ކެބިނެޓަށް އިތުރު ހަ ވަޒީން މިއަދު އައްޔަން ކުރައްވައިފި

ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، އެމަނިކުފާނުގެ ކެބިނަޓަށް އިތުރު 6 ވަޒީރަކު މިއަދު އައްޔަން ކުރައްވައިފިއެވެ.

މިއަދު ހަމަޖެއްސެވި ވަޒީރުންނަކީ މިނިސްޓަރ އޮފް އިސްލާމިކް އެފެއާޒް ކަމަށް ޑޮކްޓަރ މުޙައްމަދު ޝަހީމް ޢަލީ ސަޢީދު، މިނިސްޓަރ އޮފް ހޯމްއެފެއާޒް ކަމަށް ހ. ދޮންޖޭމުގޭ ޢުމަރު ނަޞީރު ނަސީރު، މިނިސްޓަރ އޮފް ފިޝަރީޒް އެންޑް އެގްރިކަލްޗަރ ކަމަށް ޑޮކްޓަރ މުޙަންމަދު ޝައިނީ، މިނިސްޓަރ އޮފް އިކޮނޮމިކް ޑިވެލޮޕްމަންޓް ކަމަށް މުޙަންމަދު ސަޢީދު، މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ކަމަށް، ޑޮކްޓަރ މުޙައްމަދު މުޢިއްޒު، މިނިސްޓަރ އޮފް އެންވަޔަރަންމަންޓް އެންޑް އެނަރޖީ ކަމަށް ޠާރިޤު އިބްރާހީމެވެ.

ވަޒީރުންގެ މަޖިލީހަށް މިބޭފުޅުން އައްޔަން ކުރައްވައި ހުވައި ކުރެއްވުމާއި، ފަތްކޮޅު ހަވާލު ކުރެއްވުން އޮތީ މިއަދު ހަވީރު 4 ޖެހިއިރު ރައީސުލްޖުމްހޫރިއްޔާގެ އޮފީހުގައެވެ.މިބޭފުޅުންނަށް ހުވައިލައިދެއްވީ ސުޕްރީމް ކޯޓްގެ ފަނޑިޔާރު އަލްއުސްތާޒު ޢަބްދުﷲ ޢަރީފެވެ. ހުވާކުރެއްވުމަށްފަހު، އެބޭފުޅުން ވަޒީރުންގެ މަޖިލީހުގެ މެންބަރުންގެ ހުވާގެ އިޤްރާރުގައި ސޮއިކުރެއްވިއެވެ.

މީގެ އިތުރަށް ރައީސުލްޖުމްހޫރިއްޔާގެ އޮފީހުގެ މިނިސްޓަރ ކަމުގެ މަޤާމަށް، ރައީސް ވަނީ ކުރީގެ ޔޫތުމިނިސްޓަރ މުޙައްމަދު ޙުސައިން ޝަރީފް، ޢައްޔަނު ކުރައްވައިފައެވެ. އަދި ކޮމިޝަނަރ ޖެނެރަލް އޮފް ކަސްޓަމްސް ގެ މަގާމަށް ރައީސް ވަނީ ކުރީގެ އިކޮނޮމިކް މިނިސްޓަރ އަޙްމަދު މުޙަންމަދު، ހަމަޖައްސަވާފައެވެ. މި މަޤާމަށް އެމަނިކުފާނު އައްޔަނު ކުރައްވާފައިވަނީ، ވަޒީރުން ފެންވަރުގައެވެ.

މީގެ ކުރިން ރައީސް ޔާމީންވަނީ ކެބިނެޓަށް 5 މެންބަރުން އައްޔަން ކުރައްވާފައެވެ.