ހުދުޖަނގިޔާއެއްގެ މައްސަލައެއްގައި ފަނަރަ މީހެއްގެ މައްޗަށް ދައުވާ ކުރަން ފޮނުވައިފި

އަރިއަތޮޅު އުތުރުބުރީ ރަސްދޫ މެޖިސްޓްރޭޓް ކޯޓުގެ ކުރިމައްޗަވާ ގޮތަށް ނަގާފައިހުރި ހުދުކުލައިގެ ބޮޑު ޖަނގިޔާއެއް ނެގުމަށްފަހު އެޖަނގިޔާ ހިފައިގެން ރަސްދޫ ޕޮލިސް ސްޓޭޝަނަށް ފުލުހުން ގެންދަނިކޮށް ފުލުހުންނަށް ހުރަސްއަޅައި މާރާމާރީ ހިންގުމުގެ ސަބަބުން 15 މީހެއްގެ މައްޗަށް ދައުވާ ކޮށްދިނުމަށް އެދި ޕްރޮސެކިޔުޓަރޖެނެރަލްއަށް ފުލުހުން ފޮނުވައިފިއެވެ.

މިމައްސަލަ ތަހުގީގު ކުރުމަށްފަހު ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވަނީ މި އޮކްޓޯބަރު މަހުގެ 30 ވަނަ ދުވަހު ކަމަށް ފުލުހުން ބުނެފައިވެއެވެ.

މިހާދިސާ ހިނގާފައިވަނީ މިއަހަރުގެ ސެޕްޓެމްބަރު މަހުގެ 25 ވަނަ ދުވަހުގެރޭ 9.30 އެހައިކަންހާއިރުއެވެ.

އެޖަނގިޔާ ހިފައިގެން ޕޮލިސް ސްޓޭޝަނަށް ފުލުހުން ދަނިކޮށް މިމީހުންވަނީ ފުލުހުންގެ ގައިގާ ތަޅައި މާރާމާރީ ހިންގައިފައި ކަމަށް ފުލުހުންވަނީ ހާމަކޮށްފައެވެ. މީގެ އިތުރަށް އެމީހުންވަނީ ފުލުހުންގެ ވާޖިބަށާއި،ފުލުހުންގެ ދައުރު އަދާކުރުމަށް ހުރަސްއަޅާފައި ކަމަށްވެސް ފުލުހުން ވަނީ ބުނެފައެވެ.

މިމައްސަލައިގެ ތަހުގީގު ނިންމުމަށްފަހު ދަޢުވާކުރުމަށް ޓަކައި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވަނީ އއ. ރަސްދޫ 14 މީހަކާއި ހދ. ކުޅުދުށްފުށީ މީހެއްގެ މައްޗަށެވެ. މީމިހުންނަކީ އުމުރުން 19 އަހަރާއި 47 އަހަރާ ދެމެދުގެ މީހުން ކަމަށް ފުލުހުންވަނީ ހާމަކުރައްވާފައެވެ.

އެމީހުންނަކީ އއ. ރަސްދޫ، ހެޕީނައިޓް، ޢަބްދުލްޙަންނާނު މޫސާ، ރަސްދޫ، ޑީޑީނައިޓް، އަޙްމަދު ކަމާލް، ރަސްދޫ، ސޯސަންވިލާ، ޝާނިޒު އަޙްމަދު، ރަސްދޫ، ބިލަމަގުގަސްދޮށުގެ، ޙަސަން މޫސާ، ރަސްދޫ، ސީހޯސް، އަޙްމަދު ރިޝާން، ރަސްދޫ، ގަލަދުންގެ، އިބްރާހިމް ނިޝާމް، ރަސްދޫ، ޢަންބަރީގެ، އަޙްމަދު ޒަމީން، ރަސްދޫ، ދިލްކްޝާގެ، އިކްރާމް ޚާލިދު، ރަސްދޫ، ޢަބްހަރީގެ، އަޙްސަން ޙުސައިން، ރަސްދޫ، ރަތްބަގީޗާގެ، އަޝްރަފު ރަޝީދު، ރަސްދޫ، މޯނިންގވިލާ، މުޙައްމަދު ޝަފީޤް، ރަސްދޫ، މޯނިންގވިލާ، ޢަލީ ރާފިޢު، ހަމަ އެރަށު، ގާޑެނިޔާ، މުޙައްމަދު ސުޒައިން، ރަސްދޫ، މޯނިންގހެޕީ، އަޙްމަދު ރާފިޢު، ހދ. ކުޅުދުއްފުށީ، ޝޭޑީކެބިން، މޫސާ ޙުސައިން އެވެ. މިމީހުންގެ ތެރެއިން ޢަބްދުލްޙަންނާނު މޫސާ، ޝާނިޒު އަޙްމަދު، ޙަސަން މޫސާ އަޙްމަދު ރިޝާން، އިބްރާހިމް ނިޝާމް، އަޙްމަދު ޒަމީން، އިކްރާމް ޚާލިދު، އަޙްސަން ޙުސައިން، އަޝްރަފު ރަޝީދު، މުޙައްމަދު ޝަފީޤް، ޢަލީ ރާފިޢު، މުޙައްމަދު ސުޒައިން، އަޙްމަދު ރާފިޢު ވަނީ ޝަރުތުތަކާއެކު ދޫކޮށްލާފައި ކަމަށް ފުލުހުން ވަނީ ބުނެފައެވެ.

ކްރިމިނަލް ކޯޓުން މިމީހުންނަށް ޝަރުތުކޮށްފައިވަނީ އެއްވެސް ބާވަތެއްގެ ކުށެއް ނުކުރުމަށެވެ. އަދި ބަންދުން ދޫކުރެވޭތާ 2 ދުވަސް ތެރޭގައި އަނބުރާ ރަސްދޫއަށް ދިއުމަށެވެ. އަދި ރަސްމީ ކޮންމެ ދުވަހަކު ރަސްދޫ ޕޮލިސް ސްޓޭޝަނަށް ހާޒިރުވެ ސޮއިކުރުމަށެވެ. މިމީހުންގެ ޝަރުތުތަކުގެ މުއްދަތަކީ މި އޮކްޓޯބަރު މަހުގެ 20 ވަނަ ދުވަހުން ފެށިގެން 2 މަސް ކަމަށްވެސް ފުލުހުން ވަނީ ބުނެފައެވެ.