ކޯޓު އަމުރެއް ތަންފީޒު ކުރުމަށްޓަކައި ފުލުހުން 4 މީހަކު ހޯދަން ފަށައިފި

ފުލުހުންގެ މައްޗަށް ކްރިމިނަލް ކޯޓުން ކޮށްފައިވާ އަމުރެއް ތަންފީޒު ކުރުމަށްޓަކައި 4 މީހަކު ހޯދުމުގެ މަސައްކަތް ފުލުހުން ފަށައިފިއެވެ.

މި މީހުންނަކީ، ސ. ހުޅުދޫ، ޖުވެލަރީ، ޙަސަން ފަރުޛީން (31އ) އާއި ރ. ކަންދޮޅުދޫ، ބާރޑްވިލާ، ޢަބްދުﷲ އަޙްމަދު ވަސީމް (25އ) އާއި ޅ. ނައިފަރު، ބިލްޑިންގވިލާ، ޔާމީން މުޙައްމަދު (24އ) ގެ އިތުރުން ހދ. ނޭކުރެންދޫ، ކެނެރީވިލާ، މުޙައްމަދު ރިޝީފް (23އ) އެވެ.

މި މީހުން ހޯދައި ފުލުހުންގެ ބަންދުގައި ބައިތިއްބައިގެން ކޯޓަށް ހާޒިރު ކޮށްދެއްވުމަށް ފުލުހުންނަށް އަމުރު ކޮށްފައިވަނީ ކްރިމިނަލް ކޯޓުގައި ހިނގަމުންދާ ތަފާތު މައްސަލަތަކާ ގުޅިގެން ކޯޓަށް ހާޒިރުވުމަށް އެމީހުންނަށް އެންގުމުން ހާޒިރުނުވި މައްސަލައިގައެވެ.

މިމީހުންގެ ތެރެއިން ޙަސަން ފަރުޛީނަކީ ކްރިމިނަލް ކޯޓަށް ހުށަހެޅިފައިވާ މަނާކުރެވިފައިވާ މަސްތުވާއެއްޗެއް ބޭނުންކުރުމާއި ބޭނުންކުރުމަށްޓަކައި އަތުގައި ބެހެއްޓުމުގެ ކުށުގެ މައްސަލައަކަށް ހާޒިރު ކުރުމަށް ބޭނުންވެ ހާޒިރުނުކުރެވިފައިވާ މީހެކެވެ. އަދި ޢަބްދުﷲ އަޙްމަދު ވަސީމްއަކީ ކްރިމިނަލް ކޯޓަށް ހުށަހެޅިފައިވާ ކެނެބިސް ބޭނުންކުރުމުގެ ކުށުގެ މައްސަލައަކަށް ހާޒިރުކުރުމަށް ބޭނުންވެ ހާޒިރު ނުކުރެވިފައިވާ މީހެއް ކަމަށް ފުލުހުން ހާމަކުރައްވާފައިވެއެވެ.

ޔާމީން މުޙައްމަދުއަކީ ކްރިމިނަލް ކޯޓަށް ހުށަހެޅިފައިވާ މަނާކުރެވިފައިވާ މަސްތުވާއެއްޗެއް ބޭނުންކުރުމާއި ވިޔަފާރިކުރުމަށްޓަކައި އަތުގައި ބެހެއްޓުމުގެ ކުށުގެ މައްސަލައަކަށް ހާޒިރުކުރުމަށް ބޭނުންވެ ހާޒިރުނުކުރެވިފައިވާ މީހެކެވެ. އަދި މުޙައްމަދު ރިޝީފް އަކީ ކްރިމިނަލް ކޯޓަށް ހުށަހެޅިފައިވާ މަނާކުރެވިފައިވާ މަސްތުވާއެއްޗެއް ބޭނުން ކުރުމަށްޓަކައި އަތުގައި ބެހެއްޓުމުގެ ކުށުގެ މައްސަލައަކަށް ހާޒިރުކުރުމަށް ބޭނުންވެ ހާޒިރުނުކުރެވިފައިވާ މީހެއް ކަމަށްވެސް ފުލުހުންވަނީ ހާމަ ކުރައްވާފައެވެ.

މިމީހުންނާ ބެހޭ އެއްވެސް މަޢުލޫމާތެއް ލިބިފައިވާނަމަ އެ މަޢުލޫމާތެއް މޯލްޑިވްސް ޕޮލިސް ސަރވިސްގެ ހޮޓްލައިން ނަމްބަރު 3322111 އަށް ނުވަތަ ޕޮލިސް ކަސްޓޯޑިއަލް ޑިޕާޓްމަންޓްގެ ނަމްބަރު 9991442 އަށް ގުޅުއްވައި ހިއްސާކުރެއްވުމަށް ފުލުހުންވަނީ އަދިފައެވެ.

ރާއްޖޭގެ ރަށަކުން ނަމަ އެރަށެއްގެ ޕޮލިސް ސްޓޭޝަނަކަށް އަދި ޕޮލިސް ސްޓޭޝަން ނެތް ރަށެއްނަމަ އެރަށެއްގެ ކައުންސިލް އިދާރާ މެދުވެރިކޮށް ފުލުސް އޮފީހަށް އަންގައިވައި ދެއްވުމަށްވެސް އެދިފައިވެއެވެ.

މި މީހުންނާއި ބެހޭ މަޢުލޫމާތު ފުލުހުންނާ ހިއްސާކުރާ ފަރާތްތަކަށް ލިބިދޭންޖެހޭ ހިމާޔަތާއި ރައްކާތެރިކަން ފޯރުކޮށްދޭނެކަމުގެ ޔަޤީންކަންވެސް ފުލުހުންވަނީ ދެއްވާފައެވެ.