ޚުދުމުޚުތާރު ވެރިކަމެއް ގާއިމް ކުރުމުގެ ފުރުސަތެއް ނުދޭނަން: ރައީސް ނަޝީދު

އެމްޑީޕީގެ ވާދަވެރި ސިޔާސީ ބޭފުޅުން ރާއްޖޭގައި ޚުދުމުޚުތާރު ވެރިކަމެއް ގާއިމް ކުރުމުގެ ފުރުސަތު ދެންނުދެއްވާނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސް މުހައްދު ނަޝީދު ރޭ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ "އެއްބުރުން" ނަމުގައި އަލުން ކެންޕޭން ފެށުމަށް އެމްޑީޕީން ލޮނުޒިޔާރަތްކޮޅުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ "އަޅުގަނޑުމެންގެ ވާދަވެރިންގެ އަމާޒަކަށްވެފައި މި އޮންނަނީ އަނެއްކާވެސް މި ރާއްޖޭގައި ޚުދުމުޚުތާރު ވެރިކަން ހިންގުން،" ކަމަށެވެ. އެއީ އެބޭފުޅުންނަށް އެނގިވަޑައިގަންނަވާ ވެރިކަމުގެ ނިޒާމު ކަމަށްވެސް ވިދާޅުވިއެވެ. އެހެން ކަމުން އެނިޒާމް ރާއްޖޭގައި "ފައްކާކުރަން" އެބޭފުޅުންނަށް އެނގިވަޑައި ގަންނަވާ ކަމަށެވެ. "އަޅުގަނޑުމެން އެ ބޭފުޅުންނަށް އެ ފުރުސަތެއް ނުދޭނަން،" ކަމަށް ނަޝީދު ވިދާޅުވި އެވެ.

ނަޝީދު ވިދާޅުވީ އެމްޑީޕީއަށް އޮތްތާއިދާއި ލިބެމުން އަންނަ ވޯޓުގެ އަދަދު މިހާރުވަނީ ވަރަށް ބޮޑަށް އިތުރުވާން ފަށައިފައި ކަމަށެވެ. އެހެން ކަމުން ފަހަރަކީ "އެއްބުރުން" އިންތިޚާބު ކާމިޔާބު ކުރައްވާނެ ފަހަރު ކަމަށެވެ.

މިދިޔަފަހަރު ރައީސް ނަޝީދު ވަނީ 95،000 އަށް ވުރެ ގިނަ ވޯޓު ހޯއްދަވާފައެވެ. ނަމަވެސް އެވަރުން އިންތިޚާބު ކާމިޔާބުވާ ވަރެއް ނުވެއެވެ. އެހެން ކަމުން 51 ޕަސެންޓް ހަމަކުރަން މަދުވި 10،000 ވޯޓު މިފަހަރު ލިބޭނެ ކަމަށް ނަޝީދާއި މުޅިޕާޓީންވެސް ވަރަށް ބޮޑަށް ޔަގީން ކުރައްވައެވެ.

އިންތިޚާބުގެ ފުރަތަމަ ބުރަށްފަހު ޑީއާރުޕީގެ ލީޑަރު އަހުމަދު ތަސްމީން އަލީއާއި، އޭޑީކޭ ނާޝިދުގެ އިތުރަށް ބައެއް އެހެން ބޭފުޅުންވެސް ވަނީ އެމްޑީޕީ އަށް ތާއިދު ކުރައްވަން ފަށްޓަވާފައެވެ.

ރޭހެ ޖަލްސާގައި ރައީސް ނަޝީދާއި އެމްޑީޕީގެ އިސްބޭފުޅުންވަނީ ވަރަށް ބޮޑަށް ސުޕްރީމް ކޯޓަށް ފާޑުވިދާޅުވެފައެވެ. ނަޝީދު ވިދާޅުވީ ތަސްމީން ރައީސް ވަހީދުގެ ފަހަތަށް ވަޑައިގެންނެވުމަށް ސްޕްރީމް ކޯޓުން ހުކުމް އިއްވުމަކީވެސް އެކަށީގެންވާ ކަމެއް ކަމަށެވެ.

ރޭގެ ޖަލްސާގައި ނަޝީދު ވިދާޅުވީ ވާދަވެރިންގެ ބޭނުމަކަށްވާނީ އިންތިޚާބެއް ނުބޭއްވުން ކަމަށެވެ.