އިންތިޚާބު އަލުން ބާއްވައި ދެއްވުމަށް އެދި ޖޭޕީ ކޯލިޝަނުން ހުށަހެޅި މައްސަލަ ސްޕްރީމް ކޯޓުން ބަލައިގެންފި
16 ސެޕްޓެމްބަރ 2013 19:52
މިމަހުގެ ހަތް ވަނަ ދުވަހު ރާއްޖޭގައި ބޭއްވި ރިޔާސީ އިންތިޚާބުގެ ފުރަތަމަ ބުރުގެ ނަތީޖާ ބާތިލްކޮށް، އެ އިންތިޚާބު އަލުން ބޭއްވުމުގެ އަމުރަކަށް އެދި ޖުމްހޫރީ ކޯލިޝަނުން ސުޕްރީމް ކޯޓަށް އިއްޔެ ހުށަހެޅި މައްސަލަ އެކޯޓުން މިއަދު ބަލައިގެންފިއެވެ.
ސުޕްރީމް ކޯޓުގެ ގަވާއިދާ އެއްގޮތަށް އެކޯޓުގެ ފަނޑިޔާރުންވަނީ މައްސަލަ ހުށަހެޅުމުގެ ހުއްދަ ޖުމްހޫރީކޯލީޝަނަށް ދީ އެކަން އެކޯލިޝަނަށް އަންގާފައެވެ. މިމައްސަލައަކީ ވަރަށް އަވަހަށް ނިންމަންޖެހޭ މައްސަލައެއް ކަމަށް ދެކެވަޑައިގަންނަވާ ކަމަށް ޖުމްހޫރީޕާޓީގެ ޕާލިމެންޓްރީ ގްރޫޕްގެ މެންބަރު އަދި ފުވައްމުލަކު މެދު ދާއިރާގެ މެންބަރު ޝިފާގު މުފީދު މިއަދު ވިދާޅުވިއެވެ. އޭނާ ވިދާޅުވީ އިންތިޚާބުގެ ދެވަނަ ބުރު މިމަހުގެ 28 ވަނަ ދުވަހު ބާއްވާއިރު އޭގެ ކުރިން ކޯޓުން މިމައްސަލައަށް ގޮތެއް ނިންމަން ޖެހޭނެ ކަމަށް ގަބޫލު ކުރައްވާ ކަމަށެވެ. މިމައްސަލަ އަވަސް ކުރައްވާނެ ކަމަށް ކޯޓުންވެސްވަނީ ހާމަކުރައްވާފައެވެ.
ޖުމްހޫރީ ކޯލިޝަނުންވަނީ އިންތިޚާބާ ގުޅިގެން ހައިކޯޓަށްވެސް މައްސަލައެއް ވައްދާފައެވެ. އެއީ ވޯޓުލީ މީހުންގެ ލިސްޓާއި ނަތީޖާ ޝީޓްތައް ހޯދުމަށް އެދި ހުށަހެޅި މައްސަލައެކެވެ. މިމައްސަލައިގެ އަޑު އެހުންތައް އިއްޔެ ނިންމާލުމަށްފަހު ދެންއޮންނަ ދުވަހަކު ހުކުމް އިއްވާނެ ކަމަށް އެކޯޓުންވަނީ އަންގާފައެވެ.
ޖުމްހޫރީ ކޯލިޝަނުން ސްޕްރީމް ކޯޓަށް ހުށަހެޅި މައްސަލައިގެ ތެރެއަށް ވަންނަން އެމްޑީޕީން މިހާރު ނިންމާފައިވާ ކަމަށް އެޕާޓީން ވަނީ ބުނެފައެވެ. އެޕާޓީގެ ތަރުޖަމާނު އިމްތިޔާޒް ފަހުމީ މިއަދު ވިދާޅުވީ އެޕާޓީން މިމައްސަލައިގެ ތެރެއަށް ވަންނަ ނިންމެވީ އެޕާޓީންވެސް ކެންޑިޑޭޓަކު އިންތިޚާބުގައި ވާދަކުރަމުންދާތީ ކަމަށެވެ. އެހެން ކަމުން އެކަމުގެ ތެރޭގައި އެޕާޓީގެ މަސްލަހަތު އޮންނާނެ ކަމަށް ދެކެވަޑައި ގަންނަވާ ކަމަށްވެސް އޭނާ ވިދާޅުވިއެވެ. އަދި އެޕާޓީގެ ރިޔާސީ ކެންޑިޑޭޓް ރައީސް ނަޝީދަކީ ފުރަތަމަ ބުރުގައި ނެގި ވޯޓުގައި އެންމެ ގިނަ ވޯޓު ހޯއްދަވާފައިވާ ބޭފުޅާ ކަމަށެވެ.
އެމްޑީޕީންވަނީ ޖުމްހޫރީ ކޯލީޝަނުން ހައިކޯޓަށް ހުށަހެޅި މައްސަލައިގެ ތެރެއަށްވެސް ވަދެފައެވެ.
ކިޔުންތެރިންގެ ހިޔާލު