ދިއްދޫ ސަމީރު ޖޭޕީއަށް މިއަދު ސޮއިކުރައްވައިފި
28 ޖެނުއަރީ 2014 19:06
ރައްޔިތުންގެ މަޖިލީހުގެ ދިއްދޫދާއިރާގެ މެންބަރު އަޙްމަދު ސަމީރު، ޖުމްހޫރީޕާޓީ (ޖޭޕީ) އަށް މިއަދު ސޮއިކުރައްވައިފިއެވެ.
އޭނާ ޖޭޕީއަށް ސޮއިކުރެއްވީ މިއަދު ހެނދުނު އޭނާގެ އޮފީހުގައެވެ. ސަމީރު ޖުމްހޫރީޕާޓީއަށް ސޮއިކުރެއްވުމުން ޖޭޕީންވަނީ އެޕާޓީގެ ފަރާތުން ދިއްދޫދާއިރާއަށް ވާދަކުރުމުގެ ޓިކެޓް އޭނާއަށް ދީފައެވެ. މީގެ ކުރިންވެސް ސަމީރުވަނީ ޖުމްހޫރީޕާޓީގައި މަސައްކަތް ކޮށްފައެވެ.
ސަމީރަކީ 2009 ވަނަ އަހަރުން ފެށިގެން އެމްޑީގެ މެންބަރެކެވެ. ފާއިތުވު 5 އަހަރު އޭނާވަނީ އެމްޑީޕީގެ މެންބަރެއްގެ ގޮތުގައި ދިއްދޫދާއިރާގެ މެންބަރުކަން ކުރައްވާފައެވެ. މިހާރުވެސް އޭނާއަކީ އެދާއިރާގެ މެންބަރެވެ.
މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ފަރާތުން ދިއްދޫ ދާއިރާގެ ޓިކެޓް ހޯދުމަށްޓަކައި އޭނާވަނީ ޕްރައިމަރީގައި ވާދަކުރައްވާފައެވެ. ނަމަވެސް ބައެއް މީހުން ޒާތީވެ އެންޑިކެންޕޭން ކުރާ ކަމަށް ވިދާޅުވެ ސަމީރުވަނީ ނަން އަނބުރާ ނަންގަވައިފަ އެވެ.
ޖުމްހޫރީޕާޓީއަށް ސޮއިކުރެއްވުމަށްފަހު އޭނާ ވިދާޅުވެފައިވަނީ ކުރިއަށްއޮތް ފަސްއަހަރު ޕާޓީބަދަލު ނުކުރައްވާނެ ކަމަށެވެ. އަދި އެފަސްއަހަރު އެޕާޓީއަށް ޚިދުމަތް ކޮށްދެއްވާނެ ކަމަށެވެ.
ކިޔުންތެރިންގެ ހިޔާލު