓްރެސްޓް ފްރީކޮށް ދެއްވާފައި އެބައޮތް. އަދި އެހެންމެ ސަންޓްރެވެލް ޝިޔާމްގެ އެހެން ކުންފުންޏެއް ކަމަށްވާ އެޑްމިރަލް ރިޒޯޓް ޕްރައިވެޓް ލިމިޓެޑް ކިޔާ ކުންފުންޏަކަށް އެގާރަ މިލިއަން ރުފިޔާގެ އިންޓްރެސްޓް ފްރީ ލޯން ދެއްވާފައި އެބައޮތް،" ޑރ. ޙަސަން ވިދާޅުވިއެވެ.
މިފައިސާ އޭނާއަށް ދީފައިވަނީ ޑޮލަރު ގަތުމުގެ ނަމުގައި ޑކަމަށްވެސް އޭނާ ވިދާޅުވިއެވެ. މިލޯނުތަކުގެ ސަބަބުން އެސްޓީއޯއަށް އިންތިހާއަށް ބޮޑު ގެއްލުމެއްވި ކަމަށް އޮޑިޓް ރިޕޯޓުތަކާ ހަވާލާ ދެއްވައި އޭނާ ވިދާޅުވިއެވެ. އެހެންކަމުން ޔާމީން "ކުރިއަށް އޮތް ފަސްއަހަރުގައި ދިވެހިރާއްޖޭގެ ވެރިކަން ކުރައްވައިފިއްޔާ އަޅުގަނޑަށް ހީވަނީ އަޅުގަނޑުމެންގެ މިހާރުގެ ހާލަތަށްވުރެ ހާސްގުނަ ބިކަވާނެ،" ކަމަށް ޑރ. ޙަސަން ވިދާޅުވިއެވެ.
ޑރ. ޙަސަން ވިދާޅުވީ ޔާމީނަކީ "ނަމުން އިގްތިސީދީ މާހިރެއް" ކަމަށެވެ. އެމަނިކުފާނަކީ އިގްތިސާދީ މާހިރެއް ކަމަށް ދައުވާ ކުރައްވާއިރު އަތްޕުޅުގައި އޮތީ ބޭސިކް ޑިގްރީއެއް ކަމަށްވެސް އޭނާ ވިދާޅުވިއެވެ. މިފަދަ ޑިގްރީއަކުން މާހިރަކަށް ނުވާނެ ކަމަށްވެސް ވިދާޅުވިއެވެ.
"ޔާމީން އިސްވެ ހުންނަވައި ހިންގަމުންދިޔަ އެއްވެސް ތަނަކުން ނިކުތް ރަނގަޅު ނަތީޖާއެއް ނެތް! އެސްޓީއޯއާއި ސްޓެލްކޯ ހިންގެވިއިރު އަދި އައްޑޫގެ ތަރައްގީއަށް ކުރެއްވި ކަމަށް ވިދާޅުވާ އެއްވެސް ކަމަކުން ނެރެވުނު ނަތީޖާއެއް ނެތް،" ކަމަށްވެސް ވިދާޅުވިއެވެ.
"[ތިޔަބޭފުޅުން] ބައްލަވާ އިނގޭތޯ؟ އެ ވިދާޅުވާ މާހިރުގެ ވެރިކަމުގައި ބައްލަވައިގަތީ ސައިފަތް ދަނޑެއް! ދެ އަހަރު ފަހުން ސައިފަތް ދަނޑު ވިއްކާލީ ގަތް އަގަށްވުރެ ދެ ގުނަ ކުޑަކޮށް. މިއީ އެފަދަ ލީޑަރުންގެ ފެންވަރަކީ،" އޭނާ ވިދާޅުވިއެވެ.
ޑރ. ޙަސަން ވިދާޅުވީ ޔާމީން ސްޓެލްކޯ ހިންގެވި ދުވަސްވަރު 700 މިލިއަން ރުފިޔާއިން ސްޓެލްކޯ ދަރުވާލާފައިވާ ކަމަށެވެ. އެހެން ކަމުން އެފަދަ ބޭފުޅަކަށް އިގްތިސާދީ މާހިރެކޭ ކިޔޭނެ ގޮތެއް ނޯންނާނެ ކަމަށެވެ.
ހަސަން ވިދާޅުވީ ޔާމީން ސްޓެލްކޯ ހިންގެވި ދުވަސްވަރު އެތަނަށް ގެނެވުނު އިންޖީނުތައް ހަލާކުވެފައިވާ ކަމަށެވެ. އަދި ޚަރަދު ބޮޑުވެ އެތައް ތަނަކަށް ސްޓެލްކޯއިން ފައިސާ ނުދައްކައި އޮތް ކަމަށްވެސް ވިދާޅުވިއެވެ. ސްޓެލްކޯ އެ ދުވަސްވަރާ ހަމައަށް ވެސް ހިންގަވަމުން އައިސްފައިވަނީ ރަޖިސްޓްރީ ނުކޮށް ކަމަށްވެސް ވިދާޅުވިއެވެ.
"މީގެ އިތުރުން އައިލެންޑް އޭވިއޭޝަންގެ ހިންގެވުމާއި ހަވާލްވެ ހުންނެވި ދުވަސްވަރު ގެނެވުނު އެއްވެސް ތަރައްގީއެއް ނެތް،" ކަމަށްވެސް ހަސަން ވިދާޅުވިއެވެ.
ޑރ. ހަސަން ވިދާޅުވީ ޔާމީނަކީ އިގްތިސާދީ ގޮތުން ޤާސިމް އިބްރާހީމާ ވާދަ ކުރެއްވޭނެ ބޭފުޅެއް ނޫންކަމަށެވެ.
ކިޔުންތެރިންގެ ހިޔާލު