ވޯޓު އަލުން ގުނަން އެމްޑީޕީން އެއްބަސް ނުވުމުން ސުވާލު އުފެދޭ -ގާސިމް

ރިޔާސީ އިންތިޚާބުގެ ފުރަތަމަ ބުރުގެ ވޯޓުލުމުގައި އޮޅުވާލުން ތަކާއި މަކަރު ހެދުންތައް ހުރިކަމަށް ޖުމްހޫރީޕާޓީން ތުހުމަތުކޮށް އަލުން ވޯޓު ގުނުމަށް ހުށަހެޅުމުން އެކަމަށް އެމްޑީޕީން އެއްބަސް ނުވުމުން އެކަމާ ވަރަށް ބޮޑަށް ސުވާލު އުފެދޭ ކަމަށް ޖުމްހޫރީޕާޓީ (ޖޭޕީ) ގެ ރިޔާސީ ކެންޑިޑޭޓް ގާސިމް އިބްރާހީމް ވިދާޅު ވެއްޖެއެވެ.

ޖޭޕީގެ ޖަގަހަ މ. ކުނޫޒުގައި ބޭއްވި ޖަލްސާގައި ގާސިމް ވިދާޅުވީ ފުރަތަމަ ބުރުގައި ނުވަދިހަފަސް ހާސް ވޯޓު ހޯދާފައިވާ ޕާޓީއަކަށް ދެވަނަ ފަހަރަށް ވޯޓުގުނަން އެއްބަސް ނުވުމުން އެކަމުގައި ފޮރުވިފައިވާނީ ކޯޗެއްތޯ ސުވާލު އުފެދޭ ކަމަށެވެ. އެކަން ކުރުމަށް އެމްޑީޕީ ނޫން ޕާޓީތަކުން އެއްބަސްވިއެވެ. ނަމަވެސް އެކަމަށް އެމްޑީޕީންވެސް އެއްބަސްވި ކަމަށްވާނަމަ އިލެކްޝަންސް ކޮމިޝަނުން އެކަން ކޮށްދެއްވީސް ކަމަށް ގާސިމް ވިދާޅުވިއެވެ. ނަމަވެސް އިލެކްޝަނުން ވަނީ އެކަމަށް ދެކޮޅު ހަދާފައެވެ.

ގާސިމް ވިދާޅުވީ އެމަނިކުފާނު މިކަމުގައި މަސައްކަތް ކުރައްވަނީ އަމިއްލަ އެދުމެއްގައި ނޫން ކަމަށެވެ. އެމަނިކުފާނު މަސައްކަތް ކުރައްވަނީ ރައްޔިތުންގެ ހައްގުތަކެއް ގެއްލިފައިވާތީ އެހައްގުތައް ހޯއްދަވައި ދެއްވުމަށް ކަމަށެވެ.

ގާސިމް ވިދާޅުވީ ރިޔާސީ އިންތިޚާބުގެ ފުރަތަމަ ބުރުގައި ބޮޑެތި އޮޅުވާލުން ތަކެއް ހުރި ކަމަށް ރައްޔިތުން ބުނަމުންދާ ކަމަށެވެ. އެފަދަ އޮޅުވާލުން ތަކެއް ހުރިކަމަށް ތުހުމަތުކޮށް އެވާހަކަތައް ދައްކަމުންދާއިރު އެކަން ކަމަށް އެއްވެސް ހައްލެއް ހޯއްދަވައި ނުދެއްވައި އެކަންކަމަށް ބީރުކަންތެއް އިލެކްޝަންސް ކޮމިޝަނުން ދެއްވުމަކީ ގަބޫލު ކުރެއްވޭނެ ކަމެއް ނޫން ކަމަށެވެ.

ނިމިގެންދިޔަ އިންތިޚާބާ މެދު ޝައްކާއި ވަހުމް ތަކެއް އުފެދި އެމައްސަލަ ކޯޓަށް ހުށަހަޅާފައިވާއިރު އެއްވެސް މައްސަލައެއް ނެތް ކަމަށްވާނަމަ އެކަން ރައްޔިތުންނަށް ޔަގީން ކޮށް ދެއްވުމަށްވެސް ގާސިމް ވިދާޅުވިއެވެ. "ރައްޔިތުން ހިތްހަމަ ޖައްސާލުމަށްޓަކައި މިކަން ކުރަންވީ ނޫންތޯ؟ ކޮބައިތޯ މައްސަލަ އަކީ؟ މިއީ އެންމެންގެ ހައްގުތަކެއް ނޫންތޯ؟،" ގާސިމް ވިދާޅުވިއެވެ.

މިފަދަ މައްސަލަތަކެއް ހުރިކަން ފާހަގަ ކުރެވުމުން އެމައްސަލަ ޖޭޕީން ސްޕްރީމް ކޯޓަށް ހުށަހެޅުމުން އެއީ ގައުމުގެ އަމާންކަން ނަގާލުމަށް ކުރިކަމެއް ކަމަށް ބައެއް ފަރާތްތަކުން ތުހުމަތު ކުރާ ކަމަށްވެސް ގާސިމް ވިދާޅުވިއެވެ. އެހެން ކަމުން އެމައްސަލަ ކޯޓުން ނެގުމަށްވެސް ބައެއް ފަރާތްތަކުން ބުނާ ކަމަށް އޭނާ ވިދާޅުވިއެވެ.

ގާސީމް ވިދާޅުވެފައިވަނީ ރާއްޖޭގެ ސުލްހަ މަސަލަސް ކަން ނަގާލުމަށް އެއްވެސް ބަޔަކަށް ފުރުސަތެއް ނުދޭނެ ކަމަށެވެ. އިންތިޚާބުގެ މައްސަލަ ކޯޓަށް ހުށަހެޅި އިލެކްޝަންސް ކޮމިޝަނުން މައްސަލަ ހައްލު ކުރުމަށް އެއްބާރުލުން ނުދީގެން ކަމަށްވެސް ގާސިމް ވިދާޅުވިއެވެ.

ގާސިމް ވިދާޅުވީ ސުލްހައަށް ގޮވާއިރު އެއްބަޔަކު ވައްކަންކޮށް އަނެއް ބަޔަކު އަނިޔާކުރުމުގެ އަމަލުތައް ހިންގުމަކުން ސުލްހައެއް ގާއިމެއް ނުވާނެ ކަމަށެވެ.

ވޯޓުގެ މައްސަލަ ޖެހިގެން އަލުން ގުނުމަށް ހުށަހެޅުމުން "އެމްޑީޕީ އަށް އެކަން ކުރަން ނުކެރިގެން އުޅެނީ ފިނޑިވީމާ،" ގާސިމް ވިދާޅުވި އެވެ. ގާސިމް ވިދާޅުވީ އަމަނިކުފާނު އިލެކްޝަންސް ކޮމިޝަންގެ މެންބަރެއްގެ ގޮތުގައި ހުންނެވިނަމަ "މޭޒުމަތީގައި ފުންމައިގެން އަރައި ބުނާނަން ރައްޔިތުންގެ ހައްގުތައް ދައްކައި ދޭށޭ،" ގާސިމް ވިދާޅިވިއެވެ.