އިންޑިޔާ ސަފީރުގެ ކާރުކޮޅަށް ދިން ޙަމަލާ، ސަރުކާރުން ކުށްވެރި ކޮށްފި

އިންޑިޔާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރުގެ ކާރުކޮޅަށް ގައުއުކައި ކާރުގެ ބިއްލޫރި ގަނޑު ތަޅާފައިވާތީ އެއަމަލު ދިވެހި ސަރުކާރުން އެންމެހަރުކަށި އިބާރާތުން ކުށްވެރިކޮށްފިއެވެ.

ރައީސް އޮފީހުން މިއަދު ނެރެފައިވާ ބަޔާނެއްގައި ބުނެފައިވަނީ "އިންޑިޔާ ހައިކޮމިޝަން ކުރިމަތީގައި ޕާކުކޮށްފައި ވަނިކޮށް، އެ ކާރުކޮޅަށް ބަޔަކު ގާއުކައި، ގެއްލުންތަކެއް ދީފައިވާތީ، އެކަން ދިވެހި ސަރުކާރުން އެންމެ ހަރުކަށި ޢިބާރާތުން ކުށްވެރި" ކުރާ ކަމަށެވެ.

އެއަމަލު ސަރުކާރުން ސިފަކުރައްވާފައިވަނީ "ވަރަށް ފިނޑި ޢަމަލެއް" ގެ ގޮތުގައެވެ. މި ޢަމަލު ތަޙުޤީގު ކޮށް އެކަން ކުރިމީހުން ހޯދައި، އިންޞާފުގެ ކުރިމައްޗަށް "ވަރަށް އަވަހަށް" ގެންނާނެ ކަމުގެ "ޔަޤީންކަން" ވެސް ސަރުކާރުން ވަނީ ދެއްވާފައެވެ.

"ރާއްޖޭގައި ދިރިއުޅުއްވާ ބޭރުގެ ޑިޕްލޮމެޓުންނަށާއި، މުދަލަށް ގެއްލުންވާފަދަ މިފަދަ ޤާނޫނާ ޚިލާފު ޢަމަލުތައް، ދިވެހި ސަރުކާރުން އެއްގޮތަކަށްވެސް ބަލައިނުގަންނާނެ" ކަމަށްވެސް އެބަޔާނުގައި ބުނެފައިވެއެވެ. "ރާއްޖޭގައި އުޅުއްވާ ޑިޕްލޮމެޓުންގެ ސަލާމަތާއި ރައްކާތެރިކަން ދެމެހެއްޓުމަށް، ކުރެއްވެން އޮތް ހުރިހާ ކަމެއް ސަރުކާރުން ކުރައްވާނެ" ކަމުގެ ޔަޤީންކަންވެސް ސަރުކާރުން ވަނީ ދެއްވާފައެވެ.

މިބަޔާނުގައި ބުނެފައިވަނީ އިންޑިޔާއާއި ރާއްޖެއާއި ދެމެދު އޮންނަނީ، ވަރަށް ޒަމާންވީ ރަޙްމަތްތެރި ގުޅުމެއް ކަމަށެވެ. އިންޑިޔާއިން ރާއްޖެއަށް ދެއްވާފައިވާ އެހީތެރިކަމާއި އެއްބާރުލުމަށް، ދިވެހި ސަރުކާރާއި ރައްޔިތުން ނުހަނު ބޮޑަށް ޝުކުރުވެރިވާ ކަމުގައި ވިދާޅުވެފައިވެއެވެ. ދެ ޤައުމުގެ ދެމެދުގައިވާ ގާތް ގުޅުން، ކުރިއަށް އޮތް ތާނގައިވެސް އިތުރުވެގެންދާނެ ކަމަށް ޔަޤީން ކުރައްވާ ކަމުގައިވެސް ބަޔާނުގައި ވެއެވެ.

މިމައްސަލައާ ގުޅިގެން ފުލުހުން ބުނެފައިވަނީ ފުލުހުން ދަނީ އެމައްސަލަ ތަހުގީގު ކުރަމުން ކަމަށެވެ. އެއަމަލު ހިންގި ކަމުގެ ތުހުމަތުގައި ފުލުހުން ގެންދަނީ ބަޔަކު ހޯދަމުން ކަމަށްވެސް ފުލުހުން ބުނެފައިވެއެވެ.ފުލުހުންވެސް ވަނީ މިއަމަލު އެންމެ ހަރުކަށި އިބާރާތުން ކުށްވެރި ކުރައްވާފައެވެ. ހައިކޮމިޝަނަރުގެ ކާރުގެ ބިއްލޫރިގަނޑު ތަޅާލައިފައިވަނީ އިއްޔެ ހަވީރުގެ ވަގުތެއްގައެވެ. އިންޑިޔާގެ ނޫސްތަކުގައިވެސްވަނީ މިވާހަކަ ލިޔެފައެވެ.