ވަގަށްނަގާފައިވާ ފައިސާ ތަކެއް ހޯދައި މީހަކު ހައްޔަރުކޮށްފި
30 އޮކްޓޯބަރ 2013 16:00
ހުވަދު އަތޮޅު އުތުރުބުރީ ދެއްވަދޫ ގެއަކުން ވަގަށް ނަގާފައިވާ ފަނަރަ ހާސް ރުފިޔާ ހޯދައި އޭގެ ވެރިމީހާއާ ފުލުހުން ހަވާލުކޮށްފިއެވެ.
މިފައިސާ ވަގަށް ނަގާފައިވާ ކަމަށް ފުލުހުންނަށް އަންގާފައިވަނީ އަންގާރަ ދުވަހުއެވެ. މިމައްސަލަ ހުށަހެޅުމުން މިފައިސާ ހޯދުމަށް ފުލުހުން ކުރި މަސައްކަތުން އެފައިސާތައް ހޯދައި، އެފައިސާ ވަގަށް ނެގިކަމަށް ތުހުމަތުކުރެވޭ މީހަކުވެސް ފުލުހުންގެ ބެލުމުގެ ދަށަށް ވަނީ ގެނެސްފައި ކަމަށް ފުލުހުން ހާމަކުރެއްވިއެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ 26 އަހަރުގެ ފިރިހެނެކެވެ. އޭނާއަކީ ވައްކަމާއި މާރާމާރީ މައްސަލަތަކުގެ ކުށުގެ ރެކޯޑް އޮންނަ މީހެއް ކަމަށްވެސް ފުލުހުން ހާމަކުރެއްވިއެވެ. ގދ. ތިނަދޫ ޕޮލިސް ސްޓޭޝަންގެ ފުލުހުން ކުރި މަސައްކަތުން އޭނާ ފުލުހުންގެ ބެލުމުގެ ދަށަށް ގެނެސްފައިވަނީ އަންގާރަ ދުވަހުގެ ހެނދުނު 10:40 އެހައިކަންހާއިރު ތިނަދޫ ބަނދަރު ސަރަޙައްދުން ކަމަށްވެސް ފުލުހުން ހާމަކުރައްވާފައިވެއެވެ.
ދެއްވަދޫ ގެއިން ވަގަށް ނަގާފައިވާ ފައިސާތައް ފެނިފައިވަނީ މިމީހާ ބަލައިފާސްކުރި ކުރުމުގައި އޭނާ ލައިގެން ހުރި ބޮކްސާ ތެރެއިން ކަމަށްވެސް ފުލުހުން ހާމަކުރެއްވިއެވެ.
މި މައްސަލަ ގދ. ތިނަދޫ ޕޮލިސް ސްޓޭޝަނުން ދަނީ ތަހުޤީޤު ކުރަމުން ކަމަށްވެސް ފުލުހުންވަނީ ބުނެފައެވެ.
ކިޔުންތެރިންގެ ހިޔާލު