ރާއްޖެޓީވީ ހިންގާ އިމާރާތަށް ދިން ހަމަލާއާ ގުޅިގެން މީހަކު ހޯދަނީ

ރާއްޖެ ޓީވީއަށާއި އެޓީވީ ހިންގާ އިމާރާތަށް ދިން ހަމަލާއާ ގުޅިގެން އިތުރު މީހަކު ހޯދުމަށް ފުލުސް އޮފީހުން އިއުލާން ކޮށްފިއެވެ.

ފުލުހުން މިފަހަރު ހޯދަމުން މިދަނީ ހެންވޭރު ހ.ގަސްވާ ކިޔާގޭގެ މުޙައްމަދު މީޢާދު އެވެ. އުމުރުން ފަންސަތިރީސް އަހަރުގެ މިމީހާ ހޯދުމަށް މީގެ ކުރިންވެސް ފުލުހުންވަނީ އިޢުލާން ކޮށްފައެވެ. ނަމަވެސް އޭނާ އަދިވެސް ފެނިފައިނުވާތީ ދެވަނަ ފަހަރަށް އިއުލާން ކުރީއެވެ.

މުޙައްމަދު މީޢާދަކީ މިއަހަރުގެ އޮކްޓޯބަރު މަހު ހަތްވަނަ ދުވަހުގެ ރޭގެ ވަގުތެއްގައި ރާއްޖެ ޓީވީއަށާއި ރާއްޖެ ޓީވީ ހިންގާ ބީކޭޓީ ބިލްޑިންގގައި އަލިފާން ރޯކޮށްލި މައްސަލައިގެ ތުހުމަތު ކުރެވޭ މީހެއް ކަމަށް ފުލުހުންވަނީ ހާމަކުރައްވާފައެވެ.

މިމީހާއާ ބެހޭ އެއްވެސް މަޢުލޫމާތެއް ލިބިފައިވާނަމަ ނުވަތަ އުޅޭ ވަކިތަނެއް އެނގޭ ކަމަށްވާނަމަ މޯލްޑިވްސް ޕޮލިސް ސަރވިސްގެ ހޮޓްލައިން ނަންބަރު 3322111 އަށް ނުވަތަ އެމަޖެންސީ ނަންބަރު 119 އަށް ނުވަތަ ސީރިއަސް އެންޑް އޯގަނައިޒް ކްރައިމް ޑިޕާރޓްމަންޓްގެ ނަންބަރު 9911099 އަށް ގުޅާ އަންގައި ދިނުމަށް ފުލުހުންވަނީ އެދިފައެވެ.

ރާއްޖޭގެ ރަށަކުން ނަމަ އެރަށެއްގެ ޕޮލިސް ސްޓޭޝަނަކަށް އަދި ޕޮލިސް ސްޓޭޝަން ނެތް ރަށެއްނަމަ އެރަށެއްގެ ކައުންސިލް އިދާރާ މެދުވެރިކޮށް "މި ސަރވިސް އަށް އެންގެވުން އެދެމެވެ." ފުލުހުން ހާމާކޮށްފައިވެއެވެ.

މީނާއާ ބެހޭ މަޢުލޫމާތު ފުލުހުންނާ ހިއްސާކުރާ ފަރާތްތަކަށް ލިބިދޭންޖެހޭ ހިމާޔަތާއި ރައްކާތެރިކަން ފޯރުކޮށްދޭނެ ކަމުގެ ޔަޤީންކަން ފުލުހުންވަނީ ދެއްވާފައެވެ.