ކުރީގެ ސަރުކާރުގެ ބޭފުޅުން ކޮށްފައިވާ ކުށްތައް ބެލުމުގެ މަސައްކަތް ނުކުރާނަން: ރައީސް
25 ނޮވެމްބަރ 2013 2:50
ރައީސް ނަޝީދުގެ ސަރުކާރުގެ ބޭފުޅުން ކޮށްފައިވާ ކުށްތައް ނުވަތަ ތުހުމަތު ކުރެވޭ ކުށްތައް ބެލުމަށް މިހާރުގެ ސަރުކާރުން އެއްވެސް ވަރަކަށް މަސައްކަތް ނުކުރައްވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޕްރޮގްރެސިވް ކޯލިޝަނުން ރޭ ބޭއްވި "ޝުކުރިއްޔާ ގައުމު" ގެ ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ އެފަދަ ކުށްތަކާއި ތުހުމަތުގެ މައްސަލަތައް ބައްލަވާނީ އެކަމަށް ޚާއްސަ މުއައްސަސާތަކުން ކަމަށެވެ. "އޮޑިޓަ ޖެނެރަލެއް އެބަ ހުންނެވި. އޭސީސީ އެއް މިތާ އެބައޮތް. އަދި ޝަރުއީ ނިޒާމަކީ އިރާދަކުރެއްވިޔާ ދިވެހިރާއްޖޭގައި އަޅުގަނޑުމެންގެ އިތުބާރު އޮތް ޝަރުއީ ނިޒާމެއް. އެއީކީ ރައީސުލްޖުމްހޫރިއްޔާ ބެހެން ޖެހޭ ކަމެއް ކަމަކަށް އަޅުގަނޑުމެންނެއް، އަޅުގަނޑުމެންގެ ޕާޓީއަކުން ނުދެކެމު. އަޅުގަނޑުމެން ބޭނުންވަނީ މިހުރިހާ ކަމަކުން ދިވެހިރައްޔިތުންނަށް ހަމަޖެހުން އައުން. ހަމަޖެހުން އައިސްގެން ނޫނިއްޔަކާ މިދެންނެވި ގޮތަށް ރައްޔިތުންގެ އިތުބާރު ހޯދާކަށް ރައްޔިތުންނަށް ޝުކުރު ދަންނަވާކަށް އަޅުގަނޑުމެންގެ ސަރުކާރަކަށް ފުރުސަތެއް ނުލިބޭނެ،" ރައީސް ޔާމީން ވިދާޅުވިއެވެ.
ރައީސް ވިދާޅުވީ ޕްރޮގްރެސިވް ކޯލިޝަނުން ވެރިކަމަށް އައީ ރައްޔިތުންނަށް ވަރަށް ބޮޑު އުންމީދުތަކެއް ދެމުން ކަމަށެވެ. އެ އުންމީދުތައް ފުރިހަމަ ކުރުމަށް ރައްޔިތުންނަށްޓަކައި ކުރަންޖެހޭ ވަރަށްގިނަ ކަންކަން އެބަހުރި ކަމަށެވެ. އެމަނިކުފާނުގެ ސަރުކާރުން ގެންދަނީ އެކަންކަން ކުރައްވަމުން ކަމަށްވެސް ވިދާޅުވިއެވެ. އެމަނިކުފާނު ވިދާޅުވީ ރައްޔިތުން އެންމެ ބޮޑަށް ބޭނުންވަނީ ރާއްޖެއަށް ހަމަޖެހުން އައިސް ސުލްހަވެރި ކަމާއެކު އުޅެވޭނެގޮތް ވުން ކަމަށެވެ. އެމަނިކުފާނުގެ ސަރުކާރަށް ހަފްތާއެއްހާ ދުވަސްވެގެން ދިޔައިރު އެކަން ރައްޔިތުންނަށް ފެންނާނެ ކަމަށް ވިދާޅުވިއެވެ. މިސަރުކާރުން މަސައްކަތް ކުރައްވަމުން ގެންދަވަނީ އެންމެން ގުޅިގެން އެކުވެރި ކަމާއެކުގައި ކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ކެބިނެޓް އެކުލަވާލައްވާފައިވަނީ މިވަގުތަށް ރާއްޖެއިން ލިބެންތިބި އެންމެ ތަޖުރިބާކާރު ގާބިލް ބޭފުޅުން ކަމަށް ގަބޫލު ކުރައްވާ ކަމަށެވެ. އެމަނިކުފާނު އުންމީދު ކުރައްވަނީ ކެބިނެޓް ވަޒީރުންގެ މަސައްކަތުން ޕާޓީތަކުގެ މެނިފެސްޓޯތައް ތަންފީޒުވުން ކަމަށްވެސް ވިދާޅުވިއެވެ.
ރައިސް ޔާމީން ވިދާޅުވީ އެމަނިކުފާނުގެ ސަރުކާރަށް ވަގުތެއްނެތް ކަމަށެވެ. އެހެން ކަމުން ރާއްޖެއަށް ބޭރުގެ އިންވެސްޓްމަންޓްތައް ގެނެސް ތަރައްގީގެ މަރުހަލާގައި އިތުރަށް ކުރިއަށް ދިޔުމަށް ސަރުކާރުން މަސައްކަތް ފަށްޓަވައިފި ކަމަށެވެ.
