ޓެރަރިސްޓުން ކަމަށް ބުނެ ހަމަލާގައި ޒަޚަމްވި ބަޔަކު ހައްޔަރު ކޮށްފި

ޔަމަނުގައި ހަރަކާތްތެރިވަމުން އަންނަ އީރާނުގެ ސަރުކާރުން ފަންޑު ކުރާ ޓެރަރިސްޓް ޖަމާޢަތެއް ކަމުގައިވާ ޙޫސީ ޖަމާޢާތުން ހިޞާރުކޮށްފައިވާ ޔަމަނުގެ ދައްމާޖުގައި ޒަޚަމްވެފައިތިބި ބައެއް މީހުން އެއީ ޓެރަރިސްޓުން ކަމަށް ބުނެ ޔަމަނުގެ ޖާސޫސީ އިދާރާއިން ހައްޔަރުކޮށްފިއެވެ.

މައުލޫމާތު ލިބިފައިވާ ގޮތުގައި ހިސާރު ކުރެވިފައިވާ ދައްމާޖު ވާދީގައި ޒަޚަމްވެފައިވާ މީހުން ނެރެފައިވަނީ އެގައުމުގެ ރެޑްކޮރޮސްގެ އެހީތެރި ކަމާއެކީގައެވެ. މި މީހުން ޔަމަނުގެ ވެރިކަންކުރާ ސަންއާގެ އަސްކަރީ ހޮސްޕިޓަލެއްގައި އެޑުމިޓް ކުރެވިފައިވަނިކޮށް ޖާސޫސީ އިދާރާއިންވަނީ ގަދަބާރުން އެމީހުން ގެންގޮސްފައެވެ.

ޓެރަރިސްޓު ހަމަލާތަކުގައި ޒަޚަމްވެފައި ތިބި ކުށެއް ނެތް މީހުން އެއީ ޓެރަރިސްޓުންތަކެއް ކަމަށް ބުނެ ހައްޔަރު ކުރުމުން ޔަމަނުގެ ޤަބީލާތަކުން ވަނީ އެކަމަށް ވަރަށް ބޮޑަށް ނުރުހުން ތެރިކަން ފާޅުކޮށްފައެވެ. އަދި އެގޮތުން އެޤައުމުގެ އެންމެ ބާރުގަދަ ޤަބީލާ ކަމުގައިވާ ހާޝިދު ޤަބީލާއިން ވަނީ ޔަމަނުގެ ޖަސޫސީ އިދާރާއަށް އެމީހުން ދޫކުރުމަށް ބާރަގަޑި އިރުގެ މުހުލަތެއް ދީފައެވެ.

ނަފްސާނީ އަދި ޖިސްމާނީ އަނިޔާތަކަކަށް ފަހު އިއްޔެގެ ވަގުތެއްގައި އެމީހުންތައް ވަނީ ދޫކޮށްލާފައެވެ. މިފަދަ ކަންތައް ކުރިމަތި ވަމުންދާތީ އަނިޔާ ލިބިފައިވާ މީހުންގެ ސަލާމަތީ ކަންތައްތައް ޔަމަނުގެ ޤަބީލާތަކުން ވަނީ ވަރުގަދަކޮށްފައެވެ.