އިސްލާމީ ޑިމޮކްރަޓިކް ގައުމެއްގެ ގޮތުގައި ރާއްޖެ ދަމަހައްޓާނަން- އަމީން އިބްރާހީމް
7 އޯގަސްޓް 2013 3:35
ޖުމްހޫރީ ކޯލިޝަންގެ ވެރިކަމެއްގައި ދިވެހިރާއްޖެއަކީ އިސްލާމީ ޑިމޮކްރަޓިކް ގައުމެއްގެ ގޮތުގައި ދަމަހައްޓާނެ ކަމަށް ޖުމްހޫރީ ޕާޓީގެ ނާއިބް ލީޑަރު އަދި ޓްރާންސްޕޯޓު މިނިސްޓަރ އަމީން އިބްރާހީމް ވިދާޅު ވެއްޖެއެވެ.
ޖުމްހޫރީކޯލިޝަންގެ ދިނީ ސިޔާސަތާއި ގައުމީ ސިޔާސަތު ހާމަ ކުރުމަށް އަރަބިއްޔާ ސްކޫލުގައި ރޭ ބޭއްވި ޖަލްސާގައި ވާހަކަ ދައްކަވަމުން އޭނާ ވިދާޅުވީ "ސުލްހައަށް ލޯބިކުރާ ފަޚުރުވެރި އިސްލާމީ ޑިމޮކްރަޓިކް ގައުމެއްގެ ގޮތުގައި އަޅުގަނޑުމެންގެ ވެރިކަމެއްގައި (ރާއްޖެ) ދަމަހައްޓާނަން،" ކަމަށެވެ. އަދި ރާއްޖެއާއި އިސްލާމީ އެހެން ގައުމުތަކާ ދެމެދުގައި އޮންނަ ގުޅުން އެކޯލިޝަނުގެ ވެރިމެއްގައި ވަރުގަދަ ކުރާނެ ކަމަށެވެ. މީގެ ތެރެއިން ރާއްޖެއަށް ބޭނުންވާނެ އިންވެސްޓްމަންޓްތައް ހޯދުމަށްވެސް މަސައްކަތް ކުރައްވާނެ ކަމަށް އޭނާ ވިދާޅުވިއެވެ.
އަމީން ވިދާޅުވީ އިސްލާމީ ގައުމުތަކުގެ އިތުރަށް ރާއްޖެއާއި ބައިނަލް އަގުވާމީ ދުނިޔެއާ ދެމެދު އޮންނަ ގުޅުންވެސް ބަދަހި ކުރާނެ ކަމަށެވެ. ރާއްޖެއާއި އެހެން ގައުމުތަކާ ދެމެދު އޮންނަ ގުޅުމަކީ ރާއްޖޭގެ މިނިވަންކަމާއި އިސްތިގުލާލާއި ގުޅި ލާމެހިފައިވާ ގުޅުމަކަށް ވާތީ އެގުޅުން ވަރުގަދަ ކުރަންޖެހޭ ކަމަށް އޭނާ ވިދާޅުވިއެވެ.
އޭނާ ވިދާޅުވީ ދުނިޔޭގައި "އަޅުގަނޑުމެންގެ ވަރަށްގާތް ބައެއްގެ ގޮތުގައި އަޅުގަނޑުމެންގެ ދީނާ ތަންކޮޅެއް ދުރު ބައެއް ގައުމުތައްވެސް އެބަވޭ،" ކަމަށެވެ. ނަމަވެސް ބަވަނަ ވެފައިވާ ޒަމާނެއްގައި ރާއްޖެ އެފަދަ ގައުމުތަކާ ގުޅި ލާމެހެން އެބަޖެހޭ ކަމަށްވެސް ވިދާޅުވިއެވެ. އަދި އެގުޅުމަކީ ހަރުދަނާ ގުޅުމަކަށް ވާންޖެހޭ ކަމަށްވެސް އަމީން ވިދާޅުވިއެވެ. އެގުޅުން ކިތަންމެ ހަރުދަނާކޮށް ވަރުގަދަ ކުރިކަމަށް ވިޔަސް އިސްލާމީ ޝަޚުސިއްޔަތުގެ ނަމަށް ކިލަނބު ކަމެއް އަންނާނެ އެއްވެސް ކަމެއް ނުކުރައްވާނެ ކަމަށް އޭނާ ވިދާޅުވިއެވެ. އަދި "އެނަން ރީތިކަމާއި ޝަރަފާ އެކީގައި ދަމަހައްޓާނަން،" އަމީން ވިދާޅުވިއެވެ.
އޭނާ ވިދާޅުވީ ޖޭޕީކޯލިޝަންގެ ވެރިކަމެއްގައި ރާއްޖޭގެ ދާޚިލީ ކަންކަމުގެ ތެރެއަށް ބޭރު މީހުން އެއްވެސް ގޮތަކަށް ނުވައްދާނެ ކަމަށެވެ. ފާއިތުވި ދެތިން އަހަރު ވޭތުވެގެން ދިޔައީ "އަޅުގަނޑުމެންގެ އަމިއްލަ ނަފުސުގެ މައްޗަށް އެއްވެސް ބާރެއް ލިބިގެން ނުވާ" ގޮތަށް ކަމަށްވެސް އޭނާ ވިދާޅުވިއެވެ.
