ރާއްޖެޓީވީގެ އިމާރާތުގައި ރޯކޮށްލުމަކީ ނޫސްވެރިކަމަށް ދިން ހަމަލާއެއް- އެމްބީސީ

ރާއްޖޭ ޓީވީ ހިންގާ އިމާރާތުގައި ރޭ ފަތިހު ރޯކޮލުމަކީ ރާއްޖޭގެ ނޫސްވެރިކަމުގެ މިނިވަންކަމާ ދެކޮޅަށް ދިން ފިނިޑިހަމަލާއެއް ކަމަށް ބުނެ އެއަމަލު މޯލްޑިވްސް ބްރޯޑްކާސްޓިންގ ކޮމިޝަން (އެމްބީސީ) އިން ހަރުކަށި އިބާރާތުން ކުށްވެރިކޮށްފިއެވެ.

މިކަން ކުށްވެރިކޮށް އެކޮމިޝަނުން ނެރުނު ބަޔާބުގައި ބުނެފައިވަނީ "ރާއްޖެޓީވީ ހިންގާ އިމާތާރުގައި ރޭ ފަތިހު ބަޔަކު ރޯކޮށްލުން މޯލްޑިވްސް ބްރޯޑްކާސްޓިންގ ކޮމިޝަނުން އެންމެ ހަރުކަށި އިބާރާތުން ކުށްވެރި ކުރަމެވެ. މިއީ ޑިމޮކްރަސީގެ މައިގަނޑު އަސާސެއް ކަމުގައިވާ ހިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިނަވަންކަމާ ދެކޮޅަށް ބަޔަކު ހިންގި ވަރަށް ފިނޑި އަމަލެއް ކަމުގައި މި ކޮމިޝަނުން ދެކެމެވެ."

އެކޮމިޝަނުގެ ބަޔާނުގައި ބުނެފައިވަނީ މިއަމަލު ހިންގި މީހުން ހޯދައި އެމައްސަލަ އަވަހަށް ތަހްގީގުކޮށް، އެކަން ކުރި ބަޔަކާ މެދު ޤާނޫނީ ފިޔަވަޅު އެޅުމަށް ކަމާ ބެހޭ ފަރާތްތަކަށް ގޮވައި ލައްވާފައެވެ. އެކޮމިޝަނުން ވަނީ ހުރިހާ ބްރޯޑްކާސްޓަރުންނަށް ސަލާމަތާއި ރައްކާތެރިކަން ފޯރުކޮށް ދިނުމަށް ސަލާމަތީ ބާރުތަކަށް ގޮވައިލާފައެވެ.

"މީގެ އިތުރުން ރާއްޖެޓީވީ އޮންއެއަރ އަލުން އަނބުރާ ފެށުމަށް ރާއްޖޭގެ ބްރޯޑްކާސްޓަރުންގެ ފަރާތުން، ހާއްސަކޮށް ޕަބްލިކް ސާރވިސް ބްރޯޑްކާސްޓަރުގެ ފަރާތުން ވެދެއްވެން އޮތް އެހީތެރިކަމެއް މި ދަނޑިވަޅުގައި ވެދެއްވުމަކީ ވެސް މި ކޮމިޝަންގެ އެދުމެއް" ކަމަށްވެސް އެބަޔާނުގައި ބުނެފައިވެއެވެ. އެބަޔާނުގައި ބުނެފައިވަނީ ރާއްޖެ ޓީވީ ހުއްޓުވުމަށް ބަޔަކު މަސައްކަތްކުރަމުންދާ ކަމަށް ބުނެ މި އަހަރުގެ ޖުލައި މަހުގެ ފަހުކޮޅު އެކޮމިޝަނަށް ރާއްޖެ ޓީވީން ސިޓީއެއް ފޮނުވާފައިވާ ކަމަށެވެ. އަދި އެ މައުލޫމާތު އެކޮމިޝަނުން މޯލްޑިވްސް ޕޮލިސް ސަރވިސްއާ ހިއްސާކޮށްފައިވާނެ ކަމަށްވެސް އެބަޔާނުގައި ބުނެފައިވެއެވެ.

"ރާއްޖެ ޓީވީ ހުއްޓުވާނެ ކަމަށް ބުނެ އިންޒާރުދީ، މި ކޮމިޝަނަށް ލިބޭ ފޯން ކޯލަކާ ބެހޭ މައުލޫމާތު ވެސް މީގެ ހަފުތާއެއް ކުރިން ވާނީ މޯލްޑިވްސް ޕޮލިސް ސަރވިސްއާ ހިއްސާކޮށްފަ އެވެ." އެބަޔާނުގައި ބުނެފައިވެއެވެ. "އަދި ރާއްޖޭ ޓީވީ ހުއްޓުވަން ސަރުކާރުން މަސައްކަތްކުރާ ކަމަށް ބުނެ މީޑިއާގައި ފަތުރަމުންދާ ޑޮކިއުމަންޓަކާ ބެހޭ މައުލޫމާތު ވެސް އިއްޔެ ވާނީ މޯލްޑިވްސް ޕޮލިސް ސަރވިސްއާ ހިއްސާކޮށްފަ އެވެ."

މިކަންކަން ތަހުގީގުކޮށްދެއްވައި، ހަމަޖެހިފައި އޮންނަ އުސޫލުން ފިޔަވަޅު އަޅުއްވައިދެއްވުމަށްވެސް ވެސް މޯލްޑިވްސް ޕޮލިސް ސަރވިސްގައި ދަންނަވާފައިވާ ކަމަށް އެބަޔާނުގައި ބުނެފައިވެއެވެ. އަދި މިކަންކަމުގެ ކުރިއެރުންތައް ލިބިފައިވާ މިންވަރެއް ޕޮލިހުން އެމްބީސީއަށް އަންގަވައިފައިނުވާތީ ހިތާމަ ކުރާ ކަމަށްވެސް ބަޔާނުގައި ބުނެފައިވެއެވެ.

ސިޔާސީހަލަބޮލިކަމުގެ ތެރޭގައި، ބަދަލުހިފުމުގެ ރޫހު އުފެދި، މީޑިއާގެ ފަރާތްތަކަށް ގެއްލުން ލިބޭފަދަ ގޮތަކަށް އަމަލު ނުކުރުމަށް ބްރޯޑްކާސްޓިން ކޮމިޝަނުން ވަނީ ގޮވައިލައްވާފައެވެ.