ރާއްޖެޓީވީގައި ރޯކޮށްލި މައްސަލާގައި 7 މީހުން ހައްޔަރު ކޮށްފި

ރާއްޖެ ޓީވީ އަދި އެ ސްޓޭޝަން ހިންގަމުންދާ އިމާރާތުގައި އަލިފާން ރޯކޮށްލި މައްސަލާގައި މިހާތަނަށް 7 މީހަކާއި ކުޑަކުއްޖަކު ހައްޔަރުކޮށްފި ކަމަށް ފުލުހުން ހާމަ ކުރައްވައިފިއެވެ.

ފުލުހުން ބުނެފައިވަނީ މި މައްސަލައާ ގުޅިގެން ހައްޔަރުކޮށްފައިވަނީ 24 އަހަރުގެ މީހަކާއި 22 އަހަރުގެ 2 މީހުންނާއި 21 އަހަރުގެ މީހަކާއި 20 އަހަރުގެ މީހަކާއި 18 އަހަރުގެ 2 މީހުންނާއި، 17 އަހަރުގެ ކުއްޖެއް ކަމަށެވެ. ނަމަވެސް މިމީހުންގެ އިތުރު އެއްވެސް ތަފްސީލެއް ފުލުހުން ހާމަކޮށްފައެއް ނުވެއެވެ.

ރާއްޖެ ޓީވީ ރޯކޮށްލި މައްސަލާގައި ތުހުމަތުކުރެވޭ އިތުރު މީހުން ހޯދުމުގެ މަސައްކަތް ފުލުހުން މިހާރުވެސް ދަނީ ކުރަމުން ކަމަށް ފުލުހުންވަނީ ބުނެފައެވެ.

ރާއްޖެ ޓީވީ އަދި އެ ޓީވީ ހުންނަ އިމާރާތުގައި އަލިފާން ރޯކޮށްލާފައިވާ މައްސަލައާ ގުޅޭ ގޮތުން އެނގިހުރި ހުރިހާ މަޢުލޫމާތުތައް ފުލުހުންގެ "ތަޙްޤީޤަށް ފޯރުކޮށްދީ ފުލުހުންގެ ތަޙްޤީޤަށް ފުރިހަމައަށް އެއްބާރުލުން ދެއްވުމަށް ހުރިހާ ފަރާތްތަކަށްވެސް އިލްތިމާސް" ކުރާ ކަމަށް ފުލުހުން ވަނީ ބުނެފައެވެ.

މިމައްސަލާގައި 3 މީހުން ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން ކުރިންވަނީ ބުނެފައެވެ. ނަމަވެސް އެމީހުންގެވެސް އެއްވެސް ތަފްސީލެއް ނުދެއްވައެވެ. ރާއްޖެޓީވީ ރޯކޮށްލުމުން އެތަނުގެ ހުރިހާ އެއްޗެއްވަނީ އަނދައި ހުލިވެފައެވެ. އަދި ލިބުނު ގެއްލުމުގެ މިންވަރު ފައިސާއިން ބަލާކަމަށްވާނަމަ އެއްމިލިއަން ޑޮލަރަށް އަރާނެ ކަމަށްވެސް އެތަނުންވަނީ ބުނެފައެވެ. މިތަން ރޯކޮށްލުމުން އިމާރާތުގެ ތިރީގައި ހުރު ކޮމްޕިޔުޓަރ ޕްލަސް ވެސް ވަނީ އެއްކޮށް އަނދައިފައެވެ.

މި މައްސަލައާ ބެހޭ އެއްވެސް މަޢުލޫމާތެއް ލިބިފައިވާނަމަ އެމަޢުލޫމާތެއް މޯލްޑިވްސް ޕޮލިސް ސަރވިސްގެ ހޮޓްލައިން ނަމްބަރު 3322111 އަށް ނުވަތަ ސީރިއަސް އެންޑް އޮގަނައިޒް ކްރައިމް ޑިޕާޓްމަންޓްގެ ނަމްބަރު 9911099 އަށް ގުޅުއްވައި ހިއްސާކުރެއްވުމަށް ފުލުހުން ވަނީ އެދިފައެވެ.

ރާއްޖޭގެ ރަށަކުން ނަމަ އެރަށެއްގެ ޕޮލިސް ސްޓޭޝަނަކަށް އަދި ޕޮލިސް ސްޓޭޝަން ނެތް ރަށެއްނަމަ އެރަށެއްގެ ކައުންސިލް އިދާރާ މެދުވެރިކޮށް އެންގެވުމަށް ފުލުހުން ވަނީ އެދިފައެވެ.

މިފަދަ ފަރާތްތަކާއި ބެހޭ މަޢުލޫމާތު ފުލުހުންނާ ހިއްސާކުރާ ފަރާތްތަކަށް ލިބިދޭންޖެހޭ ރައްކާތެރިކަން ފޯރުކޮށްދޭނެ ކަމުގައި ފުލުހުން ވަނީ ބުނެފައެވެ.