ރިޔާސީ އިންތިޚާބު ބާތިލް ކުރުމަށް ސްޕްރީމްކޯޓުން ހުކުމް ކޮށްފި

ރިޔާސީ އިންތިޚާބުގެ ފުރަތަމަ ބުރުގައި އޮޅުވާލުންތަކާއި މަކަރު ހަދާފައިވާ ކަމަށް ބުނެ އިންތިޚާބުގެ ފުރަތަމަ ބުރު ބާތިލްކުރުމަށް އެދި ޖުމްހޫރީޕާޓީން ސްޕްރީމް ކޯޓަށް ހުށަހަޅާފައިވާ މައްސަލަ އެޕާޓީން އެދިފައިވާ ގޮތަސް ސްޕްރީމް ކޯޓުން ދާދި ދެންމައަކު ހުކުމް ކޮށްފިއެވެ.

އެހުކުމުގައި ބުނެފައިވަނީ އިންތިޚާބުގެ ފުރަތަމަ ބުރު އޮކްޓޯބަރު މަހުގެ 20 ވަނަދުވަހުގެ ކުރިން ބޭއްވުމަށާއި، ދެވަނަ ބުރަށް ދާންޖެހިއްޖެ ކަމަށްވާނަމަ ނޮވެމްބަރުމަހުގެ 3 ވަނަ ދުވަހުގެ ކުރިން ބޭއްވުމަށް ސްޕްރީމް ކޯޓުންވަނީ އިލެކްޝަންސް ކޮމިޝަންގެ މައްޗަށް ހުކުމް ކުރައްވާފައެވެ.

އިންތިޚާބު ބާތިލް ކުރުމަށް ކޮށްފައިވާ ހުކުމުގައި ބުނެފައިވަނީ ފުލުހުންގެ ފޮރެންސިކް ޑިޕާޓްމެންޓްގެ ފަންނީ މީހުން ކުރި އޮޑިޓަކުން، 5623 ވޯޓުގައި މައްސަލަ އެބަހުރި ކަމަށް ދައްކާފައިވާ ކަމަށެވެ.

މީގެ އިތުރަށް 18 އަހަރު ނުވާ ކުދިންނާއި މަރުވެފައިވާ މީހުން ވޯޓުލާފައިވާ ކަމަށް ޖުމްހޫރީޕާޓީން ހުށަހަޅާފައިވާ ހެކިން އެނގޭ ކަމަށްވެސް ބުނެފައިވެއެވެ. އަދި އެކަކު ދެފަހަރު ވޯޓުލުން ފަދަ ކަންކަން ހިނގާފައިވާ ކަމަށްވެސް ބުނެފައިވެއެވެ. މީގެ އިތުރަށް ޑިޕާޓްމެންޓް އޮފް ނެޝަނަލް ރެޖިސްޓްރޭޝަން (ޑީއެންއާރުގެ) ރަޖިސްޓްރީގައި ނެތް މީހުންވެސް ވޯޓުލާފައިވާ ކަމަށް ބުނެފައިވެއެވެ.

ސްޕްރީމް ކޯޓުގެ ހުކުމުގައި ބުނެފައިވަނީ ފުރަތަމަ ބުރުގެ އިންތިޚާބުގައި ދެވަނަ ހޯއްދެވި ޕީޕީއެމްގެ ރިޔާސީ ކެންޑިޑޭޓް ޢަބްދުﷲ ޔާމީނާއި، ތިންވަނައަށް ވަޑައިގެންނެވި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމާ ދެމެދުގައި ހުރީ ގާތްގަނޑަކަށް 2،000 އެއްހައި ވޯޓު ކަމަށެވެ. އެހެން ކަމުން 5623 ވޯޓުގައި މައްސަލަ ހުރުމުން އެއީ އިންތިޚާބުގެ ނަތީޖާ އަށް އަސަރު ކުރާނެ ކަމެއް ކަމަށްވެސް ހުކުމުގައި ބުނެފައިވެއެވެ.

ސްޕްރީމްކޯޓުގެ 7 ފަނޑިޔާރުންގެ ތެރެއިން ފަނޑިޔާރު ޢަބްދުﷲ ސަޢީދާއި،ޢަލީ ޙަމީދާއި، އާދަމް މުޙައްމަދާއި، ފަނޑިޔާރު ޑރ. އަޙުމަދު އަބްދުﷲ ދީދީނެރުއްވާފައިވާ ހުކުމުގައި އިލެކްޝަންސް ކޮމިޝަންގެ މައްޗަށްވަނީ ދެން އިންތިޚާބު ބާއްވާއިރު ބައެއް ކަންކަން ލާޒިމް ކުރައްވާފައެވެ. އެގޮތުން ވޯޓު ކަރުދާސް އަލުން ޗާޕްކުރާއިރު އާ ސެކިއުރިޓީ ފީޗާތައް ހިމެނުމާއި، ކަނޑައެޅިފައިވާ ޚާއްސަ ކަންތައްތަކަށް ތަބާވުމަސްވެސް ބުނެފައިވެއެވެ.

އިލެކްޝަންސް ކޮމިޝަނުގެ ޑޭޓާ ބޭސް އާއި،ސާވާއަށް ވަނުމުގެ ފުރުސަތު ބޭރުގެ ފަރާތްތަކަށް އޮތްކަމަށްވެސް ބުނެފައިވެއެވެ. އެހެން ކަމުން އެކަން އެގޮތަށް ނުހިނގާނެ ގޮތަކަށް ކަންކަން ހަމަޖެއްސުމަށްވެސް ބުނެފައިވެއެވެ. އެކަން ކުރުމަށްޓަކައި ދައުލަތުގެ ކަމާބެހޭ ތަޖުރިބާކާރުންގެ ބެލުމުގެ ދަށުން އެ މަސައްކަތް ކުރުމަށްވެސް އިލެކްޝަންސް ކޮމިޝަންގެ މައްޗަށް ކުރި ހުކުމުގައި ބުނެފައިވެއެވެ.

މި ހުކުމް ކުރިތާ 72 ގަޑި އިރުގެ ތެރޭގައި އަލުން އިންތިޚާބު ބޭއްވުމުގެ މަސައްކަތް ފަށަން ޖެހޭނެ ކަމަށްވެސް ބުނެފައިވެއެވެ. މިކަން ކުރުމަށްޓަކައި ދައުލަތުގެ ސަލާމަތީ ޚިދުމަތްތަކާ ބެހޭ ބާރުތަކާއެކު މަޝްވަރާކޮށް އެކަން ކުރެވޭނެ އިންތިޒާމު ހަމަޖައްސުމަށްވެސް ބުނެފައިވެއެވެ. އިންތިޚާބުގެ ކަންކަން ހިނގާފައިވާ ގޮތުން އެކަން ވެފައިވަނީ ގާނޫނީ ހައިސިއްޔަތު ގެއްލޭ ގޮތަށް ކަމަށްވެސް ބުނެފައިވެއެވެ.