ތަހުގީގަށް ގެންނަ މީހުންގެ ހައްގުތަކަށް ރައްކާތެރިވުމަށް ޕޮލިސްކޮމިޝަނަރު އެދިވަޑައިގެންފި

ފުލުހުނަށް ހުށަހަޅާ މައްސަލަތަކުގެ ތަހުގީގަށް ގެންނަ މީހުންގެ ހައްގުތަކާއި، އިންސާނީ ކަރާމާތަށް އުނިކަން ނާންނެހެން މަސައްކަތްކޮށް ދެއްވުމަށް ކޮމިޝަނަރ އޮފް ޕޮލިސް ހުސައިން ވަހީދު ފުލުހުންގެ ކިބައިން އެދިވަޑައިގެންފިއެވެ.

އެމަނިކުފާނު މިކަމަށް އެދިވަޑައިގެންނެވީ ފުލުހުންގެ މުއައްސަސާގެ، ކްރިމިނަލް އިންވެސްޓިގޭޝަން ޑިޕާޓްމަންޓްގައި މަސައްކަތްކުރާ މުވައްޒަފުންނާ ބައްދަލުކުރައްވައި ވާހަކަ ދައްކަވަމުންނެވެ.

އިސްކަންދަރު ބިލްޑިންގގައި ރޭ އެ ޑިޕާޓްމަންޓްގެ މުވައްޒުންނާ ބައްދަލުކުރައްވައި ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވީ ފުލުހުން ތަހުގީގުކުރާ މައްސަލަތައް ސާބިތުކުރެވޭ ވަރުގެ ހެއްކާއެކު ނިންމައި ދައުވާކުރުމަށް ފޮނުވުމަށް މަސައްކަތްކުރުމަށް ފުލުހުން ވަރަށް ބުރަ މަސައްކަތްތަކެއް ކުރައްވާކަން ގަބޫލުފުޅު ކުރައްވާ ކަމަށެވެ.

އެމަނިކުފާނު ވިދާޅުވީ އެމަސައްކަތްތަކަށް މިހާރަށްވުރެވެސް އިސްކަމެއް ދެއްވައި ފަރުވާތެރިކަމާއެކު އެ މައްސަލައެއްގެ އެންމެ ފުނަށް ފީނައި ލިބެންހުރި ހުރިހާ ހެއްކަކާއި ޤަރީނާއެއް ހޯދުމަށް މަސައްކަތްކުރަންޖެހޭ ކަމަށެވެ. މީގެ އިތުރަށް ފުލުހުންނަށް ހުށަހަޅާ މައްސަލަތައް އަވަހަށް ނިންމުމަށް މަސައްކަތްކޮށް ދެއްވުމަށްވެސް އެދިވަޑައިގެންނެވިއެވެ.

ތަހުގީގުތަކަށް ގެނެވޭ މީހުންނާ ރީތިބަހުން ވާހަކަ ދެއްކުމަށްވެސް ވަހީދު ފުލުހުންގެ ކިބައިން އެދިވަޑައިގެންނެވިއެވެ. އަދި އިންސާނީ ކާރާމާތަށް އުނިކަން ނާންނާނެ ގޮތަށް މުއާމަލާތްކުރުމަށްވެސް އެދިވަޑައިގެންނެވިއެވެ. އަދި ހުށަހަޅާ މައްސަލަތަކަށް ވާނުވާ އެފަރާތްތަކަށް އެންގުމަށްވެސް ކޮމިޝަނަރު އެދިވަޑައިގެންނެވިއެވެ.

ފުލުހުންނަށް ހުށަހެޅޭ މައްސަލަތައް ތަހުގީގު ކުރަމުންދާއިރު އެއްވެސް ފަރާތަކަށް ބެލުމެއްނެތި ހަމަހަމަކަމާއި ތެދުވެރިކަމާއެކު މައްސަލަތައް ބެލުމަށްވެސް އެމަނިކުފާނު އެދިވަޑައިގެންނެވިއެވެ. އަދި އެއްވެސް ފުލުހަކު ކޮރަޕްޝަނަށް މަގުފަހިވާ އެއްވެސް އަމަލެއް ނުކުރުމަށްވެސް އިލްތިމާސް ކުރެއްވިއެވެ.

ފުލުހުންނަށް ހުށަހަޅާ މައްސަލަތައް ތަހުގީގުކުރުމުގައި ފުލުހުން ކުރާ މަސައްކަތަކީ ފާހަގަކޮށްލެވޭ މަސައްކަތަކެއް ކަމަށްވެސް ވަހީދު ވިދާޅުވިއެވެ.