ދެވަނަބުރުގެ ވޯޓުލުން މާދަމާ ނޯންނާނެ – އިލެކްޝަން
27 ސެޕްޓެމްބަރ 2013 21:22
ރިޔާސީ އިންތިހާބުގެ ދެވަނަ ބުރުގެ ވޯޓުލުން މާދަމާ ނޯންނާނެ ކަމަށް އިލެކްޝަންސް ކޮމިޝަނުން މިރޭ ބުނެފިއެވެ.
ކޮމިޝަނުގެ ބައްދަލުވުންތަކެއް ބޭއްވުމަށް ފަހު މިރޭ ނެރެފައިވާ ބަޔާނެއްގައި ބުނެފައިވަނީ ދެވަނަބުރުގެ ވޯޓުލުމުގެ އެއްވެސް ކަމެއް ކުރައްވާ ކަމަށްވާނަމަ އެކަމެއް ހުއްޓުވުމަށް ސްޕްރީމް ކޯޓުން ސަލާމަތީ ބާރުތަކަށް އަމުރު ކުރައްވާފައިވާ ކަމަށެވެ.
އިލެކްޝަނުގެ ބަޔާނުގައި ބުނެފައިވަނީ އިންތިހާބުތަކާއި، ރައްޔިތުންގެ ހިޔާލު ހޯދުމުގެ އާންމު ވޯޓް ނަގާއިރު އެއްވެސް ބިރުވެރި ކަމާއި، ތަޅާފޮޅުމާއި، ބިރު ދެއްކުމާއި، ނުރަނގަޅު ނުފޫޒެއް އަދި ކޮރަޕްޝަނެއް ނެތި މިނިވަންކަމާއި އިންސާފުވެރިކަމާއެކު ވޯޓް ލުމުގެ މާހައުލެއް ކަށަވަރުކުރުމަކީ އިލެކްޝަންސް ކޮމިޝަނުގެ ގާނޫނީ މަސްއޫލިއްޔަތެއް ކަމަށެވެ. ނަމަވެސް އެފަދަ މާހައުލެއް ދިވެހިރާއްޖޭގައި މިވަގުތު އޮތް ކަމަށް ކޮމިޝަނުން ދެކެވަޑައި ނުގަންނަވާ ކަމަށެވެ.
"ވީމާ 28 ސެޕްޓެމްބަރު 2013 ގައި ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަ ބުރުގެ ވޯޓްލުން އެ ތާރީހުގައި ނޯންނާނެކަން އާންމުކޮށް އަންގައި އިއުލާންކުރީމެވެ. ރިޔާސީ އިންތިހާބުގެ ދެވަނަ ބުރުގެ ވޯޓްލުން ބޭއްވޭނެ ތާރީހް ފަހުން އިއުލާންކުރެވޭނެ ވާހަކަ ދެންނެވީމެވެ،" އެބަޔާނުގައިވެއެވެ.
ދެވަނަ ބުރުގެ ވޯޓު މާދަލުމަށް ގޮވާލަމުން އެމްޑީޕީން މިއަދުވެސް ވަނީ މަގުމައްޗަށް ނުކުމެފައެވެ. އަދި އިލެކްޝަނުން މިގޮތަށް ނިންމިއިރު ކަނޑައެޅިފައިވާ ތާރީޚުގައި އިންތީޚުބު ނުބޭއްވިދާނެތީ ބޭރުގެ ބައެއް ފަރާތްތަކުންދަނީ ކަންބޮޑުވުން ފާޅުކުރަމުންނެވެ.
ބޭރުގެ ފަރާތްތަކުން ރާއްޖޭގެ އިންތިޚާބުގެ ކަންކަމާ ބެހި ބަޔާންތައް ނެރެމުންދާތީ ރައީސް ޑރ. މުހައްމަދު ވަހީދުވަހީދު ވަނީ ރާއްޖޭގެ އިންތިޚާބުގެ ކަންކަމާ ނުބެހުމަށް ބޭރުގެ ފަރާތްތަކަށް ގޮވާލާފައެވެ.
ކިޔުންތެރިންގެ ހިޔާލު