ރައީސުލްޖުމްހޫރިއްޔާ ކެބިނެޓް މިނިސްޓަރުން އައްޔަންކޮށް ނިންމަވައިފި
21 ނޮވެމްބަރ 2013 23:18
ރާއްޔޭގެ ރައީސުލްޖުމްހޫރިއްޔާ ކަމުގެ މަގާމާ އަލަށް ހަވާލުވެ ވަޑައިގެންނެވި އަބްދުﷲ ޔާމީން އަބްދުލް ގައްޔޫމް އެމަނިކުފާނުގެކެބިނެޓް މިނިސްޓަރުން އައްޔަން ކޮށްނިންމަވައިފިއެވެ.
އެމަނިކުފާނު ކެބިނެޓުގައި މިހާތަނަށް ވަޒީރުން އައްޔަން ނުކޮށްއޮތް ތިން ވުޒާރައަށް މިއަދު ވަނީ ބޭފުޅުން އައްޔަން ކުރައްވާފައެވެ. އެގޮތުން މިނިސްޓަރ އޮފް އެޑިޔުކޭޝަން ކަމުގެ މަޤާމަށް، އައްޔަން ކުރެއްވީ ގަލޮޅު، ކުދިރުވާލިގޭ، ޑޮކްޓަރ ޢާއިޝަތު ޝިހާމެވެ. މިނިސްޓަރ އޮފް ހެލްތު އެންޑް ޖެންޑަރ ކަމުގެ މަޤާމަށް ހަމަޖެއްސެވީ ގަލޮޅު، މަނާމް، ޑޮކްޓަރ މަރިޔަމް ޝަކީލާ އެވެ.އަދި މިނިސްޓަރ އޮފް ޔޫތު އެންޑް ސްޕޯޓްސް ކަމުގެ މަޤާމަށް އައްޔަން ކުރެއްވީ ފުވައްމުލަކު، ދޫޑިގަމް، ކުނަހަނގާލިގޭ، މުޙައްމަދު މަލީހު ޖަމާލެވެ.
މި 3 ބޭފުޅުން މަގާމުގެ ހުވައި ކުރައްވައި ފަތްކޮޅު ދެއްވުން އޮތީ ރައީސުލްޖުމްހޫރިއްޔާގެ އޮފީހުގައި މިއަދު ހެނދުނު 10 ޖެހިއިރު ބޭއްވި ރަސްމިއްޔާތެއްގައެވެ.
މިބޭފުޅުން ހުވައި ކުރެއްވީ، ސުޕްރީމް ކޯޓްގެ ފަނޑިޔާރު އަލްއުސްތާޒު ޢަބްދުﷲ ޢަރީފްގެ ކުރިފުޅުމަތީގައެވެ. ހުވާކުރެއްވުމަށްފަހު، އެބޭފުޅުން ވަޒީރުންގެ މަޖިލީހުގެ މެންބަރުންގެ ހުވައިގެ އިޤްރާރުގައި ސޮއިކުރެއްވިއެވެ.
މިބޭފުޅުންގެ އިތުރަށް ރައީސުލްޖުމްހޫރިއްޔާވަނީ އެމަނިކުފާނުގެ އޮފީހުގެ މިނިސްޓަރު ކަމަށްވެސް މިއަދު ބޭފުޅަކު އައްޔަން ކުރައްވާފައެވެ. އެމަގާމަށް އައްޔަން ކުރައްވާފައިވަނީ، ހުވަދުއަތޮޅު ދެކުނުބުރީ ގައްދޫ ރޯޒްމާގޭ ޢަބްދުﷲ އަމީނެވެ. އަމީން މިމަޤާމަށް ޢައްޔަން ކުރެއްވި ކަމުގެ ފަތްކޮޅު، އަމީނާ ޙަވާލުކުރެއްވީ، މިކަމަށްޓަކައި މިއަދު ހެނދުނު ބޭއްވެވި ރަސްމިއްޔާތުގައި، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ.
މީގެ އިތުރަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، ވަނީ ދިވެހި ދައުލަތުގެ ބަންޑާރަ ނައިބު ކަމުގެ މަޤާމަށް، އައްޑުއަތޮޅު ފޭދޫ ސީނިޔާގޭ އަލްއުސްތާޒު މުޙައްމަދު އަނިލް މިރޭ ޢައްޔަނު ކުރައްވައި، އެ މަނިކުފާނަށް މަޤާމުގެ ފަތްކޮޅު ދެއްވާފައެވެ.
ކިޔުންތެރިންގެ ހިޔާލު