މަސްތުވާތަކެތި އެތެރެކުރާ މީހުންގެ ގިރުވާނުގައި ހިފަހައްޓާލެވޭ ވަރަށް އަތްދިގުކޮށްލާނަން: ސީޕީ ވަހީދު

ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔާފާރިކުރާ ފަރާތްތަކުގެ ގިރުވާނުގައި ހިފަހައްޓާލާ ވަރަށް ފުލުހުންގެ އަތް ދިގުކޮށްލާނެ ކަމަށް ކޮމިޝަނަރ އޮފް ޕޮލިސް (ސީޕީ) ޙުސައިން ވަޙީދު ވިދާޅުވެއެއްޖެއެވެ.

ކޮމިޝަނަރ އޮފް ޕޮލިސް މިގޮތަށް ވިދާޅުވީ ސައުތު ޕޮލިސް ޑިވިޜަނަށް ކުރެއްވި ދަތުރުފުޅުގައި ފުވައްމުލަކު ޕޮލިސް ސްޓޭޝަނުގެ މުވައްޒަފުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ސީޕީ ވިދާޅުވީ ރާއްޖެއަށް ދިމާވެފައިވާ އެންމެ ބޮޑު މައްސަލައަކީ މަސްތުވާތަކެތީގެ ވަބާ ކަމަށެވެ. އެހެނިހެން ކުށްތައް ކުރުމުގެ އަސްލަކަށް ވެފައިވަނީ މަސްތުވާތަކެތީގެ މައްސަލަ ކަމަށް އެމަނިކުފާނު ވިދާޅުވިއެވެ. އެގޮތުން ފުވައްމުލަކުގައިވެސް ހުރިހާ މައްސަލަތަކެއްގެ އަސްލަކީ މަސްތުވާތަކެތީގެ މައްސަލަތައްކަމުން މި މިޖުތަމަޢު ކުށްކުރާ ފަރާތްތަކުގެ ކިބައިން ސަލާމަތްކުރުމަށްޓަކައި ރަގަޅުން ކުރަންޖެހޭ އެތައްކަމެއް ހުރިކަމަށް ވިދާޅުވިއެވެ. އެކަންތައްތައް ހައްލުކުރުމަށްޓަކައިވެސް ފުލުހުން ވަރަށް އަވަހަށް މަސައްކަތް ފަށައިގަންނާނެކަމަށް ވެސް ވިދާޅުވިއެވެ.

ކޮމިޝަނަރ އޮފް ޕޮލިސް ވިދާޅުވީ މަސްތުވާތަކެތި އެތެރެކޮށް އެތަކެތީގެ ވިޔަފާރިކުރާ ފަރާތްތައް އަތުލައިގަނެ އެމީހުންގެ މައްޗަށް ކޯޓުގައި މައްސަލަތައް ސާބިތު ކުރުމަށް ބޭނުންވާ ވަރަށް ހެކި ހޯދުމަށްޓަކައި ފުލުހުންގެ މަސައްކަތްތައް ތަރުތީބު ކުރައްވާނެ ކަމަށެވެ.

މަސްތުވާތަކެތި އެތެރެކޮށް އެތަކެތީގެ ވިޔާފާރިކޮށް ޒުވާން ކުދިން މި ވަބާގައި ޖެއްސުމަށް މަސައްކަތްކުރާ ފަރާތްތަކުން އެމަސައްކަތް ހުއްޓާލުމަށްވެސް ސީޕީ ގޮވާލައްވާފައެވެ.

މަސްތުވާތަކެއްޗާއި ދެކޮޅަށް މިނިސްޓަރ އޮފް ހޯމް އެފެއާޒް ޚާއްޞަ މަސައްކަތްޕުޅުތަކެއް ފައްޓަވާފައިވާކަން ފާހަގަކުރައްވައި ކޮމިޝަނަރ އޮފް ޕޮލިސް ވިދާޅުވީ މަސްތުވާތަކެތީގެ ވަބާއިން މި ރާއްޖެ ސަލާމަތްކުރުމަށްޓަކައި ސިއްރާއި ފާޅުގައި ފުލުހުންގެ މަސައްކަތްތައް ވަރަށް ބާރަށް ގެންދަވާނެ ކަމަށެވެ. މިކަމަށްޓަކައި ހުރިހާ ފުލުހުން ކަމަރު ބަނދެގެން ތިބިކަމަށްވެސް ކޮމިޝަނަރ އޮފް ޕޮލިސް ވިދާޅުވިއެވެ.