އިންޑިއާ ސަފީރުގެ ކާރުކޮޅަށް ގެއްލުންދިން މައްސަލައިގައި މީހަކު ހައްޔަރުކޮށްފި

އިންޑިއާ ސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު ރަޖިވް ޝަހާރޭގެ ކާރުކޮޅަށް ގާބުރިއަކުން ހަމަލާދީ ފަހަތު ބިއްލޫރިގަނޑު ތަޅާލި މައްސަލައިގެ ތުހުމަތުގައި ފުލުހުން މީހަކު ހައްޔަރު ކޮށްފިއެވެ.

މި މައްސަލައާ ގުޅިގެން ފުލުހުން ހައްޔަރު ކޮށްފައިވަނީ އުމުރުން 22 އަހަރުގެ ފިރިހެނެކެވެ. މިމީހާ ހައްޔަރު ކޮށްފައިވަނީ ކޯޓު އަމުރެއްގެ ދަށުންނެވެ. ރޭ 10.45 އެހައިކަންހާއިރު އޭނާ ހައްޔަރު ކުރިކަމަށްވިޔަސް ހައްޔަރު ކޮށްފައިވަނީ ކޮންތާކުން ކަމެއް ފުލުހުން ބުނެފައެއް ނުވެއެވެ.

މި މައްސަލަ ފުލުހުންގެ ސީރިއަސް އެންޑް އޮގަނައިޒް ކްރައިމް ޑިޕާޓްމަންޓުން ދަނީ ތަހުގީގު ކުރަމުން ކަމަށްވެސް ފުލުހުންވަނީ ބުނެފައެވެ.

އިންޑިއާ ސަފީރުގެ ކާރުކޮޅަށް ހަމަލާދީފައިވަނީ މި އޮކްޓޯބަރު މަހުގެ 28 ވަނަ ދުވަހުގެރޭގެ ވަގުތެއްގައެވެ. ހަމަލާދިންއިރު ކާރުކޮޅު އޮތީ އިންޑިއަން ހައިކޮމިޝަންގެ ދޮރުމަތީގައެވެ.

ކާރުކޮޅަށް ހަމަލާ ދިން މިމައްސަލާގައި އިންޑިއަން ހައިކޮމިޝަނުންވަނީ ކަންބޮޑުވުން ފާޅުކޮށްފައެވެ. އަދި އެހަމަލާއަކީ ސަފީރަށް އަނިޔާއެއް ދިނުމަށް ދީފައިވާ ހަމަލާއަކަށް ވެދާނެ ކަމަށްވެސް ހައިކޮމިޝަނުން ވަނީ ބުނެފައެވެ. މިހަމަލާގެ ސަބަބުން ދެގައުމުގެ މެދުގައި އޮންނަ ޒަމާންވީ ގުޅުމަށް ބުރޫއަރާފާނެތީ ކަންބޮޑުވާ ކަމަށްވެސް ހައިކޮމިޝަނުންވަނީ ބުނެފައެވެ.

އިންޑިއާ ސަފީރުގެ ކާރުކޮޅަށް ގައުބުރިއަކުން ހަމަލާދީ ބިއްލޫރިގަނޑު ތަޅާލުމުން ދިވެހި ސަރުކާރުންވަނީ އެކަން ކުށްވެރި ކުރައްވާފައެވެ. އެކަންކުރި މީހުން އިންސާފުގެ ކުރިމައްޗަށް ގެންނާނެ ކަމަށްވެސް ސަރުކާރުންވަނީ ބުނެފައެވެ.

ސަރުކާރުގެ އިތުރަށް ކުރީގެ ދެ ރައީސުން ކަމަށް ރައީސް މައުމޫނާއި، ރައީސް ނަޝީދުވެސް ވަނީ މިއަމަލް ކުށްވެރިކޮށް ބަޔާން ނެރެފައެވެ. އަދި ޕީޕީއެމްއާއި، އެމްޑީޕީއާއި ޖޭޕީންވެސް ވަނީ މިކަން ވަރަށް ބޮޑަށް ކުށްވެރި ކޮށްފައެވެ.