ޒުވާނުންނަށް ޝުކުރުވެރި ވާކަން ހާމަކުރެއްވުމުގެ ގޮތުން އަންނަ އަހަރުގެ ބަޖެޓުގައި ޒުވާނުންނަށް ޚާއްސަކޮށްގެން 300 މިލިއަން ރުފިޔާ މިހާރު ހިމަނާފައިވާނެ ކަމަށެވެ. އަދި ހާލުގައި އުޅޭ އަންހެނުންނަށް ޚާއްސަކޮށްގެން ބަޖެޓުގައި ފައިސާ ހިމަނާފައިވާނެ ކަމަށްވެސް ވިދާޅުވިއެވެ. އެހެން ކަމުން ސަރުކާރަށް ވަގުތު ދެއްވުމަށް އެމަނިކުފާނު އެދިވަޑައިގެންނެވިއެވެ. ރައްޔިތުންނަށްޓަކައި ކަންކަން ކޮށްދެވޭނީ ވަގުތު ދެއްވައިގެން ކަމަށެވެ. ވަގުތާއި ފުރުސަތު ދީފިކަމަށްވާނަމަ ރައްޔިތުންނަށް ބޭނުންވާ ކަންކަން ކުރެއްވުމަށް ސާބިތުކަމާ އެކު މަސައްކަތް ކުރައްވާނެ ކަމަށްވެސް ވިދާޅުވިއެވެ.
އެމަނިކުފާނު ވިދާޅުވީ މިސަރުކާރުން އެއްވެސް މައްސަލައެއް ވަކިގޮތަކަށް ނިންމަން ބާރުނާޅާނެ ކަމަށެވެ. އެކަމަކު މައްސަލަތައް ލަސްވެގެން ނުވާނެ ކަމަށް ވިދާޅުވިއެވެ. މިއަދަކީ ރައްޔިތުންގެ މަޖިލީހުގައި ޕީޖީގެ މައްޗަށް އިތުބާރުނެތް ކަމަށް ވޯޓެއް ނަގާދުވަސް ކަމަށްވެސް ވިދާޅުވިއެވެ. އެފަދަ ބާރު މަޖިލިހަށް ލިބިގެންވާ ކަމަށެވެ. އެކަމަށް އެއްޗެއް ވިދާޅުވާން ބޭނުން ނުވާކަމަށްވެސް ވިދާޅުވިއެވެ. ނަމަވެސް ރައްޔިތުންގެ މަޖިލީހާއި، އެހެން މުއައްސަސާތައް ހަރުދަނާ ވާންޖެހޭ ކަމަށެވެ.
ރައްޔިތުންނަށް ޚިދުމަތް ކުރުމުގެ ފުރުސަތު އެމްޑީޕީން ސަރުކާރަށް ދެއްވުމަށް ރައީސް އެދިވަޑައިގެންނެވިއެވެ. އެމްޑީޕީ ސަރުކާރުގައި އޮންނަދުވަހު އިދިކޮޅު ޕާޓީއެއްގެ ގޮތުގައި އެމްޑީޕިއަށް އެފުރުސަތު ދެއްވާނެ ކަމަށްވެސް ވިދާޅުވިއެވެ. ޚިދުމަތްތެރި ސަރުކާރަކީ ރައްޔިތުން ކަމަށްވެސް ވިދާޅުވިއެވެ.
ސަރުކާރުން ރައްޔިތުންނަށް ޚިދުމަތްކޮށްދޭން ބޭނުންވިޔަސް ކައުންސިލަރުން އެކަމަށް ހުރަސް އަޅާ ކަމަށްވާނަމަ އެޚިދުމަތް ދިނުމަށް ދަތިވާނެ ކަމަށް ގަބޫލުކުރަން ޖެހޭނެ ކަމަށް އެމަނިކުފާނު ވިދާޅުވިއެވެ. ކުރިއަށްއޮތް ލޯކަލް ކައުންސިލާއި، ރައްޔިތުންގެ މަޖިލީހުގެ އިންތިޚާބުގައި ކޯލިޝަން ސަރުކާރުގައި އާއެކޭ ބުނަން ޖެހޭ ކަމަށްވެސް އެމަނިކުފާނު ވިދާޅުވިއެވެ. ރައްޔިތުންގެ މަޖިލީހުގެ 85 ގޮނޑިއަށް ކޯލީޝަނުން ކުރިމަތިލާނެ ކަމަށްވެސް ވިދާޅުވިއެވެ. އެމަނިކުފާނު ވިދާޅުވީ ޚިޔާލު ތަފާތުވުން ދޫކޮށްލާފައި އެކުވެރިކަމާއެކު ކުރިއަށް ދިޔުމަށް އެމަނިކުފާނު އެދިވަޑައިގެންނެވިއެވެ. އެމަނިކުފާނުގެ ސަރުކާރު އައީ ރައްޔިތުންނަށް ޚިދުމަތް ކޮށްދެއްވަން ކަމަށްވެސް ވިދާޅުވިއެވެ.
ކިޔުންތެރިންގެ ހިޔާލު