ހުސައިން މުހައްމަދާއި، އަހުމަދު މުހައްމަދާއި، ހަސަން ލަތީފް ޖޭޕީއަށް ސޮއިކޮށްފި

ޑީއާރުޕީގެ މެންބަރުންގެ ގޮތުގައި ކުރިން ތިއްބެވި ތިން ބޭފުޅަކު މިރޭ ޖުމުހޫރީ ޕާޓީއަށް ސޮއިކުރައްވައިފި އެވެ.

މާފަންނު ކުނޫޒުގައި މިރޭ ޖުމްހޫރީ ޕާޓީން ބޭއްވި "ރައްޔިތުންނާ ގާތަށް" މި ޖަލްސާގައި އެޕާޓީއަށް ސޮއިކުރެއްވީ ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު ހަސަން ލަތީފްއާއި، މަތިވެރި ދާއިރާގެ މެންބަރު ހުސެއިން މުހައްމަދާއި، ނައިފަރު ދާއިރާގެ މެންބަރު އަހްމަދު މުހައްމަދެވެ.

މިގޭ އިތުރަށް ރައީސް ޑރ ވަހީދުގެ ސަރުކާރުގެ އެޑިއުކޭޝަން މިނިސްޓަރުކަން ކުރެއްވި ޑރ އާސިމް އަހްމަދާއި، ޓީވީއެމްގެ ކުރީގެ ސީއީއޯ އަލީ ޚާލިދާއި، ޑީއާރުޕީގެ ކުރީގެ ކައުންސިލް މެންބަރު އަހްމަދު ނިޒާމު (ކެލާ ނިޒާމާ)، އެމްޓީސީސީގެ ކުރީގެ ސީއީއޯ ޑރ. އަހްމަދު އަދުހަމްއާއި، ފިޝަރީޒް މިނިސްޓްރީގެ ކުރީގެ ޑެޕިއުޓީ މިނިސްޓަރު އަލީ ސާލިހު ވެސް ވަނީ ޖުމްހޫރީޕާޓީއަށް ސޮއި ކުރައްވާފައެވެ.

މީގެ އިތުރަށް ބައެއް ރަށްރަށުން ޖުމްހޫރީޕާޓީއާ އަލަށް ގުޅުނު އާންމު މެންބަރުންގެ ފޯމުތައްވެސް ވަނީ ޖުމްހޫރީޕާޓީގެ ލީޑަރު ގާސިމް އިބްރާހީމާ ހަވާލު ކުރައްވާފައެވެ.

މައުލޫމާތު ލިބިފައިވާ ގޮތުގައި މިހާރުގެ ހޯމްމިނިސްޓަރ އުމަރު ނަސީރުވެސްވަނީ ޖުމްހޫރީޕާޓީއާ ގުޅެން ނިންމަވާފައެވެ. އަދި ރައްޔިތުންގެ މަޖިލީހުގެ އިތުރު މެންބަރުން ތަކެއްވެސް ސޮއިކުރާނެ ކަމުގެ މައުލޫމާތު ލިބިފައިވެއެވެ.