ރައްޔިތުންގެ މަޖިލީހުގެ މެންބަރު އީވާ އަބްދުﷲ ދޫކޮށްލައިފި
2 އޮކްޓޯބަރ 2013 0:21
އެމްޑީޕީން މިއަދު ހަވީރު ކުރި މުޒާހަރާގައި އުޅުއްވަނިކޮށް ފުލުހުންގެ ބެލުމުގެ ދަށަށް ގެންނެވި، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ މިރޭ ދޫކޮށްލައިފިއެވެ.
ފުލުހުން މައުލޫމާތު ދެއްވި ގޮތުގައި އީވާ ދޫކޮށްލާފައިވަނީ މިރޭ 8.30 އެހައިކަންހާއިރު އެވެ. ފުލުހުންގެ ބެލުމުގެ ދަށަށް އޭނާ ގެނެސްފައިވަނީ ފުލުހުންގެ އަމުރަށް ނުކިޔަމަންތެރިވެ ފުލުހުންގެ ވާޖިބަށް ހުރަސް އެޅުމުން ކަމަށް ފުލުހުން ވަނީ ހާމަ ކުރައްވާފައެވެ. އޭނާ ދޫކޮށްލެއްވީ ކީއްވެތޯ ދެންނެވުމުން ފުލުހުން ސަބަބެއް އަދި ތަފްސީލެއްވެސް ދެއްވާފައެއް ނުވެއެވެ. ހަމަ އެކަނި ބުނެފައިވަނީ އީވާ ދޫކޮށްލާފައިވާ ކަމަށެވެ.
ފުލުހުންވަނީ މިއަދު ހަވީރު 9 މީހުންގެ ފުލުހުންގެ ބެލުމުގެ ދަށަށް ގެންގޮސްފައެވެ. އޭގެ ތެރޭގައި އީވާގެ އިތުރަށް ކުރީގެ އެޑިޔުކޭޝަން މިނިސްޓަރ ޝިފާ މުހައްމަދުވެސް ހިމެނެއެވެ. ނަމަވެސް އީވާ ދޫކޮށްލުމަށްފަހު އަނެއް 8 މީހުން މިހާރުވަނީ ދޫނިދުއަށް ގެންގޮސްފައި ކަމަށް މައުލޫމާތު ލިބިފައިވެއެވެ.އެމްޑީޕީން މުޒާހަރާ ކުރަމުންދަނީ ރިޔާސީ އިންތިޚާބުގެ ދެވަނަ ބުރުގެ ވޯޓުލުން އަވަސްކޮށް ދެއްވުމަށް އެދިއެވެ.
ކިޔުންތެރިންގެ ހިޔާލު