ގައިޑުލައިނާ ޚިލާފަށް އެކުލަވާލެވޭ ލިސްޓެއްގައި ސޮއިކުރެވެން ނޯންނާނެ:އާމިރު

އިންތިޚާބުގެ ކަންކަން ކުރިއަށް ގެންދިޔުމަށް ސްޕްރީމްކޯޓުން އިލެކްޝަންސް ކޮމިޝަނަށް ދީފައިވާ ގައިޑްލައިނާ ޚިލާފަށް އެކުލަވާލެވޭ ލިސްޓެއްގައި ސޮއިކުރެވެން ނޯންނާނެ ކަމަށް ޕީޕީއެމް-އެމްޑީއޭ ކޯލިޝަނުން ބުނެފިއެވެ.

މިއަދު ހަވީރު ނަސަންދުރާގައި ނޫސްވެރިންނަށް މައުލޫމާތު ދެއްވަމުން އެމްޑީއޭގެ ނާއިބް ލީޑަރު އަދި ކުޑަހުވަދޫ ދާއިރާގެ މެންބަރު އަހުމަދު އާމިރު ވިދާޅުވީ ނަވާރަވަނަ ދުވަހު އިންތިޚާބެއް ބޭއްވުމަށްޓަކައި ސްޕްރީމްކޯޓުން ދީފައިވާ ގައިޑުލައިނާ އެއްގޮތްވާ ގޮތުގެ މަތިން އެކޯލިޝަނުންވެސް ގެންދަވަނީ މަސައްކަތް ކުރަމުން ކަމަށެވެ.

"ވަރަށް ހިތާމައާއެކު ދަންނަވަމޭ އިލެކްޝަންސް ކޮމިޝަންގެ ބޭފުޅުންނަށްވެސް، އެގައިޑުލައިނާ ޚިލާފުވާ ގޮތަށް އެކުލަވާލެވޭ ލިސްޓެއްގައި އަޅުގަނޑުމެންނަކަށެއް ސޮއިކުރެވޭ ކަށެއް ނޯންނާނެ. އަޅުގަނޑުމެންނަށް ސައްހަކަން ކަށަވަރު ކުރެވޭ ލިސްޓެއްގައޭ އަޅުގަނޑުމެންނަށް ސޮއިކުރެވޭނީ. އެނޫންލިސްޓެއްގައި ސޮއިކުރެވިގެން އަޅުގަނޑުމެންގެ ބައިވެރިވުން އޭގެތެރެއަކު ނޯންނާނެ ވާހަކަ މިދަންނަވަނީ،" އޭނާ ވިދާޅުވިއެވެ.

އާމިރު ވިދާޅުވީ ޕީޕީއެމް-އެމްޑީއޭ ކޯލިޝަނަށް ގަބޫލު ކުރެވޭ ފެންވަރަށް ވޯޓުލާ މީހުންގެ ލިސްޓްގެ ކަންކަން އިލެކްޝަނުން ހަމަޖައްސަވައި ދެއްވަން ޖެހޭނެ ކަމަކަށެވެ. އެނޫން ގޮތަކަށް އޮންނަ ލިސްޓެއްގައި ސޮއި ކުރެވެން ނޯންނާނެ ކަމަށްވެސް ވިދާޅުވިއެވެ. އޭނާ ވިދާޅުވީ ރައްޔިތުންގެ ހައްގަށް އެއްވެސް އުނިކަމެއް އަންނަ ގޮތަށް އެލިސްޓްގައި ސޮއި ނުކުރައްވާނެ ކަމަށެވެ.

"އެންމެ ބޮޑު ގުރުބާނީއެއް ރައްޔިތުންނަށްޓަކައި ވެފައި މިއޮތީ އަޅުގަނޑުމެންގެ ކެންޑިޑޭޓް. ދެވަނަ ބުރަށް ކަށަވަރުވެފައި އޮއްވައި ރައްޔިތުންގެ އެތައް ބައެއްގެ ހައްގުތައް ގެއްލިފައިވާތީ އެހައްގުތައް ހިމާޔަތް ކުރުމުގެ ގޮތުން އެކަން (ދެވަނަ ބުރަށް ހޮވިފައިވާކަން) ހަނދަން ނައްތާލާފައި" ސްޕްރީމްކޯޓުގެ ގައިޑުލައިނާ އެއްގޮތަށް އެބޭފުޅުންވެސް ގެންދަވަނީ މަސައްކަތް ކުރައްވަމުން ކަމަށް ވިދާޅުވިއެވެ.

ޕީޕީއެމް-އެމްޑީއޭ ކޯލިޝަންގެ ބޭނުމަކީ ރައްޔިތުންނަށް ހެޔޮވެރިކަމެއް ހޯއްދަވައި ދެއްވުން ކަމަށްވެސް އޭނާ ވިދާޅުވިއެވެ. އެކަން ރައްޔިތުން ގަބޫލު ކުރަންޖެހޭނެ ކަމަށްވެސް އާމިރު ވިދާޅުވިއެވެ.