ވަހީދު މަރާލި މީހުން ހޯދުމަށް އާންމުގެ އެހީތެރިކަމަށް ފުލުހުން އެދިއްޖެ
25 ޑިސެމްބަރ 2013 16:25
މާލޭގައި އާދީއްތަ ދުވަހުގެރޭ ހިނގި މާރާމާރީއެއްގައި ދެޒުވާނުންނަށް ވަޅިން ހަމަލާދީ އެކަކު މަރާލައިފައިވާތީ އެކަން ކުރި މީހުން ހޯދުމަށް ފުލުހުން ކުރަމުންދާ މަސައްކަތުގައި އާންމުގެ އެހީތެރިކަން ބޭނުންވާ ކަމަށް ފުލުހުން ބުނެފިއެވެ.
ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގެ ޑެޕިއުޓީ ހެޑް އިންސްޕެކްޓަރ އޮފް ޕޮލިސް އަޒީމް ވަހީދު ވިދާޅުވީ، މއ. އާއިޝާ، ހުސައިން ވަހީދު މަރާލި މީހުންނާ ބެހޭ މައުލޫމާތު އެނގޭ މީހަކު ވާކަމަށްވާނަމަ އެ މައުލޫމާތު ފުލުހުންނާ ޙިއްސާ ކުރެއް ވުމަށެވެ.
މިގޮތަށް ހިއްސާ ކުރައްވާ މައުލޫމާތު ސިއްރު ކުރައްވާނެ ކަމަށްވެސް އޭނާ ވިދާޅުވެފައިވެއެވެ. އެމައުލޫމާތު ދޭ މީހުންނަށް ލިބިދޭންޖެހޭ ރައްކާތެރިކަން ފުލުހުން ދެއްވާނެ ކަމަށްވެސް އޭނާ ވިދާޅުވިއެވެ.
މިމައްސަލައާ ގުޅޭ އެއްވެސް މައުލޫމާތެއް ލިބިލައްވާފައިވާ ބޭފުޅަކުނަމަ ފުލުހުންނާ ހިލޭ ގުޅޭ ނަމްބަރު 119 ނޫންނަމަ 3322111 ނުވަތަ 9911099 ށް ގުޅުއްވައި އެމަޢުލޫމާތު ޙިއްސާ ކުރެއްވުމަށްވެސް ޢަޒީމް އެދިވަޑައިގެންނެވިއެވެ.
މަރުގެ ހާދިސާއެއް މާލޭހައި ހިނގާފައި މިވަނީ މިފަދަ ކަމެއް ނުހިނގާތާ އަހަރަކަށްވުރެ ގިނަވެފައި ވަނިކޮށްނެވެ. މިފަދަ ބޮޑެތި ކުށްކުރާ މީހުންނާ މެދު ހަރުކަށި ފިޔަވަޅު އަޅުއްވާނެ ކަމަށް ހޯމްމިނިސްޓަރ އުމަރު ނަސީރު ވަނީ ވިދާޅުވެފައެވެ.
ވަހީދުގެ މަރާގުޅިގެން ފުލުހުންވަނީ 26 އަހަރުގެ މީހަކު ފުލުހުންގެ ބެލުމުގެ ދަށަށް މިއަދު ގެނެސްފައެވެ.
ކިޔުންތެރިންގެ ހިޔާލު