މަޖިލީހުންވަނީ މިއަހަރު ބުރަމަސައްކަތެއް ކޮށްފައި: ޝާހިދު

ރައްޔިތުންގެ މަޖިލީހުން މިއަހަރުވަނީ ވަރަށް ބުރަ މަސައްކަތްތަކެއް ކުރައްވާފައި ކަމަށް މަޖިލީހުގެ ރައީސް އަބްދުﷲ ޝާހިދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަހަރަށް މަޖިލީހުގެ ޖަލްސާ ނިމުނީކަން ހާމަކުރެއްވުމަށް މަޖިލީހުގައި މިއަދު ވާހަކަ ދައްކަވަމުންނެވެ.

"މިއީ ރައްޔިތުންގެ މަޖިލީހުގެ ތާރީޚުގައި ރައްޔިތުންގެ މަޖިލީހަކުން ކުރެވިފައިވާ ވަރަށް ބުރަ މަސައްކަތެއް،” މަޖިލީހުގެ ރައީސް ޝާހިދު ވިދާޅުވިއެވެ. އެމަނިކުފާނު ވިދާޅުވީ މި މަސައްކަތްތައް ކުރެއްވުމުގައި މަޖިލީހުގެ ކޮމިޓީތަކުންނާއި، ކޮމިޓީތަކުގެ މުޤައްރިރުންނާއި، މެންބަރުން ވަރަށް ބުރަ މަސައްކަތްތަކެއް ކުރެއްވި ކަމަށެވެ.

ޝާހިދު ވިދާޅުވީ މިއަހަރުގެ ތާވަލްގައިވާ އެންމެ ފަހުގެ ޖަލްސާ މިއަދު ނިމުނީ ކަމަށެވެ. 17 ވަނަ ރައްޔިތުންގެ މަޖިލީހުގެ ދެން ބާކީ އޮތީ އެއް ދައުރު ކަމަށްވެސް ވިދާޅުވިއެވެ. މިއަހަރުގެ ތެރޭގައި 19 ބިލެއް ޤާނޫނަކަށް ވަނީ ފާސްކޮށްފައެވެ. ޖުމްލަ 96 ޤާނޫނު މަޖިލީހުންވަނީ ފާސްކުރައްވާފައި ކަމަށް މަޖިލީހުގެ ރައީސް ވިދާޅުވިއެވެ.

ޝާހިދު ވިދާޅުވީ 60 ބިލް ކޮމިޓީ ތަކުގައި މިހާރު އެބައޮތްކަމަށެވެ. ކުރިއަށްއޮތް ދެމަސް ދުވަހުގެ ތެރޭގައި ކޮމިޓީތަކުގެ މަސައްކަތް އިތުރަށް ހަލުވި ކޮށްދެއްވާނެ ކަމަށް އުއްމީދު ކުރައްވާ ކަމަށްވެސް ވިދާޅުވިއެވެ.

މިއަދުގެ ޖަލްސާގައި މަޖިލީހުންވަނީ މީހުން ޓްރެފިކް ކުރުން ހުއްޓުވުމުގެ ކަންތައް ވިލަރެސްކުރާ ކޮމިޓީ އަށް މަޖިލީހުގެ މެމްބަރެއްގެ ހައިސިއްޔަތުން ހުޅުހެންވޭރު ދާއިރާގެ މެންބަރު ރީކޯ މޫސާ މަނިކު އައްޔަން ކުރައްވާފައެވެ. މަޖިލީހުގެ އާ އަހަރު މަޖިލީހުގެ ފުރަތަމަ ޖަލްސާ އޮންނާނީ މާރޗް މަހުގެ ފުރަތަމަ ހަފުތާގަ އެވެ.