ރައްޔިތުން އެދޭކަންކަމުގައި އަޅުގަނޑުމެން ފެއިލްވުމެއްނެތް: ރައީސް ޔާމީން

ރައްޔިތުންގެ ބޮޑު ތާއީދަކާއެކު ރައްޔިތުންގެ ކަންކަން ނިންމުމުގެ ފުރްޞަތު މިހާރުގެ ސަރުކާރާ ޙަވާލުކުރައްވާފައިވަނީ ރައްޔިތުން ގިނަ ކަންތައްތަކެއް "އަޅުގަނޑުމެންގެ ފަރާތުން އެދިވަޑައިގަންނަވާތީ، އިންތިޒާރު ކުރައްވާތީ، ޤަބޫލު ކުރައްވާތީ،" ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް މިއަދު ވިދާޅުވެއްޖެއެވެ.

ވަޒީރުންގެ މަޖިލީހަށް ތިން ބޭފުޅަކު އައްޔަން ކުރެއްވުމަށްފަހު އެބޭފުޅުންނާ ވާހަކަ ދައްކަވަމުން ރައީސް ވިދާޅުވީ ރައްޔިތުން އެދިފައިވާ ކަންކަމަށް ފަސްޖެހިގެން ނުވާނެ ކަމަށެވެ. އަދި "މިކަމުގައި އަޅުގަނޑުމެން ފެއިލްވުމެއް ނެތް. އެހެންވީމާ، އަޅުގަނޑު ކަށަވަރު ކުރަނީ، އަޅުގަނޑުގެ ކެބިނެޓްގައި ހިމެނިވަޑައިގަންނަވާ ހުރިހާ ބޭފުޅުންނަކީވެސް އެކިއެކި ޕާޓީން ވަޑައިގެން ތިއްބެވި ބޭފުޅުން ކަމަށްވީނަމަވެސް، އެއްކަމަކީ އަޅުގަނޑުމެން އެއްބަސްވާނެ އެއްކަމަކީ، ރައްޔިތުން މިއެދޭ ޚިދުމަތްތައް، ރައްޔިތުންނަށް ފޯރުކޮށްދިނުން،" ރައީސް ވިދާޅުވިއެވެ.

ރައީސް ވިދާޅުވީ ރާއްޖޭގެ ހާލަތު މިހާރު އޮތް ގޮތުން ހުރިހާ ދިމާއަކުންވެސް ރާއްޖެއަށްވަނީ ތަރައްޤީ ބޭނުންފައި ކަމަށެވެ. ހުރިހާ ދިމާއަކުންވެސް ވަނީ ކަންކަން އިޞްލާޙު ކުރަން ޖެހިފައި ކަމަށް ވިދާޅުވިއެވެ.

ރައީސް ވިދާޅުވީ ގައުމު މިއަދު ބޭނުންވަނީ ރަނގަޅު ކުރަން ޖެހޭކަންކަން ރަނގަޅުކޮށް އިސްލާހުކޮށް ހަރުދަނާ ކުރުމަށެވެ. އެމަނިކުފާނު ވިދާޅުވީ "މި ސަރުކާރަކީ ބޭރުގެ ތާއީދާއި އިތުބާރުވެސް އޮތް ވަރުގަދަ ސަރުކާރަކަށް ހެދުމުގެ ހުރިހާ ޤާބިލުކަމަކާއި، ހުރިހާ މަސްއޫލިއްޔަތެއް މިއޮތީ އަޅުގަނޑުމެންގެ ކޮނޑުގައި އެޅިފައި.މި ސަރުކާރަށް ފުރިހަމަ ތާއީދު، އަޅުގަނޑުމެންގެ އަވަށްޓެރި ޤައުމުތަކުން އަދި އަޅުގަނޑުމެންނާއެކީ ގުޅުން ބަދަހިކުރައްވާފައިވާ އަދި އެކިއެކި ކަންކަމުގައި އަޅުގަނޑުމެންގެ ޕާޓްނަރުންގެ ގޮތަށް ހިމެނިވަޑައިގަންނަވާ އެއްވަނަ ދުނިޔޭގެ ޤައުމުތަކުން ވަނީ ފުރިހަމަ ތާއީދު ކުރައްވާފައި،" ރައީސް ވިދާޅުވިއެވެ.

ރާއްޖޭގައި ދާޚިލީ ކަންކަމުގެ ތެރޭގައި، ސިޔާސީ ޚިޔާލު ތަފާތުވާ ފިކުރުތައް ހުރިކަމުގައިވީ ނަމަވެސް، ރައްޔިތުންވަނީ މިހާރުގެ ސަރުކާރަށް "ވަރުގަދަ ތާއީދެއް" ދެއްވާފައި ކަމަށްވެސް ވިދާޅުވިއެވެ. އެހެންކަމުން ގައުމުގެ ހުރިހާ ކަމެއްވެސް މިހާރު މިޞްރާބު ޖަހާފައި ހުރީ "އަޅުގަނޑުމެންނާއެކީ" ކަމަށްވެސް ރައީސް ވިދާޅުވިއެވެ.

އެހެންކަމުން ސަރުކާރަށް ރައްޔިތުންގެ ތާއީދާއި، މަގުބޫލްކަން ހޯދުމަށްޓަކައި ރައްޔިތުން ބޭނުންވާ ކަންކަން އެއްވެސް ވަރުބަލިވުމެއްނެތި، ކޮށްދެއްވުމުގައި ދެމިތިބުމަށް އެމަނިކުފާނު ވަޒީރުންގެ ކިބައިން އެދި ވަޑައިގެންނެވިއެވެ.