އޭނާ ވިދާޅުވީ ޖުމްހޫރީ ކޯލިޝަނުގެ ވެރިކަމެއްގައި ރާއްޖެއަށް ބޭރުގެ އެއްވެސް ނުފޫޒެއް ފޯރުވިޔަ ނުދެއްވާނެ ކަމަށެވެ. އަދި ރާއްޖެ ދެމިއޮންނާނީ ޑިމޮކްރަޓިކް ހަމަތަކަށާއި، އިންސާނީ ހައްގު ތަކަށާއި، ރާއްޖެ ސޮއިކޮށްފައިވާ ބައިނަލް އަގުވާމީ މުއާހަދާ ތަކަށް އިހުތިރާމް ކުރާ ގައުމެއްގެ ގޮތުގައި ކަމަށްވެސް ވިދާޅުވިއެވެ.
އޭނާ ވިދާޅުވީ ޖޭޕީކޯލިޝަންގެ ވެރިކަމެއްގައި ރާއްޖޭގެ ސަލާމަތީ ބާރުތައް ބާރުވެރި ކުރުމުގެ ގޮތުން މިލިޓަރީ އެއާޕޯޓަކާއި، މަތިންދާ ބޯޓާއި، ހެލިކޮޕްޓަރާއި، މަދުވެގެން 4 މަނަވަރު ޚިދުމަތަށް ނެރޭނެ ކަމަށެވެ. އަދި ސިފައިންނަށް ކަނޑާއި ވައިގެ މަރުކަޒެއްވެސް ހައްދަވައި ދެއްވާނެ ކަމަށެވެ.
މިހާރު އާދައިގެ ކުދިކަން ކަމުގައިވެސް ރާއްޖެއިން ބޭރުގެ އެހީ ހޯދަން ޖެހޭ ކަމަށް އޭނާ ވިދާޅުވިއެވެ. ނަމަވެސް އެފަދަ ބައެއް ފަހަރުތަކުގައި އެފަރާތް ތަކުން އެހީ ނުލިބޭ ކަމަށެވެ. އެހެން ކަމުން ރާއްޖޭގެ މަސްގަނޑުތައް ބެލެހެއްޓުމާއި ރާއްޖެއިން ކަނޑަށް ގެއްލޭ މީހުންނާއި، އުޅަނދު ފަހަރު ހޯދުމުގެ ގާބިލް ކަންވެސް ސިފައިންނަށް ހޯދައިދޭން ޖެހޭ ކަމަށް އޭނާ ވިދާޅުވިއެވެ. އެބޭފުޅުންގެ ވެރިކަމެއްގައި އެކަން ކޮށްދެއްވާނެ ކަމަށް އޭނާ ވިދާޅުވިއެވެ. އަދި ފުލުހުންގެ ތަރައްގީއާއި ކުރިއެރުމަށް ބޭނުންވާނެ ވަސީލަތްތައްވެސް ފޯރުކޮށްދޭނެ ކަމަށް އޭނާ ވިދާޅުވިއެވެ.
އަމީން ވިދާޅުވީ ޖޭޕީކޯލިޝަންގެ ވެރިކަމުގައި މަސްތުވާ ތަކެތިން ޒުވާނުން ދުރުކުރުމަށް ޚާއްސަ މަސައްކަތް ތަކެއް ކުރައްވާނެ ކަމަށެވެ. އަދި ޕެރޯލްގެ ނިޒާމް އިސްލާހުކޮށް ވަރުގަދަ ކުރާނެ ކަމަށެވެ. އަދި ރާއްޖޭގައި ހިންގާ މާރާމާރީއާއި، މީހުންމެރުމުގެ ޢަމަލުތައް ހުއްޓުވައި ރާއްޖޭގައި އަމާންކަން ގާއިމް ކޮށްދެއްވާނެ ކަމަށްވެސް އޭނާ ވިދާޅުވިއެވެ. އޭނާ ވިދާޅުވީ އެބޭފުޅުންގެ ވެރިކަމެއްގައި ދިވެހިންނަށް ރައްކާތެރިކަމާއި އަމާންކަން ހުރިހާ ގޮތަކުންވެސް ހޯއްދަވައި ދެއްވާނެ ކަމަށެވެ.
ރޭގެ ޖަލްސާގައި އިސްލާމިކް މިނިސްޓަރ ޑރ. ޝަހީމް ވިދާޅުވީ ޖުމްރީކޯލިޝަންގެ ވެރިކަމެއްގައި ކުއްލިޔާ އިސްލާމިކް ޔުނިވަރސިޓީއަކަށް ހައްދަވައި ދެއްވާނެ ކަމަށެވެ. އަދި ރާއްޖޭގައި ދީނީ ތަޢުލީމް ކިޔަވައި ދިނުމަށް ވަރަށް ބޮޑަށް މަސައްކަތް ކުރާނެ ކަމަށްވެސް އޭނާ ވިދާޅުވިއެވެ.
ކިޔުންތެރިންގެ ހިޔާލު