ސްޕްރީމްކޯޓުގެ އަމުރު ސަރުކާރުގެ މުއައްސަސާތަކުން ނަގަހައްޓާނަން- ހޯމްމިނިސްޓްރީ
27 ސެޕްޓެމްބަރ 2013 0:34
ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބާތިލް ކޮށްދިނުމަށް އެދި ޖުމްހޫރީޕާޓީން ސްޕްރީމްކޯޓަށް ހުށަހެޅި މައްސަލާގައި އެކޯޓުން ނެރެފައިވާ އަމުރު ސަރުކާރުގެ ހުރިހާ މުއައްސަސާއަކުން ނަގަހައްޓާނެ ކަމަށް ހޯމްމިނިސްޓްރީ ހިންގެވުމާ ހަވާލުވެ ހުންނެވި ފިޝަރީޒް މިނިސްޓަރ އަހުމަދު ޝަފީއު ވިދާޅުވެއްޖެއެވެ.
"އިތިޚާބުގެ ދެވަނަބުރެއް ނުބޭއްވުމަށް ސްޕްރީމް ކޯޓުން އަންގަވާފައިވާ އެންގެވުމުން ސަރުކާރުގެ ހުރިހާ މުއައްސަސާތަކުން ނަގަހައްޓާނޭ ކަމުގައި އެންމެހާ ދިވެހި ރައްޔިތުންގެ މައުލޫމާތަށްޓަކައި ދަންނަވަން،" ޝަފީއުގެ ވިދާޅުވިއެވެ.
ސަރުކާރުން މިގޮތަށް ނިންމެވީ ދިވެހި ޖުމްހޫރިއްޔާގެ ގާނޫނު އަސާސީ މާނަކޮށް ގާނޫނު ތަންފީޒު ކުރުމުގެ އެންމެ ފަހުބަސް ބުނާ ފަރާތަކީ ސްޕްރީމްކޯޓު ކަމުގައި އެ ކޯޓުގެ ނިންމުންތައް ތަންފީޒު ކުރުމަކީ "ދިވެހިދައުލަތުގެ އެންމެހާ މުއައްސަސާ ތަކަށާއި، ސަރުކާރުގެ އިދާރާ ތަކަށާއި، އަދި އެންމެހާ ރައްޔިތުންނަށް ލާޒިމް ކަމެއްކަމުގައި ވާތީ،" އޭނާ ވިދާޅުވިއެވެ.
ޝަފީއު ވަނީ ސްޕްރީމް ކޯޓުގެ އަމުރަށް ތަބާވުމަށް ރައްޔިތުންނަށް ގޮވާލާފައެވެ. ސްޕްރީމްކޯޓުގެ އަމުރަކާ ޚިލާފަށް "ކަމެއް ކުރުމުމަކީ އަދި އެފަދަ ކަމެއް ކުރުމުގައި އެހީތެރިވެ ދިނުމަކީ ގާނޫނީ ކުށެއް ކަމުގައިވެސް ހަނދުމަކޮށް އަރުވަން. އަދި މިފަދަ ފަރާތްތަކާމެދު ސަރުކާރުން އަޅަންޖެހޭ ފިޔަވަޅުތައް އަޅާނެ ކަމުގައިވެސް ދަންނަނވަން" އޭނާވިދާޅުވިއެވެ.
ކިޔުންތެރިންގެ ހިޔާލު