ޅޮހީގައި ހިންގިމަރާމާރީއެއްގައި ފަސްމީހަކު ފުލުހުންގެ ބެލުމުގެ ދަށަށް ގެނެސްފި

ނ.ޅޮހީގައި ހިންގި މާރާމާރީއަކާ ގުޅިގެން 5 މީހަކު ފުލުހުން ހައްޔަރު ކޮށްފިއެވެ.

 މި މައްސަލައާއި ގުޅިގެން ހައްޔަރުކޮށްފައިވަނީ 29 އަހަރާއި 33 އަހަރާ ދެމެދުގެ މީހުން ކަމަށް ފުލުހުން ހާމަކުރައްވައިފިއެވެ.

މި ފަސްމީހުން ހައްޔަރުކޮށްފައިވަނީ މި އޮކްޓޯބަރު މަހުގެ 16 ވަނަ ދުވަހުގެރޭ ވަގުތެއްގައި ނ.ޅޮހިން ކަމަށްވެސް ފުލުހުން ހާމަކުރެއްވިއެވެ.

މިމާރާމާރީގައި 31 އަހަރުގެ މީހަކަށް އަނިޔާވެފައިވާއިރު އޭނާގެ ބުމަ ކައިރިން ފަޅައިގެން ގޮސް އެކިވަރުގެ އަނިޔާ ލިބިފައިވެއެވެ. އޭނާއަށް ނ. ޅޮހީ ސިއްހީ މަރުކަޒުން ފަރުވާދިނުމަށްފަހު މިހާރު ދޫކޮށްލާފައިވާ ކަމަށްވެސް ފުލުހުން ހާމަކުރެއްވިއެވެ.

މިމާރާމާރީގެ މަޢުލޫމާތު ލިބުމާއެކު އެކަންކުރި ސަރަހައްދަށް ދިޔަ ފުލުހުންނަށް ހަމަލާ ދީފައިވެއެވެ. "ފުލުހުންގެ ގައިގާ ތަޅާ މާރާމާރީ ހިންގުމުގެ ސަބަބުން އަނިޔާވެފައިވާއިރު ފުލުސް މީހާގެ އަރިކަށިން ތަނެއް ޒަޚަމްވެ އެކިވަރުގެ އަނިޔާލިބިފައިވެއެވެ. ފުލުސް މީހާއަށްވެސް ފަރުވާދިނުމަށްފަހު މިހާރު ވަނީ ދޫކޮށްލާފައެވެ." ފުލުހުން ބުނެފައިވެއެވެ.

މި މާރާމާރީއާ ގުޅިގެން ހައްޔަރުކުރި 5 މީހުންގެ ބަންދާމެދު ގޮތެއް ނިންމުމަށްޓަކައި ނ. ހޮޅުދޫ މެޖިސްޓްރޭޓް ކޯޓަށް ހާޒިރުކުރުމުން އެކޯޓުން އަށް ދުވަހުގެ މުއްދަތެއް ދީފައެވެ.މި މައްސަލަ ނ.މަނަދޫ ޕޮލިސް ސްޓޭޝަނުން ދަނީ ތަހުޤީޤު ކުރަމުންނެވެ.