ފޯމުތައް އިސްލާހުކޮށްފައި ހުށަހެޅުމުގެ ފުރުސަތު އިލެކްޝަނުން ދޭންޖެހޭނެ: ތަލާލް

ރަށްވެހިވެފައިވާ ރަށްނޫން އެހެން ރަށެއްގައި ވޯޓުލުމަށް ރެޖިސްޓްރީ ކުރުމަށް ޕީޕީއެމް އިން ހުށަހަޅާ ފޯމްތައް "ރިޖެކްޓް" ކުރުމުގެ ބަދަލުގައި އިސްލާހު ކޮށްގެން އަލުން ހުށަހަޅަން 15 މިނިޓް އިލެކްޝަންސް ކޮމިޝަނުން ދިނަސް އެކަން ކުރައްވާނެ ކަމަށް ޕީޕީއެމް-އެމްޑީ ކޯލިޝަނުން ބުނެފިއެވެ.

ނަސަންދުރާގައި މިއަދު ހަވީރު ނޫސްވެރިންނަށް މައުލޫމާތު ދެއްވަމުން ޕީޕީއެމްގެ ފަރާތުން އިލެކްޝަން ކަންކަމުގައި އިސްކޮށް އުޅުއްވާ ބޭފުޅެއް ކަމަށްވަ މުޙައްމަދު ތަލާލް ވިދާޅުވީ ޕީޕީއެމުން ހުށަހެޅި ބައެއް ފޯމުތައް އިލެކްޝަންސް ކޮމިޝަނުން ބަލައިގަނެފައި ނުވާ ކަމަށެވެ. އޭނާ ވިދާޅުވީ އެއްވެސް މައްސަލައެއް ހުރެގެން ބަލައިނުގަނަން ފޯމްތައް އިސްލާހު ކޮށް ދެވަނަ ފަހަރަށް ހުށަހެޅުމަށް 10 ނުވަތަ 15 ވަރަކަށް މިނިޓް އެކޮމިޝަނުން ދިނަސް އެކަން ކުރައްވާނެ ކަމަށެވެ. ނަމަވެސް ދެވަނަ ފަހަރަށް ހުށަހެޅުމުގެ ފުރުސަތު ދީފައިނުވާ ކަމަށް އޭނާ ވިދާޅުވިއެވެ.

ތަލާލް ވިދާޅުވީ ހުށަހަޅާ ފޯމުތައް އިލެކްޝަނުން ބެއްލެވުމަށްފަހު ވަގުތުން ޖަވާބު ދޭންޖެހޭނެ ކަމަށެވެ. އެނޫން ގޮތަކަށް ފޯމު ހުށަހަޅަން ދެން ބޭނުން ނުވާކަމަށެވެ. ފޯމުތަކުގައި މައްސަލަ ހުންނަކަން ފަހުން އަންގައި އަދި އިސްލާހު ކުރުމަށްފަހު ދެވަނަ ފަހަރަށް ހުށަހެޅުމުގެ ފުރުސަތު ނުދިނުމަކީ ބަލައިގަނެވޭނެ ކަމެއް ނޫން ކަމަށްވެސް ވިދާޅުވިއެވެ.

ތަލާލް ވިދާޅުވީ ފޯމްތައް އިސްލާހު ކުރުމަށްފަހު އަލުން ހުށަހެޅުމުގެ ފުރުސަތު އިލެކްޝަނުން ނުދިނީ ވަގުތުނެތުމުން ކަމަށް ބުނެ ކަމަށެވެ. އިލެކްޝަނުން މިގޮތަށް އަމަލު ކުރުމުން ވޯޓުލުމުގެ ހައްގު އެތައް ބަޔަކަށް ގެއްލިގެން ދާނެ ކަމަށްވެސް އޭނާ ވިދާޅުވި އެވެ.

އޭނާ ވިދާޅުވީ ރެޖިސްޓްރޭޝަން ފޯމުތައް ޕްރޮސެސް ނުވެ ލަސްވީ ޕީޕީއެމުން ފޯމުތައް ހުށަހެޅި ދުވަހު 7 ގަޑިއެއްހާއިރަށް އެމަސައްކަތް ހުއްޓާލުމުން ކަމަށް އިލެކްޝަނުން ތުހުމަތު ކޮށްފައިވާ ކަމަށެވެ. ނަމަވެސް އެފަހުން 7 ގަޑިއިރުގެ އިތުރަށް 48 ގަޑިއިރު ވެގެން ދިޔައިރުވެސް އިލެކްޝަނަށް އެކަން ކުރެވިފައި ނުވާކަމަށްވެސް ވިދާޅުވިއެވެ.

"ހަތް ގަޑިއިރު އިރުގެ މެދުކެނޑުމުގެ ސަބަބުން ފޯމުތައް ޕްރޮސެސް ނުވާކަމަށް ވާނަމަ މިހާރު އެކަން އޮންނަން ވާނީ ނިމިފައި. އަޅުގަނޑުމެން ދަންނަވާނީ މިހާރު އިރުކޮޅު ކޮޅަކާ މުއްދަތު އިތުރު އެ ކުރަނީ އެ މަސައްކަތް ނިންމުމުގެ ގާބިލްކަން އެ ކޮމިޝަނުގައި ނެތީމައޭ،" ތަލާލް ވިދާޅުވިއެވެ. މިބައްދަލުވުމުގައި ނޫސްވެރިންނަށް މައުލޫމާތު ދެއްވަމުން އެމްޑީއޭ ގެ ނާއިބު ލީޑަރު އަހުމަދު އާމިރު ވިދާޅުވީ ސްޕްރީމް ކޯޓުގެ ގައިޑުލައިނާ އެއްގޮތަށް ނޫން ގޮތަކަށް ނިންމާފައިވާ ވާޓާސް ލިސްޓެއްގައި އެކޯލިޝަނުން ސޮއި ކުރަން ފަސޭހައެއް ނުވާނެ ކަމަށެވެ. އެހެން ކަމުން ސްޕްރީމް ކޯޓުން އެބޭފުޅުންނަށް އިންޒާރު ދިނުމުގެ ބަދަލުގައި ސްޕްރީމްކޯޓުގެ ގައިޑުލައިނަށް އަމަލު ކުރެއްވުމަށް އިލެކްޝަނަށް އޭނާ ގޮވައި ލެއްވިއެވެ.