އެމެރިކާގެ ޖަލެއްގެ ފަހާނާ ހޮޅިތެރެއިން ކުށްވެރިންތަކެއް ފިލައިފި

އެމެރިކާގެ ޖަލެއްގެ ފާހާނާ ހޮޅި ތެރެއިން ހަތަރު ކުށްވެރިއަކު ފިލައިފިއެވެ.

ކައްޑޯ ކައުންޓީ ޑިޓެންޝަން ސެންޓަރުން ހަތަރު ކުށްވެރިއަކު ފިލާފައިވަނީ ފެންވަރާތަނުގައި ހުރި ފާހާނާ ބޮޑު ހޮޅިއެއްގެ ތެރެއިން ކަމަށް ކައްޑޯ ކައުންޓީގެ ޝެރިފް ޖީން ކެއިން ހާމަކުރިއެވެ.

"ފާހާނާ ހޮޅިތެރެއިން ލާފަ ޖަލުގެ ބޭރުގައި ހުރި ފާރެއް ތަޅާލާފައި އެތާހުރި ތަނަކަށް ވަދެ އެތަނުގެ ދޮރުން ނިކުމެގެން ދިޔައީ،" އޭނާ އިތުރަށް ކިޔައިދިނެވެ.

ޖަލު ބަލަހައްޓާ އޮފިސަރުންނަށް ކުށްވެރިން ފިލާފައިވާކަން އެނގުނީ އާދީއްތަ ދުވަހު 2:40 ވީއިރު ކުށްވެރިން ކަމަށް ޝައްކުކުރެވޭ ހަތަރު މީހަކު އޮރެންޖް ސޫޓުތަކެއް ލައިގެން ޖަލު ކައިރި މަގަކުން ފެނުނުކަމަށް ރިޕޯޓެއް ލިބުމާ ގުޅިގެންނެވެ.

ޖަލުން ފިލާފައިވަނީ ޑިލަން ރޭ ތްރީ އަޔަންސް 21 އަހަރު، ޕްރައިމް ޓައުންވިން ބްރައުން 23 އަހަރު، އެންތަނީ ޖޭމްސް މެންޑޮންކާ 24 އަދި ޓްރިސްޓަން ޗީޑްލް 32 އެކެވެ.މިހަތަރު މީހުން ލައިގެން ހުރި އޮރެންޖް ކުލައިގެ ޖަލު ހެދުން މަގު މަތިން ފެނިފައިވާކަމަށް ރިޕޯޓްތައް ބުނެއެވެ.

އޮކްލަހޯމާ ޑިޕާޓްމެންޓް އޮފް ކަރެކްޝަނުގެ ރިކޯޑްތައް ބުނާގޮތުން ޗީޑަލްއަކީ ވައްކަމުގެ މައްސަލައެއްގައާއި ހަތިޔާރު ގެންގުޅުމުގެ ކުށުގައި ހައްޔަރުކުރެވިފައިވާ މީހެކެވެ. އަދި އަނެއް ތިން މީހުންނަކީވެސް މިފަދަ މައްސަލަތަކުގައި ޙުކުމް ކުރެވިފައިވާ މީހުންނެވެ.

މިހަތަރު ކުށްވެރިން ހޯދުމަށް ފުލުހުން ވަނީ އެލަރޓް އަޅުވާފައެވެ.