މަޖިލީހުގެ އަޣުލަބިއްޔަތު ލިބޭއިރަށް ޝަރުޢީ ނިޒާމް އިސްލާހު ކުރާނަން: ރައީސް ނަޝީދު
17 ފެބްރުއަރީ 2014 23:50
ރައީސް ނަޝީދު
އަންނަ މަހު 22 ވަނަ ދުވަހު ރާއްޖޭގައި ބާއްވާ އަށާރަވަނަ ރައްޔިތުންގެ މަޖިލީހުގެ އަޣުލަބިއްޔަތު އެމްޑީޕީއަށް ލިބިއްޖެނަމަ ޝަރުޢީ ނިޒާމް އިސްލާހު ކުރައްވާނެ ކަމަށް ކުރީގެ ރައީސް މުޙައްމަދު ނަޝީދު މިރޭ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެމްޑީޕީގެ ފަރާތުން ވިލިމާލޭ ދާއިރާ އަށް ކުރިމަތި ލައްވާފައިވާ އައްޝައިޚް ޙުސައިން ރަޝީދުގެ ކެމްޕެއިން ހަރަކާތް ފެށުމުގެ ގޮތުން ވިލިގިލީ އަވަށުގައި ހުންނަ އެމްޑީޕީ ހަރުގޭގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވީ މަޖިލީހުގެ އަޣުލަބިއްޔަތު ލިބޭއިރަށް ސުޕްރީމް ކޯޓުގެ އިތުރަށް ޖުޑީޝަލް ސާވިސް ކޮމިޝަނާއި، ކޯޓުތަކާއި، ޝަރުޢީ ނިޒާމް އެއްކޮށް އިސްލާހު ކުރައްވާނެ ކަމަށެވެ. އެމަނިކުފާނު ވިދާޅުވީ އެމްޑީޕީ ނޫނީ ޝަރުޢީ ނިޒާމް އިސްލާހު ކުރާ ވާހަކަ އެހެން ޕާޓީއަކުން ނުދައްކާ ކަމަށެވެ. ނަމަވެސް އެމްޑީޕީން އެވާހަކަ ދައްކައި އެކަމަށް ޢަމަލުވެސް ކުރައްވާނެ ކަމަށް ވިދާޅުވިއެވެ.
"އަޅުގަނޑުމެން ފަށައިފައިވާ ވަޢުދެއް އިންސާފުގެ ދަތުރު. އެ ދަތުރު އިރާދަ ކުރެއްވިއްޔާ އަޅުގަނޑުމެން ނިންމާނަން،" އެމަނިކުފާނު ވިދާޅުވިއެވެ. އެމަނިކުފާނު ވިދާޅުވީ އެމްޑީޕީގެ ސަރުކާރު ވައްޓާލީވެސް އެދަތުރު ފެށްޓެވުމުން ކަމަށެވެ. އެމަނިކުފާނު ވިދާޅުވީ ޝަރުޢީދާއިރާ އިސްލާހު ކުރެއްވުމަށް ކުރައްވަމުން ގެންދަވާ މަސައްކަތްވެސް ކާމިޔާބު ކުރައްވާނެ ކަމަށެވެ.
ނަޝީދު ވިދާޅުވީ އިންސާފެއްނެތް ތަނެއްގައި ހަމަޖެހުމެއް ނޯންނާނެ ކަމަށެވެ. ސްޕްރީމްކޯޓުން މިހާރުވެސް ގެންދަވަނީ އިލެކްޝަންސް ކޮމިޝަންގެ މެމްބަރުން އެތަނަށް ހާޒިރުކޮށް ބިރު ދައްކަމުން ކަމަށްވެސް އެމަނިކުފާނު ވިދާޅުވިއެވެ.
"ބަޣާވާތުގައި" އުޅުނު މީހުންނަށް ވަޒީފާ ދޭންޖެހޭތީ ސަރުކާރުން އުފައްދަން ވައުދުވެފައިވާ ވަޒީފާގެ ފުރުސަތު ތަނަވަސް ކުރެވިފައިނުވާ ކަމަށް ވިދާޅުވެ ނަޝީދުވަނީ ސަރުކާރަށްވެސް ފާޑުވިދާޅުވެފައެވެ.
ކިޔުންތެރިންގެ ހިޔާލު