ރާއްޖެޓީވީއަށް ދިންފަދަ ހަމަލާ ދެވެނީ ފުލުހުން މަސައްކަތް ކުރުމަށް އެކަށީގެންވާ މާހައުލެއް ނެތުމުން: ޕޮލިސް
8 އޮކްޓޯބަރ 2013 5:28
ރާއްޖެޓީވީ ހިންގާ އިމާރާތަށް އާދީއްތަ ދުވަހުގެރޭ ފަތިހު ދީފައިވާ ފަދަ ހަަމަލާތައް ދިނުމަށް މަގުފަހި ވެގެންދަނީ ފުލުހުން މަސައްކަތް ކުރުމަށް އެކަށީގެންވާ މާހައުލެއް ދެވިފައިނެޔުމުން ކަމަށް ފުލުހުން ބުނެފިއެވެ.
ރާޖެޓީވީ ހިންގާ އިމާރާތުގައި ރޯކޮށް އެތަނަށް ބޮޑެތި ގެއްލުންތަކެއް ދީފައިވާ މައްސަލާގައި ނޫސްވެރިންނަށް މައުލޫމާތު ދިނުމަށް އިސްކަންދަރު ކޮށީގައި ރޭ ބޭއްވި ބައްދަލުވުމެއްގައި ޗީފް ސްޕްރިންޑެންޓް ޢަބްދުﷲ ނަވާޒު ވިދާޅުވީ "އަޅުގަނޑު ދެކޭ ގޮތުގައި ފުލުހުން މަސައްކަތް ކުރުމަށް އެކަށީގެންވާ މާހައުލެއް ދެވިފައި ނެތުމުން މިފަދަ ކަންތައްތައް (ރާއްޖެޓީވީ ހިންގާ އިމާރާތް ރޯކޮށްލުން) ކުރުމަށް މަގުފަހިވެގެން ދަނީ،"
އޭނާ ވިދާޅުވީ ރާއްޖޭގެ މާހައުލު މިހާރުއޮތް ގޮތުން ވަރަށްގިނަ ތަންތަނުގައި ރޯކުރަމުންދާ ކަމަށެވެ. ނަމަވެސް އެހުރިހާ ތަންތަނުގައި ފުލުހުން ބޭތިއްބޭނެ ވަރަށް އެމުއައްސަސާގައި ފުލުހުން ނެތް ކަމަށްވެސް ވިދާޅުވިއެވެ. އެހެން ކަމުން ފުލުހުންނާ އެއްވަރަށް ތަންތަނުގެ ސަލާމަތީ ކަންކަން އަމިއްލައަށް ވަރުގަދަ ކުރުމަށް މަސައްކަތް ކުރުމަށް އޭނާ ވިދާޅުވިއެވެ. ޚާއްސަކޮށް އިންޒާރެއް ލިބިއްޖެ ކަމަށްވާނަމަ އެތަނެއްގެ ސަލާމަތީ ކަންކަން އެންމެ މަތީދަރަޖައަށް ގެންދަންޖެހޭ ކަމަށްވެސް ވިދާޅުވިއެވެ.
މިކަންކަން މިހެން ހުރުމުން ފުލުހުންގެ ދައުރު އަދާކުރުމަށް ސިޔާސީ ފަރާތްތަކުންނާއި އާއްމު ރައްޔިތުން ހުރަސް ނޭޅުމަށް ނަވާޒު އެދި ވަޑައިގެންނެވިއެވެ. އަދި މިދުވަސްވަރަކީ ފުލުހުންނަށް ވަރަށް ބޮޑެތި ގޮންޖެހުންތަކެއް ކުރިމަތިވެފައިވާ ދުވަސް ވަރެއް ކަމަށްވެސް ވިދާޅުވިއެވެ. ރިޔާސީ އިންތިޚާބުގެ ފުރަތަމަބުރަށްފަހު މާލެތެރެ ހަލަބޮލި ވެފައިވާތީ ފުލުހުން އެހެން ކަންކަމަށް ދޫކޮށްލަން ދަތި ކަމަށްވެސް އޭނާ ވިދާޅުވިއެވެ.
ނަވާޒު މިހެން ވިދާޅުވީ ރާއްޖެޓީވީއަށް އިންޒާރު ދެމުންދާތީ އެތަނުން އެކަން ފުލުހުންގެ ސަމާލުކަމަށް ގެނެސްފައިވަނިކޮށް އެޗެނަލް ހިންގާ ސްޓޭޝަނަށް ހަމަލާދިނުމުން އެކަމާ ބެހޭ ގޮތުން ނޫސްވެރިއަކު ސުވާލު ކުރުމުންނެވެ. ނަވާޒު ވިދާޅުވީ އެސިޓީ ލިބުމުން ރާއްޖެޓީވީގެ އިމާރާތް ބެލެހެއްޓި ކަމަށެވެ. ނަމަވެސް ހަމަލާ ދީފައިވަނީ ފުލުހުންނެތް ދަނޑިވަޅު ބަލާފައި ކަމަށެވެ.
ރާއްޖެޓީވީއަށް ދިންހަމަލާގައި މިހާތަނަށް އެއްވެސް މީހަކު ފުލުހުންގެ ބެލުމުގެ ދަށަށް ގެނެވިފައެއް ނުވެއެވެ. ނަމަވެސް އެކަންކުރި މީހުން ހޯދައި އިންސާފުގެ ކުރިމައްޗަށް ގެނައުމަށް ފުލުހުން ގެންދަނީ ވަރަށް ބޮޑަށް މަސައްކަތް ކުރަމުން ކަމަށްވެސް އޭނާ ވިދާޅުވިއެވެ. އެކަމަކީ ކޮންމެ ބައެއް ކުރިކަމެއް ކަމަށްވިޔަސް އެކަން ވަރަށް ބޮޑަށް ކުށްވެރި ކުރާ ކަމަށްވެސް އޭނާ ވިދާޅުވިއެވެ.
ރާއްޖެޓީވީގެ އިމާރާތުގައި ރޯކޮށްލުމުގައި އެހެންބައެއްގެ އަތެއް އޮތުމަކީ ވަރަށް އެކަށީގެންވާ ކަމެއް ކަމަށްވެސް ނަވާޒު ވިދާޅުވިއެވެ. ނަމަވެސް އެއީ ސިޔާސީ ބައެއްތޯ ނުވަތަ އެހެން ބައެއްތޯ ދަންނަވަން އަދި މާއަވަސް ކަމަށްވެސް ވިދާޅުވިއެވެ.
ރާއްޖެޓީވީގެ އިމާރާތް ރޯކޮށްލިއިރު އެތަނުގައި ފާރަޔަށް މީހަކު ބައިންފާއިވެއެވެ. އެމީހުން އެތަނަށް ވަދެފައިވަނީ ފާރައަށް އިން މީހާއަށް ބިރު ދައްކައި އޭނާ ޒަޚަމް ކޮށްލުމަށްފަހުއެވެ. އެއިމާރާތަކީ މިޒަމާނުގެ ހައިސެކިޔުރިޓީ އާލާތްތައް ހަރުކޮށްފައިވާ އިމާރާތެކެވެ.
ކިޔުންތެރިންގެ ހިޔާލު