ރައްޔިތުންގެ މަޖިލީހުގެ އާ އިމާރާތުން މީހަކު ވެއްޓި ޒަޚަމް ވެއްޖެ

ރައްޔިތުންގެ މަޖިލީހުގެ އާއިމާރާތުގެ 3 ވަނަ ބުރިން މީހަކު ވެއްޓި ޒަޚަމް ވެއްޖެއެވެ.

މިއަދު ހެނދުނު 10.00 އެހައި ކަންހާއިރު ހިނގި މިހާދިސާގައި އަނިޔާވެފައިވަނީ މެލޭޝިޔާގެ ރައްޔިތެކެވެ. އޭނާ ވެއްޓިފައިވަނީ އިމާރާތުގެ ބޭރުގައި ކްލެޑިން ޖެހުމަށް ބޭނުންވާ މިން ނެގުމުގެ މަސައްކަތުގައި އުޅެނިކޮށް ކަމަށް މަންޒަރު ދުށް މީހަކު ބުންޏެވެ.

އޭނާ ބުނީ އެމީހާ ވެއްޓިގެން އައިސް ޖެހިފައިވަނީ ފުރަތަމަ ބުރީގައި ޓިނުން ހަދާފައިވާ ސޭފްޓީ މަތީގައި ކަމަށެވެ. މިހާދިސާގައި އޭނާގެ ބޮލާއި އަނގަމަތި ވަނީ ފަޅައިގެން ގޮސްފައެވެ.

މިހާދިސާ ހިނގުމާއެކު ޕިކަޕަކަށް ލައިގެން އޭނާވަނީ އޭޑީކޭ ހޮސްޕިޓަލަށް ގެންގޮސްފައެވެ. އޭޑީކޭ ހޮސްޕިޓަލުގެ މެނޭޖިން ޑިރެކްޓަރ އަހުމަދު އައްފާލް ދެންމެ ވިދާޅުވީ އެމީހާ ވަނީ އޭޑީކޭ އައިސީޔޫގައި ކަމަށެވެ. އޭނާގެ ހާލު މިހާރު ރަނގަޅު ކަމަށް ޑޮކްޓަރުން ވިދާޅުވާ ކަމަށްވެސް އޭނާ ވިދާޅުވިއެވެ. "އޭނާ ސްޓޭބަލް ކޮންޑިޝަނެއްގައި އޮތީ. ނަމަވެސް މިވަގުތު އޮތީ އައީސީޔޫގައި. އޭނާގެ ހާލު މިވަގުތު ރަނގަޅު،" އައްފާލް ވިދާޅުވިއެވެ.

އޭނާ ވިދާޅުވީ އެމީހާގެ ބޯވަނީ ފަޅައިގެން ގޮސްފައި ކަމަށެވެ. އަދި އެއްފައިގެ ކަށިގަނޑެއްވެސް ބިނދިފައިވާ ކަމަށެވެ. ނަމަވެސް ބިނދިފައިވަނީ ކޮންފައެއްގެ ކޮން ކަށިގަނޑެއް ކަމެއް އޭނާ ވިދާޅެއް ނުވެއެވެ. މީގެ އިތުރަށް ކުދިކުދި ޒަޚަމްތައް އޭނާގެ ހަށިގަނޑުގެ އެކިތަންތަނުގައި އެބަހުރި ކަމަށްވެސް އޭނާ ވިދާޅުވިއެވެ. އެމީހާއާ ބެހޭ މައުލޫމާތު ޑޮކްޓަރުންގެ އަތުން އިތުރަށް ހޯދުމުގެ މަސައްކަތް ކުރައްވަމުން ގެންދަވާ ކަމަށްވެސް އޭނާ ވިދާޅުވިއެވެ.

ރައްޔިތުންގެ މަޖިލީހުގެ އާ އިމާރާތަކީ އާރުސީއެންސީ ކުންފުނިން ހަދަމުންދާ ތަނެކެވެ. އެތަނުންވެސް ބުނެފައިވަނީ އެމީހާގެ ހާލު ރަނގަޅު ކަމަށެވެ.