މިމަހުގެ 16 ވަނަދުވަހުގެ ނިޔަލަށް ރައީސްކަމުގައި ހުންނަވަން ޑރ. ވަހީދު ނިންމަވައިފި

މިމަހުގެ 16 ވަނަ ދުވަހުގެ ނިޔަލަށް ރައީސުލްޖުމްހޫރިއްޔާ ކަމުގެ މަގާމުގައި ދެމި ހުންނަވަން ޑރ. ވަހީދު ނިންމަވައިއެވެ. އެމަނިކުފާނު މިގޮތަށް ނިންމަވާފައިވަނީ ގައުމާ މުޚާތަބު ކުރައްވައި ދެންމެ ދެއްކެވި ވާހަކަފުޅުގައެވެ.

އެމަނިކުފާނު ވިދާޅުވީ މިގޮތަށް ނިންމެވީ ވަރަށްގިނަ ފަރާތްތަކާ މަޝްވަރާ ކުރެއްވުމަށްފަހު ކަމަށެވެ. އަދި ރައީސަކު އިންތިޚާބު ކުރެވި ހުވައިކުރައްވަންދެން މިސަރުކާރު ދެމި އޮންނާނެ ކަމަށް ސްޕްރީމްކޯޓުންވެސް ހުކުމް ކުރައްވާފައިވާތީ ކަމަށް ރައީސް ވިދާޅުވިއެވެ.

އެމަނިކުފާނު ވިދާޅުވީ މިމަހު 16 ވަނަ ދުވަހު އިންތިޚާބު ބޭއްވޭނެ ކަމަށް ކަމާބެހޭ ހުރިހާ ފަރާތްތަކުންވެސް ޔަގީންކަން ދެއްވާފައިވާ ކަމަށެވެ. އެހެން ކަމުން އެދުވަހާ ހަމައަށް ވެރިކަމުގައި ހުންނެވުމަށްފަހު އިސްތިއުފާ ދެއްވާނެ ކަމަށެވެ.

ރައީސް ވަހީދު ވިދާޅުވީ ރާއްޖެއާއި ރާއްޖެއިން ބޭރުގެ ބައެއް ފަރާތްތަކުން ބޭނުންވަނީ މިރޭ 12 ގެ ކުރިން އެމަނިކުފާނު އިސްތިއުފާ ދެއްވުމަށް ކަމަށެވެ. އެކަމަކު އެއަށްވުރެ ގިނަބަޔަކު އެމަނިކުފާނު ވެރިކަމުގައި ދެމިހުންނެވުމަށް ލަފާ ދެއްވާފައިވާ ކަމަށް ވިދާޅުވިއެވެ. އެހެން ކަމުން ގިނަބަޔަކު ބޭނުންވާ ގޮތާއި، ސްޕްރީމް ކޯޓުގެ ހުކުމާ އެއްގޮތަށް އަމަލު ކުރެއްވުމަށް ނިންމެވީ ކަމަށް ވިދާޅުވިއެވެ. ނަމަވެސް މިދެގޮތުން ކުރެ ގޮތަކަށް ނިންމެވުމަކީ އެހާ ފަސޭހަކަމެއް ނޫންކަމަށްވެސް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ ނޮވެމްބަރު 11 އާ ހަމައަށް ރާއްޖޭގައި އިންތިޚާބީ ވެރިއަކު ނެތްކަމަށްވާނަމަ ކަންތައް ކުރަންވާ ގޮތެއް ކަނޑައެޅުމަށް ރައްޔިތުންގެ މަޖިލީހަށް އެމަނިކުފާނު ހުށަހެޅުއްވި ކަމަށެވެ. ނަމަވެސް ގާނޫނު އަސާސީއަށް ބަދަލެއް ގެނައުމުގެ ބަދަލުގައި މަޖިލީހަށް ފެންނަ ގޮތެއް ނިންމުމުން އެއީ ގާނޫނީ ނިންމުމެއް ނޫން ކަމަށް ސްޕްރީމްކޯޓުން ވަނީ ނިންމަވާފައި ކަމަށްވެސް ވިދާޅުވިއެވެ.

ރައީސް ވަހީދު ވިދާޅުވީ ފާއިތުވި 21 މަސްދުވަސްތެރޭގައި އެމަނިކުފާނު މަސައްކަތް ކުރެއްވީ އެއްވެސް ބަޔަކު މަގުމަތިނުކޮށް ގައުމުގެ އެންމެ އިސްވެރިޔާގެ ހައިސިއްޔަތުން ގައުމުގެ މަސްލަހަތު ހިމާޔަތް ކުރެއްވުމަށް ކަމަށެވެ.

މިމަހުގެ 16 ވަނަ ދުވަހުގެ ނިޔަލަށް ވެރިކަމުގައި ހުންނެވުމަށް ރައީސް ނިންމެވި އިރު އެމަނިކުފާނުގެ ނާއިބު މުހައްމަދު ވަހީދުއްދީން މިއަދުވަނީ މަގާމުން އިސްތިއުފާ ދެއްވާފައެވެ.ރައީސް އޮފީހުން މިރޭ ބުނެފައިވަނީ އިންތިޚާބުގެ ދެވަނަބުރު ނިމެންދެން ރައީސް ވަހީދާ އެކު އެމަނިކުފާނުގެ ކެބިނެޓްވެސް އޮންނާނެ ކަމަށެވެ. އަދި މާދަމާއިން ފެށިގެން ރައީސާއި ކެބިނެޓް މެންބަރުންފެ މުސާރަ ނުހިނގާނެ ކަމަށްވެސް ވަނީ ބުނެފައެވެ. ކޮންމެހެން ކުރަންޖެހޭ ހަރަދެއް ނޫނީ އިންތިހާބު ބޭއްވުމާ މިދޭތެރޭ އޮތް ދުވަސްތަކުގައި ނުކުރާނެ ކަމަށްވެސް ރައީސް އޮފީހުންވަނީ ބުނެފައެވެ.

މިމަހުގެ 16 ވަނަދުވަހުގެ ނިޔަލަށް މަގާމުގައި ހުންނެވުމަށް ރައީސް ނިންމެވުމުން ސަލާމަތީ ބާރުތަކުންވަނީ މާލެތެރޭގެ ސަލާމަތީކަންކަން ވަރުގަދަ ކޮށްފައެވެ. ޚާއްސަކޮށް ރައީސް ހުންނަވާ ހިލާލީގެ ހިމެނޭ ސަރަހައްދާއި، ރައީސް އޮފީސް ހިމެނޭ ސަރަހައްދުގައިވަނީ ސަލާމަތީ ފިޔަވަޅު އިތުރުކޮށްފައެވެ.