ކުޑަކަމުދާތަކެތި ދިނުމަށް އިންކާރުކުރި އަންހެނަކު އެއް އަހަރަށް ޖަލަށްލުމަށް ހުކުންކޮށްފި

ފުލުހުންގެ އަމުރަށް ނުކިޔަމަންތެރިވެ ކުޑަކަމުދާތަކެތި ދިނުމަށް އިންކާރުކުރި އަންހެނަކު އެއް އަހަރަށް ޖަލަށްލުމަށް ކްރިމިނަލް ކޯޓުން ހުކުންކޮށްފިއެވެ.

މިމައްސަލައިގައި ކްރިމިނަލް ކޯޓުން ހުކުންކޮށްފައިވަނީ ލ.އިސްދޫ، ގުލްފާމުގެ،އާމިނަތު ޝިބާނާ (29އ) ގެ މައްޗަށެވެ.

އާމިނަތުޝިބާނާ ގެ މައްޗަށް އެއް އަހަރަށް ޖަލަށްލުމަށްހުކުންކޮށްފައިވަނީ 2012 ނޮވެމްބަރު 04 ވަނަދުވަހުގެ 04:05 ހާއިރުމަސްތުވާތަކެތީގެ މައްސަލައެއްގައި ފުލުހުންގެ ބެލުމުގެ ދަށަށް ގެނެސް ކުޑަކަމުދާތަކެތި ދިނުމަށް އެންގުމުން އެކަމާ އިންކާރުކޮށް އާމިނަތު ޝިބާނާގެ އަމިއްލަ ގަޔަށް ކުޑަކަމު ދިޔަ މައްސަލައާ ގުޅިގެންނެވެ.

މިމައްސަލައިގައި ކްރިމިނަލް ކޯޓުން ކޮށްފައިވާ ހުކުމުގައިބަޔާންކޮށްފައިވަނީ އާމިނަތު ޝިބާނާއަށް ކުޑަކަމުދާތަކެތިދިނުމަށް ފުލުހުން އަންގާފައި ވަނިކޮށް ފުލުހުންނަށް ކުޑަކަމުދާތަކެތިނުދީ ހުރެ އޭނާ އަމިއްލަ ގަޔަށް ކުޑަކަމު ގޮސްފައިވާކަމަށްޝަރީޢަތަށް ހުށަހެޅި ހެކިންގެ ހެކިބަހުން އެނގެން އޮންނާތީ،ހެކިންގެ ހެކިބަހުންނާއި ގުޅިފައިވާ ގަރީނާތަކުގެ މައްޗަށް ރިޢާޔަތްކޮށް،ޤާނޫނު ނަމްބަރު 2011/17 (މަސްތުވާތަކެއްޗާ ބެހޭ ޤާނޫނު) ގެ 123 ވަނަމާއްދާގެ (ހ) ގެ ދަށުން އާމިނަތު ޝިބާނާ ކުޑަކަމުދާ އެއްޗިހި ދިނުމަށް އިންކާރުކުރުމުގެ ކުށުން ކުށްވެރިވެއްޖެކަމަށް ކަނޑައަޅައި، މިކުށުގެ ޢުޤޫބާތެއްގެ ގޮތުން މަސްތުވާތަކެއްޗާ ބެހޭ ޤާނޫނުގެ 123 ވަނަ މާއްދާގެ (ށ) ގެ ދަށުން 1 (އެކެއް) އަހަރު ދުވަހަށް އާމިނަތު ޝިބާނާ ޖަލަށްލުމަށް ޙުކުމް ކުރީކަމަށެވެ.

މިމައްސަލައިގެ ތަޙުޤީޤު ނިންމައި ދަޢުވާކުރުމަށް ޕްރޮސެކިޔުޓަރޖެނެރަލްގެ އޮފީހަށް ފޮނުވާފައިވަނީ 2012 ޑިސެމްބަރު06 ވަނަދުވަހުއެވެ.