އިންތިޚާބު ކާމިޔާބު ކުރައްވާ ބޭފުޅަކާ ސަރުކާރު ހަވާލު ކުރާނެ ކަމުގެ ޔަގީންކަން ރައީސް ދެއްވި- ރައީސް އޮފީހުން

ރައީސުލްޖުމްހޫރިއްޔާ ޑޮކްޓަރ މުޙަންމަދު ވަޙީދާއި، ކުރީގެ ރައީސް އަދި އެމްޑީޕީގެ ރިޔާސީ ކެންޑިޑޭޓް މުޙަންމަދު ނަޝީދާ ދެބޭފުޅުން މުލީއާގޭގައި ރޭ ބޭއްވި ބައްދަލުވުމުގެ ބައެއް ތަފްސީލްތައް ރައީސް އޮފީހުން ހާމަ ކުރައްވައިފިއެވެ.

ރައީސް އޮފީހުން ހާމަ ކުރައްވާފައިވާ ގޮތުގައި މިބައްދަލު ވުމުގައި މައިގަނޑު ގޮތެއްގައި ވާހަކަފުޅު ދައްކަވާފައިވަނީ ރިޔާސީ އިންތިޚާބާ ބެހޭ ގޮތުންނެވެ. ރިޔާސީ އިންތިޚާބު ކާމިޔާބު ކުރައްވާ ބޭފުޅަކާ ގާނޫނީ ހަމަތަކުގެ މަތިން ވެރިކަން ހަވާލު ކުރައްވާނެ ކަމުގެ ޔަގީންކަން ރައީސް ވަހީދުވަނީ ނަޝީދަށް ދެއްވާފައި ކަމަށްވެސް ރައީސް އޮފީހުން ހާމަ ކުރައްވާފައިވެއެވެ.

ރައީސް އޮފީހުން ބުނެފައިވަނީ މިބައްދަލު ވުމުގައި ރައީސް ނަޝީދުވަނީ އިންތިޚާބު ބާއްވާނެ ތާރީޚެއް ކަނޑަނޭޅި ލަސްވަމުންދާތީ، އެކަމުގެ ކަންބޮޑުވުން ފާޅު ކުރައްވާފައެވެ.

މިކަމާބެހޭ ގޮތުން ރައީސް ވަހީދު ވިދާޅުވީ އިންތިޚާބާބެހޭ ނިންމެވުމެއް މާލަހެއްނުވެ، ސުޕްރީމް ކޯޓުން ނިންމަވާނެ ކަމަށް އުންމީދު ކުރައްވާ ކަމަށެވެ. އަދި ސުލްހަވެރި، އަވަސް، ޑިމޮކްރެޓިކް އިންތިޚާބެއް ރާއްޖޭގައި ބޭއްވި، ޤައުމަށް ހަމަޖެހުން އައިސް، ޞުލްޙަމަސަލަސްކަން ޤާއިމުވެގެންދާނެ ކަމަށް ރައީސުލްޖުމްހޫރިއްޔާ އުންމީދު ކުރައްވާ ކަމަށްވެސް ރައީސް އޮފީހުން ހާމަކުރައްވާފައިވެއެވެ.

ރިޔާސީ އިންތިޚާބުގައި އޮޅުވާލުމާއި މަކަރު ހަދާފައިވާ ކަމަށްބުނެ އިންތިޚާބުގެ ފުރަތަމަ ބުރު ބާތިލް ކުރުމަށް ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހީމްގެ ފަރާތުން ވަނީ ސްޕްރީމްކޯޓަށް މައްސަލައެއް ހުށަހަޅާފައެވެ. މިމައްސަލައާ ގުޅިގެން އެކޯޓުންވަނީ އެމައްސަލަ ނިމެންދެން އިންތިޚާބު ފަސް ކުރުމަށް އިލެކްޝަންސް ކޮމިޝަނުގެ މައްޗަށް އަމުރެއް ނެރެފައެވެ.

މިއަމުރަށް ކިޔަމަންވުމުގެ ގޮތުން އިލެކްޝަންސް ކޮމިޝަނުން ވަނީ އިންތިޚާބު ފަސް ކުރައްވާފައެވެ. އިންތިޚާބު ފަސްކުރުމުން ފުރަތަމަ ބުރުގައި އެންމެގިނަ ވޯޓު ހޯދި އެމްޑީޕީން ވަނީ އަވަސް އިންތިޚާބަކަށް ގޮވާލައި މުޒާހަރާ ކުރަން ފަށައިފައެވެ.

މިމުޒާހަރާތަކާ ގުޅިގެން ގައުމު ހަލަބޮލި ވެފައިވަނިކޮށް ރައީސް ވަހީދު އިއްޔެ ވިދާޅުވެފައިވަނީ ސްޕްރީމްކޯޓުގެ ހުކުމް އަވަސް ކުރުމުން މަސްރަހު ފިނިވާނެ ކަމަށް އުންމީދު ކުރައްވާ ކަމަށެވެ.