ރިޔާސީ ކެންޑިޑޭޓުންގެ ނަންބަރުތައް ތަރުތީބު ކޮށްފި

ސެޕްޓެމްބަރ މަހު 7 ވަނަ ދުވަހު ރާއްޖޭގައި ބާއްވާ ރިޔާސީ އިންތިޚާބަށް ކުރިމަތި ލައްވާފައިވާ 4 ކެންޑިޑޭޓުންގެ ކެންޑިޑޭޓް ނަންބަރުތައް މިއަދު ތަރުތީބު ކޮށްފިއެވެ.

އިލެކްޝަންސް ކޮމިޝަނުގައި މިއަދު މެންދުރު 1:00 ގައި ބޭއްވި ރަސްމިއްޔާތުގައި ގުރުއަތު ނަގާފައިވަނީ ކެންޑިޑޭޓުން އިންތިޚާބަށް ކުރިމަތިލި ތަރުތީބުންނެވެ.

މިއަދުގެ ގުރުއަތުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމް ހޮވިވަޑައިގެންނެވި ކެންޑިޑޭޓް ނަންބަރ އެކަކަށެވެ. ދެވަނަ ލިބި ވަޑައިގެންނެވީ ޑރ. "ޤައުމާއިގެން ކުރިއަށް" ކޯލިޝަންގެ ކެންޑިޑޭޓް ޑރ. މުޙައްމަދު ވަޙީދު ޙަސަނަށެވެ. ތިންވަނަ ލިބިވަޑައިގެންނެވީ ޕީޕީއެމްގެ ކެންޑިޑޭޓް ޢަބްދުﷲ ޔާމީނަށެވެ. ހަތަރުވަނަ ލިބިވަޑައިގެންނެވީ އެމްޑީޕީގެ ރިޔާސީ ކެންޑިޑޭޓް މުޙައްމަދު ނަޝީދަށެވެ.

މިގުރުއަތު ނެގުމުގައި ރައީސް ނަޝީދުގެ ފަރާތްޕުޅުން ބައިވެރިވެ ވަޑައިގެންނެވީ އެމަނިކުފާނުގެ އިލެކްޝަން އެޖެންޓް ޙަސަން ލަޠީފެވެ. މިހާރުގެ ރައީސް ޑރ. މުޙައްމަދު ވަޙީދު ޙަސަންގެ ފަރާތްޕުޅުން ބައިވެރިވެ ވަޑައިގެންނެވީ އެމަނިކުފާނުގެ އެޖެންޓް އަޙްމަދު ތައުފީޤެވެ. ޤާސިމާއި، ޔާމީންގެ ފަރާތްޕުޅުން ބައިވެރިވެ ވަޑައިގެންނެވީ ސިދާ އެދެބޭފުޅުންނެވެ.

ރައީސް ނަޝީދާއި، ޤާސިމް އިބްރާހީމް 2008 ވަނަ އަަހަރުގެ ރިޔާސީ އިންތިޚާބުގައިވެސް ލިބި ވަޑައިގެންނެވީ ހަމަ މިފަހަރުވެސް ލިބިވަޑައިގެންނެވި ނަންބަރެވެ.