ކާމިލް ފިލުވުމަށް މަސައްކަތްކުރާ ފަރާތްތަކާ މެދު ފިޔަވަޅު އަޅާނަން:ޕޮލިސް
13 އޮކްޓޯބަރ 2013 21:20
ދައުލަތުގެ މުދަލަށް ގެއްލުންދީ ފުލުހަކަށް ހަމަލާދިންކަމަށް ތުހުމަތުކުރެވޭ އއ. އުކުޅަސް، ބީޗް ހައުސް ކާމިލް އިބްރާހިމް ފިލުވުމަށް މަސައްކަތްކުރާނަމަ އެކަން ކުރާ ބަޔެއްގެ މައްސަލަ ބަލައި ޤާނޫނީ ގޮތުން އެޅެންހުރި ފިޔަވަޅުތައް އަޅުއްވާނެ ކަމަށް ފުލުހުން ބުނެފިއެވެ.
ކާމިލަކީ މިހިނގާ އޮކްޓޯބަރު ފަސްވަނަދުވަހުގެ ރޭ އެމްޑީޕީން މާލޭފައި ބޭއްވި މުޒާހަރާގައިފުލުހުން އަޅާފައިވާ ބެރިގޭޑްތައް ފޫއަޅުވާލުމަށްފަހު ފުލުހުން ބަންދުކޮށްފައިވާ ސަރަޙައްދަށް ވަދެ ޗާންދަނީ މަގު އޯކިޑްމަގު ގުޅުނު ކަންމަތީގައި މޯލްޑިވްސް ޕޮލިސް ސަރވިސްއިން ހަރުކޮށްފައިވާ ހުރި ސީ.ސީ.ޓީ.ވީ ކެމެރާއަށް ގެއްލުންދީ ހަލާކުކޮށް، އެސަރަޙައްދުގައި އަމަން ބަލަހައްޓަން ޙަރަކާތްތެރިވަމުންދިޔަ ފުލުހުންނަށް ހަތިޔާރު ބޭނުންކޮށްގެން ބިރުދައްކާ މާރާމާރީ ހިންގަން އުޅުނުކަމަށް ތުހުމަތުކުރެވޭ މައްސަލައަކާ ގުޅިގެން ހޯދަމުންދާ މީހެއް ކަމަށް ފުލުހުންވަނީ ބުނެފައެވެ. މީގެ ކުރިން ދެފަހަރެއްގެ މަތިން ކާމިލް ހޯދުމަށް ފުލުހުންވަނީ އިއުލާން ކޮށްފައެވެ.
ވީމާ ކާމިލް އިބްރާހިމްއާ ބެހޭ އެއްވެސް މަޢުލޫމާތެއް ލިބިލައްވާފައިވާ ފަރާތެއްވާނަމަ އެ މަޢުލޫމެއް ވީއެންމެ އަވަހަކަށް މޯލްޑިވްސް ޕޮލިސް ސަރވިސްގެ ކްރިމިނަލް އިންވެސްޓިގޭޝަން ޑިޕާޓްމަންޓްގެ ނަމްބަރު 9631696 ނުވަތަ މޯލްޑިވްސް ޕޮލިސް ސަރވިސްގެ ހޮޓްލައިން ނަމްބަރު 3322111 އަށް ގުޅުއްވައި ހިއްސާކުރެއްވުމަށް ފުލުހުން އެދިފައިވެއެވެ. މިފަދަ މަޢުލޫމާތު ފުލުހުންނާ ހިއްސާކުރާ ފަރާތްތަކަށް ލިބިދޭންޖެހޭ ރައްކާތެރިކަން ފޯރުކޮށްދޭނެ ކަމުގައި ފުލުހުންވަނީ ބުނެފައެވެ.
ކިޔުންތެރިންގެ ހިޔާލު