ދުބާއީއާއި ސިންގަޕޫރު ފެންވަރަށް މިގައުމު އުފުލާލެވޭނެ ތަޖުރިބާ އަޅުގަނޑުގެ އެބަހުރި: ގާސިމް

ސަރުކާރު ހިންގުން ރައްޔިތުން ހަވާލުކޮށްފި ކަމަށްވާނަމަ ދުބާއީ އާއި ސިންގަޕޫރުފަދަ ގައުމުތަކާ އެއްފެންވަރަށް ރާއްޖެ ތަރައްގީ ކޮށްދެއްވާނެ ކަމަށް ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހީމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މާދަމާ ރިޔާސީ އިންތިޚާބުގެ ވޯޓުލުން ބާއްވާތީ ކެންޕޭން ނިންމަވާލެއްވުމުގެ ގޮތުން ރައްޔިތުންނާ މުޚާތަބު ކުރައްވައި ދެއްކެވި ވާހަކަފުޅުގައެވެ. "ދިވެހިރައްޔިތުން ދިވެހި ސަރުކާރު ހިންގުން އަޅުގަނޑާ ހަވާލު ކުރައްވައިފިނަމަ (އިންޝާﷲ) ދުބާއީއާއި ސިންގަޕޫރުގެ ފެންވަރަށް މިގައުމު އުފުލާލެވޭނެ ތަޖުރިބާއާއި ވިސްނުން އަޅުގަނޑުގެ އެބަހުރި. އެކަމުގެ ފުރިހަމަ ޔަގީންކަން ދިވެހި ލޮބުވެތި ރައްޔިތުންނަށް އަޅުގަނޑު އަރުވަން،" ގާސިމް ވިދާޅުވިއެވެ.

އެމަނިކުފާނު ވިދާޅުވީ ރައްޔިތުން ވެރިކަން ހަވާލު ކޮށްފިކަމަށްވާނަމަ އެމަސްއޫލިއްޔަތު އަދާ ކުރައްވާނީ ރައްޔިތުން އެބައިވަންތަ ކޮށްގެން ކަމަށެވެ. އަދި ރައްޔިތުންގެ މެދުގައި ތަފާތެއް ނުކުރައްވާނެ ކަމަަށާއި އެންމެންނަށްވެސް އޯގާތެރިވެ ވަޑައިގަންނަވާނެ ކަމަށް އެމަނިކުފާނު ވިދާޅުވިއެވެ. "އަޅުގަނޑު ދިވެހިރާއްޖޭގެ ވެރިކަން ކުރާނީ ހުރިހާ ރައްޔިތުން އެއްބައިވަންތަ ކޮށްގެން. ހުރިހާ ރައްޔިތުންނަށް އޯގާތެރިވެގެން،" ގާސިމް ވިދާޅުވިއެވެ.

އެމަނިކުފާނުގެ ވެރިކަމެއްގައި ތަރައްގީގެ ކަންކަން ކުރައްވާނީ އެކަމެއް ކުރުމަށް އެންމެ އެކަށީގެންވާ އަމާނާތްތެރި ގާބިލް މީހުންނާ ހަވާލު ކޮށްގެން ކަމަށްވެސް ވިދާޅުވިއެވެ. އަދި އިސްލާމްދީނާއި ދިވެހިވަންތަކަން މަތީގައި ތިބެ މިގައުމު އާރާސްތު ކުރުމުގެ ހެޔޮ ވިސްނުން ކުރިއަށް ނެރެގެން ކަމަށްވެސް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ ދުނިޔޭގެ ފެންވަރުގެ ތައުލީމީ ނިޒާމަކާއި، ބޭސްފަރުވާއާއު، ޗުއްޓީ ހޭދަ ކުރުމަށް ބޭރު މީހުން އަަންނަ މަންޒިލަކަށް ރާއްޖެ ހައްދަވާނެ ކަމަށްވެސް ވިދާޅުވިއެވެ. "އިރާދަ ކުރެއްވިއްޔާ ދުނިޔޭގެ ނިސްބަތުގައިވެސް އެންމެ ފެންވަރު ރަނގަޅު ތައުލީމީ ނިޒާމެއް އޮތް، އެންމެ ގިނަބަޔަކު ބޭސްފަރުވާ އަށް ޗުއްޓީ ހޭދަކޮށްލަން އަންނަން ޝައުގުވެރިވާ" ގައުމުތަކުގެ ލިސްޓުން ރާއްޖެއަށް ޖާގަ ހޯއްދަވައި ދެއްވާނެ ކަމަށް ވިދާޅުވިއެވެ.

