ރިޝްވަތުގެ ގޮތުގައި ގާސިމް އިބްރާހީމަށް އަށްމިލިއަން ޑޮލަރު އިއްޔެ ހުށަހަޅައިފި

ރިޔާސީ އިންތިޚާބުގެ ދެވަނަ ބުރުގައި އެމްޑީޕީއަށް ތާއިދު ކުރެއްވުމަށް އެދި އަށްމިލިއަން ޑޮލަރު އިއްޔެ ހަވީރު މީހަކު ހުށަހެޅުއްވި ކަމަށް ޖުމްހޫރީޕާޓީގެ ލީޑަރު ގާސިމް އިބްރާހީމް މިއަދު ވިދާޅުވެއްޖެއެވެ.

މިއަދު ހަވީރު މ.ކުނޫޒުގައި، ނޫސްވެރިންނަށް މައުލޫމާތު ދެއްވަމުން ގާސިމް އިބްރާހީމް ވިދާޅުވީ އިއްޔެހަވީރު އިރުއޮއްސުނު ވަގުތު އަށްމިލިއަން ޑޮލަރު (ކޭޝް) ގެ ގޮތުގައި އެމަނިކުފާނަށް މީހަކު ހުށަހެޅި ކަމަށެވެ. ނަމަވެސް އެއީ ކާކުކަމެއް ވިދާޅެއް ނުވެއެވެ. ނަމަވެސް ވަގުތު ޖެހުމުން އެއީކާކުކަންވެސް ހާމަކުރައްވާނެ ކަމަށް ވިދާޅުވިއެވެ.

އެހުށަހެޅުއްވީ ކޮންޕާޓީއެއްގެ ފަރާތުންތޯވެސް އެމަނިކުފާނު ވިދާޅުނުވެއެވެ. ނަަމަވެސް އެހުށަހެޅުން އައީ ޕީޕީއެމްގެ ފަރާތުން ނޫންކަމަށް ގާސިމް ޔަގީންކޮށް ދެއްވިއެވެ. މިވާހަކަ ގާސިމް ވިދާޅުވުމުން ބައެއް މީޑިއާގައި އެވާހަކަ ރިޕޯޓު ކޮށްފައިވަނީ ހާމަކުރައްވާފައިވަނީ އެހުށަހެޅުމަކީ އެމްޑީޕީގެ ފަރާތުން ލިބުނު ހުށަހެޅުމެއް ކަމަށެވެ.

އެމަނިކުފާނު ވިދާޅުވެފައިވަނީ ފައިސާގެ ބޮޑު ހުށަހެޅުމެއްގެ އިތުރަށް އެމްޑީޕީގެ ކެންޑިޑޭޓް މުހައްމަދު ނަޝީދަށް ތާއިދުކުމަށް އެދި އެމްޑީޕީ ސަރުކާރުގެ 35 އިންސައްތަ ދިނުމަށްވެސް ހުށަހެޅި ކަމަށެވެ. އެމްޑީޕީގެ ހުށަހެޅުމުގައި ސަރުކާރާއި ރައްޔިތުންގެ މަޖިލީހާއި، ކައުންސިލްތަކާއި ސަރުކާރުގެ ކުންފުނިތަކުގެ 35 ޕަސެންޓް ޖުމްހޫރީ ޕާޓީއަށް ދިނުމަށް ހުށަހެޅި ކަމަށެވެ. އަދި ޕީޕީއެމްގެ ސަރުކާރުގެ 33 އިންސައްތަ ދޭނެ ކަމަށް އެޕާޓީންވެސް ހުށަހަޅާފައިވާ ކަމަށެވެ. މީގެ އިތުރަށް މަޖިލިހާއި، ކައުންސިލްތަކާއި، ސަރުކާރުގެ ކުންފުނިތަކުގެ ހިއްސާއެއް ދޭނެ ކަމަށް ބުނެފައިވާ ކަމަށެވެ. 

ގާސިމް ވިދާޅުވީ ފައިސާގެ ހުށަހަޅައިގެން އެމަނިކުފާނު ގަނެނުލެވޭނެ ކަމަށެވެ. އެމަނިކުފާނަކީ އެއްގޮތަކަށްވެސް މާއްދިއްޔަތަށް ހެއްލިގެންދާނެ ބޭފުޅެއް ނޫންކަމަށް ވިދާޅުވިއެވެ. އެކަން އެންމެންނަށް އެނގެންޖެހޭނެ ކަމަށްވެސް ވިދާޅުވިއެވެ. "އެންމެ ކުޑައިރުން ފެށިގެން ވެސް މަސައްކަތް ކުރީ އެގޮތަށް. މަރުވެގެން ދާނީ ވެސް އެގޮތުގައި،" ކަމަށް ވިދާޅުވިއެވެ.