މީގެ އިތުރަށް ރާއްޖެއަކީ ވިޔަފާރީގެ "ކާރޫބާރޫ އެންމެ ބޮޑު، ދަތުރުފަތުރާއި، ދިރިއުޅުން އެންމެ ފަސޭހަ ތިޔާގި ކަމުގެ ފުރުސަތު އެންމެ ބޮޑު" އަދި އެންމެ އުފާފާގަތި އަމާންކަން ވަރަށް ބޮޑަށް ލިބިފައިވާ ގައުމަކަށް ހައްދަވައި ދެއްވާނެ ކަމަށްވެސް ވިދާޅުވިއެވެ.

"މިފުރުސަތުގައި މާތްﷲގެ ހަޒުރަތަށް ބިރުވެތިވެހުރެ މާތްﷲގެ ކީރިތި މޫރިތި ޒާތުފުޅުގަންދީ ހުވާކޮށް ދިވެހި ރައްޔިތުންނަށް އަޅުގަނޑު މިދަންނަވަނީ ނުހަނު އަމާނާތްތެރި ކަމާއެކު މިދިވެހިރާއްޖޭގެ ވެރިކަން އަޅުގަނޑު ކޮށްދޭނަން. ދައުލަތުގެ އެންމެ ފައިސާ ފޮއްޗަކަށްވެސް ޚިޔާނާތްތެރިއެއް ނުވާނަން. ސަރުކާރުގެ ތަނަވަސް ކަމުގައި އަޅުގަނޑުގެ އާއިލާއެއް ނުގެންގުޅޭނަން. ރައްޔިތުންގެ މެދުގައި ހަމަހަމަ ކުރާނަން. އަތޮޅުތަކާއި މާލޭގެ ފަރަގު ނައްތާލާނަން. ކޮންމެ ރައްޔިތަކަށްވެސް އުފާފާގަތިކަމާއި ކުރިއެރުމުގެ ފުރުސަތު މިގައުމުން ހޯދައިދޭނަން،" ގާސިމް ވިދާޅުވިއެވެ.

ގާސިމް ވިދާޅުވީ އެމަނިކުފާނުގެ ވެރިކަމެއްގައި ރާއްޖެ ތަރައްގީ ކުރާނީ "ދުވަހަކުވެސް މިރާއްޖެ ދެކެފައިނުވާ" ފެންވަރަށް ކަމަށެވެ. އެމަނިކުފާނު ރައްޔޮތުންގެ ކިބައިން އެދި ވަޑައިގެންނެވީ "މިގައުމުގެ ހައްގުގައި އަޅުގަނޑުގެ ހިތުގައި މިއޮތް ތެދުވެރި ޝުއޫރުތައް ދިވެހިރައްޔިތުން ގަބޫލުފުޅު ކުރެއްވުން" ކަމަށެވެ. އަދި ރައްޔިތުންނަށް ހެޔޮއެދޭ ވަފާތެރިއެއްގެ ގޮތުގައި އެމަނިކުފާނު ބަލައިގަތުމަށްވެސް ރައްޔިތުންގެ ކިބައިން ގާސިމް އެދިވަޑައިގެންނެވިއެވެ.